2 Corinthians 3

Pol Ga Vaase Pe I Ngan Laradi Vavang

Kereva, ana vaxaru ka manga i do ana lox aru manga ia? Kopla mak pakes ti tovoang loklox axasep udom tinimi xopla me dom atnimi xerekngan lentaba luvuttadi di lox i. Keneng at lorooro axap atnama, aklen i do nemi xa mi lok ngan lovoang loklox axasep atnama xusu limixin axap diba us i la dina ven kisiv i do nema luvuttadi vavang tuturun at ne Moroa. I xasep do ne Karisito xa ga malagan na lovoang mumu nimi, la ni na levempipisik at lugugu atnama. Kopmen goxo malagan i mi loxodan mamalagan to at tuat, ketla ni ga malagan li i mi Loroonan at ne Moroa ro at levempeve at limixin.

Ma vaase i na mila ma nuunu saga at ne Moroa keneng mun at ne Karisito. Nema maxo epovo xusu mana vaase ka gamasa na lugugu at ne Moroa do ma epovo ri lox i. Lakleklen atnama, la lololos atnama, ana axav i, ne Moroa im taba i. La ne Moroa axa ga lox aepovo nama xusu mana tong asu Lagale Lavavang mumu lekabus maxat. Ana lekabus kopmen boro at Lenavolo, ketla boro at Loroonan Kaala. Lenavolo i lox asuusu lanmet, ketla Loroonan im taba lorooro.

Lekabus Maxat Ni Lavanga I Silok Aleng

Lenavolo, Moroa ga malagan i mi lengkonin mamalagan to at luat mamasao, la lisisixam at ne Moroa ga vot at loxonaleng neni ga raba ne Moses min. Keke i do lisisixam to at lemeren ne Moses goxo lolos bok ba, ketla limixin me Israel di goxo ven tooro i, mila lemeren gan tanan aleng. Mo do na Lenavolo, lugugu ren ti raba lanmet, ga vot mi lisisixam, i ruturun tinotno do lugugu at Loroonan naba lox asuusu lisisixam silok aleng. Lagale Lavavang, neni i nunuan aleng ti Lenavolo mila lugugu at loklox arooro neni in tanan aleng ti lugugu at Lenavolo ik lox asuusu loxokoxo. 10 La Lenavolo mo gan tanan, ketla lisisixam teren kopmen na soosoo lolos mila lisisixam at lekabus maxat i lolos aleng tin. 11 Lenavolo goxok lox abao la ga ruuna lisisixam silok; ketla lisisixam at Lagale Lavavang i silok aleng tin mila ni naba nemen amisik.

12 Nedik tam doma voovo ri mo lisisixam at Lagale Lavavang; kuren la nedik di abelemes aleng. 13 Nedik taxo lok ngan ne Moses, mo ga lok li loxontata at lemeren, kusu limixin me Israel di noxo ven mo lisisixam goxo nemen abao. 14 Levendoxoma atdi ga rebonot pe aleng, la ise at na levenaleng levendoxoma atdi move i repe mi levengkontata i kubak pe i, at loxonaleng di utus levenbuk at lekabus migomgo. Na loxontata i repes mun basinge laradi at loxonaleng neni i lok ka ne Karisito. 15 Mo at na levenaleng dola di utus Lenavolo at ne Moses, mo loxontata move i tu pe levendoxoma atdi. 16 Ket do laradi i repukus uto saparap Leeme Silok, loxontata i repes. 17 Loroonan, neni nom Leeme Silok la nedi limixin ua Loroonan at ne Moroa ik lok atnedi, diba sepmus basinge lololos at laxapmek. 18 La nedik axap di lox asuusu lisisixam at ne Moroa, mila kopmen bok ba tengkontata nak lok pe lengkatli atdik. La na mun lisisixam i laala boro at Leeme Silok, neni Loroonan, la ik lox ekun dik ngan lampoovo ren la ti mo langsangan lisisixam silok teren.

Copyright information for `MMX