2 Corinthians 5

Loogu Atdik No Vana At Laxalibet

Dik atakleklen i do lorooro atdik at na labantuxu noxo nemen abao, ba lok ngan mun loogu xukuxut. Mo do ira rem utut pam, nedik di ruuna lara loogu ro vana at laxalibet ne Moroa ga gagas li vam i ridik la naba tu amisik. Mo loogu limixin di goxo lok i mi levengkikngen di. Nade at na lavatbung menemen nedik tap kup sae mi levesongsongot la ata vara nga i do ata siga ka mo lorooro boro vana at laxalibet. Do nedik ata siga i, ne Moroa noxo long lenget ka dik atak lok beleben. Nedik nave tak lok at na lorooro, atap kup sae mi levesongsongot la tap kip levenaknixip; la kopmen do dik dira vara nga i do dina lok kepe labantuxu atdik, ketla ata vara i do ata siga ka nga lorooro boro vana at laxalibet, kusu lorooro at na labantuxu, lorooro avolo naba sumkonom ka i. Moroa xa neni ga gagas pam nedik ti na lorooro avolo, la neni ga raba nedik mi Loroonan teren ngan lampinebeng ti mo levempanga neni i ruuna i do ridik.

Kuren la amisik nedik di abelemes. Atakleklen i do nedik nave dik lok at na lorooro at na labantuxu, di nemen to vetpes basinge Leeme Silok. La nedik dit pas mi lunuunu, keke i do nedik taxo reven mo lempanga dik di nuunu ren. Nedik di abelemes la ta vavara aleng i do ata on basinge na lorooro at na labantuxu la atana lok ka lorooro avolo ro at lemenemen aulis atdik eburu mi Leeme Silok. Kuren la do nedik tak lok at na lorooro kopla ata met, ata lolos kusu atak lox amomo Leeme Silok; 10 mila nedik getgesara ataba ru asuvos to melamgo at lenep tongtonga linga at ne Karisito; kusu nedik getgesara ataba lok ka luunun, i nunuan kopla i lok kapmek; la neni ba raba i na i epovo at loklok atnedik at na lorooro at labantuxu.

Atatkis Ekilen Eburu Mi Ne Moroa Xeneng At Ne Karisito

11 La nema luvuttadi vavang makleklen ua lavasuun teren kusu ata marat at lebelemamao at Leeme Silok, kuren la ma gugu lolos kusu ri lok ka buaang nedi limixin. Ne Moroa ikleklen avukat lorooro atnama, la a doma box i do keneng at lorooro atnimi miklen avukat bok lorooro atnama. 12 Nema maxo lok do mana lox aru lorooro atnema rinimi; ketla ma vara i xusu mana lok nimi xusu mina mumu lorooro atnama. Kerepmo la miba epovo ri vorang nedi luvuttadi dik lox asilok di mumu lixitkis silok atdi la dixo ila mumu luruptuvuk atdi. 13 Mo do mana vaase la lodoxoma atnema na ngan ta do i baulang, ma lox i xusu ri lox aurut lugugu at ne Moroa; la do lodoxoma atnema na xasep, ma lox i ri lok tooro nimi. 14 Labalamu at ne Karisito i sasat dik, la atakleklen tuturun i do legesara mun ga uu nop loklok at limixin axap, i lok ngan ta do limixin axap diga met. 15 Neni ga uu nop loklok at limixin axap kusu do nege nedi di rooro at na lavatbung menemen, di noxo rooro rinedi xa, ketla dina rooro ri ne Karisito mo ga doma di la ga met la ga roo xat amlong.

16 Kuren la i ru ka nga i mo, nema maxo doma mumu bok ba lodoxoma at na lavatbung menemen ti ila mumu loklok at limixin, ngan no nema maga ila mumu bok loklok at ne Karisito xerepmo, ketla mo nga maxo lok bok ba i xuren. 17 Do tara i nuunu at ne Karisito, neni i ngan laradi maxat at loroonan teren; levempanga xapmek at lorooro maut ira xap pam, la lorooro maxat mo ira vot ta. 18 Ana axav i boro at ne Moroa, la keneng at ne Karisito neni ga vaxat buru dik at lixitkis munepen atdik eburu min kusu nedik ateren; la ni ga raba nema mi lugugu ri vaxat buru limixin uto saparap ne Moroa. 19 Moroa gak lok mo lugugu ren keneng at ne Karisito, ni ga vaxat buru ka limixin at na lavatbung menemen do tin; la ni goxo doma mu laxakapmek digak lox i. La ni ga raba nema mi levelinga mumu na lugugu ri vaxat buru limixin uto saparap ne Moroa. 20 Kuren la nema ma paase katling ne Karisito, la ne Moroa i toro rinimi xeneng at levempapaase atnama. Ma sing nemi at laasen at ne Karisito do mina ke ne Moroa na vaxat ka nimi uto saparav i. 21 Karisito neni xopmen taxakapmek teren, ketla ti lununuan tidik, Moroa ga lox i ga xip tutu mi laxakapmek atdik, kusu keneng teren ataba ravasu ngan limixin mokmokso at ne Moroa.

Copyright information for `MMX