1 Timothy 3

Luvuttadi Amgomgo At Lotu

Anai ni levelinga ruturun; mo do tara i vara i do na xip ka lugugu at laradi gomgo at lotu, neni i vara lavanga avukat. Laradi gomgo at lotu neni laradi kopmen tosoogong teren at lemeren limixin; neni latlok at leges atkin mun la it kis atnaasan; la ik lok tatao avukat luruptuvuk teren, loklok teren i lok nunuan mene nga; neni ik lok maraose minedi limixin boro vetpes; la neni i epovo ri lox ase limixin; neni ixo inin tangtangku mi levengkadan lolos la kopmen nak musak soso, ketla neni it kis atnaasan la lorooro ren i umsu mi lumumulus la limila; neni ixo vara solo ri levempilas; neni i epovo ri vaxaxis avukat lixitkis atdi loxoetemen, la i lox ase avukat laxamdak mi laxaalik teren kusu dinang tonga res la dina lok ngangao bok teren. Do tara xopmen naklen ti vaxaxis avukat lixitkis koetemen teren, naba lok ba kereva la ni na lok tatao avukat limixin at ne Moroa? Laradi gomgo neni laradi mi lunuunu ren i xus pam; mila i lok kapmek do neni na lox asilox i la ni na subu beles at lebelemamao at ne Moroa, kerekngan ne Satan. Neni laradi limixin di nemen maxamang at lotu, di lok ngangao ren, kusu neni noxo ruuna ka tevelinga xakapmek at limixin dina lox i rin la ni na subu tup ti lelixo at ne Satan.

Luvuttadi Loklok Tooro Xeneng At Lotu

Luvuttadi loklok tooro xeneng at lotu dina umsu mi luruptuvuk avukat at lemeren limixin, la levelinga atdi nak mokso; di noxo inin tangtangku levengkadan lolos, la di noxok lok kaka levempilas at langas kopmen nak mokso; dinam tebeng amisik leveloklox ase at luruturun keneng at lunuunu at ne Moroa la lodoxoma atdi nak lox avukat mun. 10 Una lok tong pen avot be di, la dola dina gugu avukat, dina lok ka ba nom lugugu loklok tooro.

11 Lavakin bok atdi dinap tuvuk nunuan la di noxo tere mumu, ketla dinat kis atnaasan mun la dina ruturun at levempanga axap.

12 Na laradi loklok tooro, neni latlok at leges atkin mun, la neni i epovo na vaxaxis avukat laxamdak mi laxaalik teren la nedi axap bok to at loogu ren. 13 Do na luvuttadi loklok tooro dina lok leven gugu avukat, diba lok ka laasen silok la dinaba vaase basabas mi lunuunu atdi xeneng at ne Iesu Karisito.

Lavasuun At Lunuunu Atdik

14 Nia a malagan na levelinga ru ketla a doxoma i do aba vot pasa soso box u. 15 Do nia a noxo vot soso, nenu u epovo na lox ase limixin kusu dina lok tatao avukat di keneng at lixitkis koetemen atdi mi ne Moroa; na loklok, ni lavasuun at lotu ruturun at ne Moroa i rooro amisik, neni luxus una la lusu auru at levelinga ruturun.

16 I ruturun aleng do lotu atdik, ni lavanga i silok aleng mumu Leeme Silok atdik;

“Neni ga rupot ngan laradi; Loroonan Kaala ga lox asuusu i do lorooro ren ga nemen mokmokso; la lubungangelo diga ven i. Limixin diga vavang min to at lengkot axap la limixin diga nuunu ren nade at na lavatbung menemen; la ne Moroa ga lok ka i uto vana at laxalibet.” a 

Copyright information for `MMX