2 Corinthians 11

Pol La Luvuttadi Vavang Kaxarang

A vara aleng i do mina xip tooro ia at na lodoxoma rangtangku rak. A sing nimi do mina xip tooro ia ren. A suma i do lodoxoma rak iplivi aleng mumu nimi mi mo liplivi at ne Moroa xa, mila aga ora ka nimi do ri ne Karisito xusu ana raba nimi ngan loono dadat ti leges atlok teren. Ketla a marat do lavanga tara na sasar asoogong levendoxoma atnimi la mina ke xepe lunuunu lolos la lotu ruturun atnimi ri ne Karisito, kerekngan ne Iva; lisii ga xarang i mi lakleklen kapmek teren. A marat do tara na vot la na vavang mi ne Iesu vetpes ti na ne Iesu nema ma vavang min, la mina lok ka loroonan kopmen at ne Moroa, eburu mi lavavang i lok petpes aleng tinotno ri Loroonan Kaala at ne Moroa eburu mi lavavang nemi miga ronga ka i la miga siam kaka i. Ketla a doma i do nia xopmen ana lixilik tinotno rinedi luvuttadi vavang kaxarang, di lok do di silok aleng. Keke i do nia axoklen avukat lavavang, ketla a lok nunuan at lakleklen nia a ruuna i, la magara lox ase axasep tinotno vam nimi min.

Nia goxo ro unun tinimi at levenaleng nia aga vavang mi Lagale Lavavang at ne Moroa rinimi. Aga lox asi ia kantubu atnimi kusu ana lox aurut nimi mi Lagale Lavavang. Kereva, nenia aga lok laxapmek mi na loklok? Aga lok kaka levempilas boro at laraugu lotu vetpes ngan luunun tia, kuren la aga lox epovo i xusu ana vavang ti lok tooro nemi. La at levenaleng nia aga nemen eburu minimi la agak pakes ti tempanga, ketla a goxo lox angtang solo nimi, mila levempakpakes tarak limixin nuunu boro Masadonia diga lok tooro ia min. Kuren la nia goxo ngising panga nimi la melemu bok nia noxo sing panga nimi. A xopara na raba nimi mi laknixip. 10 Luruturun at ne Karisito ik lok tarak, la kerepmo kopmen tara medo Grik naba rupe ia at na levelinga loklox aru do nenia axo lok kaka levempilas ti lugugu rak do. 11 La tila ba nia a vaase i na? Ti lox asu i do axo balamu nimi? Kopmen. Moroa iklen i do a balamu nimi. 12 La move nenia a noxo lok kaka lempilas boro atnedi limixin ding tonga levelinga rak; kerepmo aba lox asuusu laxaxarang atnedi di lox aru di do nedi mo luvuttadi vavang la di gugu ngan nema.

13 Limixin kerepmo kopmen di luvuttadi vavang tuturun. Nedi luvuttadi vavang kaxarang la di xaxarang mi leven gugu atdi la dik lok poovo i xusu dina ven ngan luvuttadi vavang at ne Karisito. 14 Nia axo rakdu bok, mila ne Satan ik lok poovo box i ngan laangelo at laxasep. 15 Kuren la ixo lolos ti luvuttadi gugu ren kusu dinak lok poovo nedi ngan luvuttadi gugu at levelinga mokmokso. Laxavaxap at lorooro atdi diba lok ka akmokso luunun ti levempanga nedi diga lox i.

Pol Ga Paase Axalat Ti Leme Korin

16 A vara na tong amu box i do, nemen tara ta nua i do nia a baulang. Ket do mi doma i xuren, mina siam ka ia do laradi baulang kusu aba lox aru lixilix ia. 17 Na levelinga nia a vaase i ri lox aru ia, axo vaase i mi lavavara at Leeme Silok, ketla a vaase i ngan laradi baulang. 18 Buaang nedi luvuttadi di lox aru di ngan limixin at na lavatkangka, kuren la nenia bok aba lox aru ia. 19 Mi momo rip kip tutu mi mo luvuttadi xaxarang la mo loklok baulang atdi mila mi lok ngan luvuttadi akleklen. 20 I ruturun mi xip tutu mi nege i lok nemi ngan lavasaxaruki ren, kopla ip kip pilo levempanga atnimi, la i ven asi rinimi, kopla i vasa bobonot levenmeren nimi. 21 A vara na tong i do a lok mamangan aleng, mila maga marat ti lox i na rinimi.

Ketla do di vara i do dina lox aru di at tavanga, a vara box i do ana lox aru ia xerekngan di. (Na levelinga rak i lok ngan levelinga at laradi baulang.)
22 Kereva, nedi limixin me Ibru? Nenia bok pam kuren. Kereva, nedi limixin me Israel? Nenia bok pam kuren. Kereva, nedi livisik li at ne Abaram? Nenia bok pam kuren. 23 Kereva, nedi lavasaxaruki at ne Karisito? Nenia bok lasaxaruki at ne Karisito la a lok nunuan aleng tidi. (A paase ngan laradi baulang tinotno.) Agara lok pam laxan gugu buaang. Buaang levenaleng agara nemen pam at loogu xokoxo, la digak pixis aleng ia, la nia axo epovo xusu ana exes i; la agak lox auret ti lanmet. Nia a lok do nedi dixo ekip tangarang mi levempanga xerepmo. 24 I valimo levenaleng limixin me Judaia digak pixis ia ga se at lavantun sangaun mi lavasik. 25 I vantun levenaleng limixin boro Rom digak pixis ia mi levenakpiksa; la at leges aleng diga lu ia mi laxanuat. I vantun levenaleng lavattaaxup ga lok kapmek minama la at leges aleng kangking la kanimin agam kobok mun to at laras. 26 Buaang levempatpas tarak aga nemen keneng at levenmumuat to at laradanut la boro bok at luvuttadi xipkip pilo; la aga nemen bok keneng at levenmumuat boro atnedi limixin axa rak me Judaia la boro bok atnedi limixin kopmen di me Judaia. Aga nemen bok keneng at levenmumuat to at laramenemen silok, la aga nemen bok at levenmumuat to at lamatbin, la to bok at laras, la boro bok atnedi diga voovo ngan limixin nuunu. 27 Aga nemen bok keneng at leven gugu ga lolos aleng, la a goxo lok ka tevenanunga avukat la agak toxo la agak minu la aga mun anan la agak mudut aleng la goxopmen tevesingsiga avukat tia. 28 La mavana at nai levempanga, lara lumumuat mo it pot parav ia at levenaleng getgesara la ni lodoxoma liplivi mumu limixin lotu. 29 Do tara na lok molo at lunuunu ren, nia a doma mumu aleng lunuunu ren; dola tara i los beles at laxapmek, nia a umsu aleng mi lainbulu.

30 Dola ana lox aru ia, ana lox asilox ia mi na levempanga ga vot parav ia ua di lox asuusu lomolo rak. 31 Moroa Temen Leeme Silok ne Iesu, limixin axap dina emi asu min at levenaleng axap la iklen i do nia axo babala mi na levelinga. 32 To Damasko laradi gomgo maxopok at loorong silok ne Aretas ga tong lolos i xusu dina ru pe levenngas povolo ap mo lemenemen Damasko xusu dina ranga alis ia. 33 Ketla larapen tangas tarak diga suxa abeles ia at laxaxi buso la diga lox asi ia ukopok boro at logo gak lok at laxapla at loogu la aga roo suu at lukngen.

Copyright information for `MMX