aLen 25:4
bLu 10:7

1 Timothy 5

Lugugu At Ne Timoti Saparap Limixin Nuunu

Do taradi mukun na lok laxakapmek, nemen uta paase lolos tin, ketla una vaase amulus tin ngan neni ne tamam. Una lox anares ka luvuraau maxat ngan ta luvutnetam. la lavakin mukun ngan luvutnenam, la lovosono maxat ngan ta luvurinum, mi loklok i dadat aleng.

Levelinga Ri Lavakin, Lavatlok Atdi Gara Met Pam

Una lok ngangao at lempatnaa, kopmen teventaba na lok tatao di. Do lanaa rixin i ruuna laxamdak mi laxaalik kopla luvuttubuno di, i lox avukat do dina lox epovo lugugu atnedi ri livisik li atnedi, la mumu na langas dina vorang ba loklok tatao at luvuttemen di mi luvutnen di la luvuttubuno di, atla ne Moroa i lok momo mi mo loklok. Latkin do neni lanaa, la kopmen tara ri lok tatao i, neni nak lok li lodoxoma ren ti loklok tatao at ne Moroa rin, la na ngising amisix i at levenaleng kanimin la at levenaleng kangking. Ketla lanaa no im taba amisik labantuxu ren ti loklok kapmek, neni ira met pam, keke i do neni move i rooro. Una tong axasep limixin mi na levelinga, kusu kopmen tara noxo ven kaka tosoogong atnedi. Ketla do tara xopmen na lok tatao avukat leventaba akmokso ren, neni ira sev apkap pam at lunuunu la neni i lok kakapmek tinotno ri laradi kopmen na nuunu.

Lubungnaa Lotu I Lok Tooro Di

Nemen uta exes abeles tanaa ukeneng ti leexes at lubungnaa, do kovisi levenmaares teren na volo lavanna sangaun, la ni ga epot mene at leges atlok, 10 la lorooro ren i umsu mi leven gugu nunuan la lorooro ren ga lok keretna. Neni latkin loklok tatao avukat laxamdak mi laxaalik teren, la ni ga lok maraose mi limixin kadiong diga vot to at loogu ren, la ni ga lok levempanga nunuan tinedi limixin nuunu la ni ga lok tooro nedi diga xip tutu mi levenmumuat, la ga raba axap lorooro ren ti lok leven gugu nunuan.

11 Ketla nemen uta lox abeles lovosono naa ukeneng ti leexes at lubungnaa, mila do levendoxoma atdi na ngaongao ri epot, dinaba repukus basinge ne Karisito; 12 la kerepmo diba lok kakapmek tinotno mila di los polo nom laxakaape atdi diga lox avor i. 13 La di lox arala ka box i xusu dina gosogos gamasa, la dinam simgu, ketla i lok kapmek tino bok atla di lox arala ka bok leretere mumu ri leventaba vetpes, la di lox angtang di mi larangtagap gamasa, la di tong levempanga xopmen na lox avukat. 14 Kuren la a vara i do nedi lovosono naa dina epot la dina ruuna madak, la dina lok tatao avukat levempanga ro xeneng at laraugu atnedi, kusu kopmen di noxo raba luvuttadi munepen minedik kusu di noxo vaase xakapmek tidik. 15 Mila leventaba lubungnaa dira rem gili su vam kusu dina mumu asu ne Satan.

16 Ketla do tara tatkin, neni latkin nuunu la i ruuna tubungnaa ro at libibinat teren, neni na lok tatao avukat di la neni noxo lok li lumumuat mavana at lotu; atla lotu naba lok tatao mene nedi lubungnaa no dik pakes aleng tinotno.

17 Luvuttadi amgomgo at lotu mo di lok leven gugu avukat ngan lubung amgomgo, i epovo do dina lok ka bok luunun mavana at luunun atnedi, nedi mene di gugu lolos mi lavavang la di anasa; 18 atla Lovoang Kaala i vaase xeretna;

“Nemen uta velegum lungusno at lubulumaxao, mo i rubut asu levempevem piao.” a 

La i lok bok keretna,

“Laradi gugu i epovo na lok ka luunun teren.” b 

19 Nemen uta ronga res at levelinga at legesa radi i vaase asu i mumu laxakapmek at laradi mukun at lotu, ket do legepura kopla lavantun di vaase asu i, una ronga res teren. 20 Do tara atdi na lok taxakapmek, una vaase sox i ro melamgo at limixin, kusu dinaba marat.

21 At lemeren ne Moroa la at ne Iesu Karisito la at lubung angelo melemelengan, a sing alolos u xusu una mumu asu na levelinga; nemen uta lox asilok taradi mavana at limixin axap la nemen uta lox asi tara at levempanga axap nenu u lox i.

22 Nemen gat uta takas kusu una sa li lukngam to mavana at taradi ri lok lugugu at Leeme Silok, la nemen uta lok tooro tara mi laxakapmek teren, una lox adadat amisik lorooro ram.

23 Nemen uta inin dan kusuk mun; ketla una inin levengkondan kakalik at lavaen kusu ri lok tooro labalam, mila uk meres amisik.

24 Laxakapmek at leventaba i nemen saxaven mene, i epovo dik ataba ven kaka i; la nom laxakapmek atnedi imgomgo rinedi uto at loxot papaase; ketla laxakapmek at leventaba, taba ven ba ren melemu. 25 La kerepmo mun lentaba leven gugu nunuan i nemen saxaven, la mo leven gugu nunuan limixin kopmen dina ven i, naba nemen at lasaxaven.

Copyright information for `MMX