aAis 49:8

2 Corinthians 6

At leven gugu atnema eburu mi ne Moroa, ma sing nemi do nemen mita siam ka mo letaba nabalamu at ne Moroa mi lumun pipisik mun. Mina ronga na levelinga ne Moroa ga tong i.

“Aga ronga nemi at loxonaleng mokmokso kusu ana lox asuusu letaba nabalamu rak. Aga lok tooro nimi at laaleng ti lox arooro.” a 

Mina ronga i na. Ana ni laaleng kusu mina siam ka mo letaba nabalamu at ne Moroa. Ana ni laaleng kusu miba lok ka loklox arooro.

Levenmumuat Ne Pol Gap Kiv I

Ma xopara i do tara na ven lenget ka tosoogong at lugugu atnema mila ma xovara i do mana lok pe langas ti lorooro. Ketla keneng at levempanga axap ma lox i, ma lox asuusu loklok at lavasaxaruki at ne Moroa, la map kip levenmumuat, la levesongsongot, la levenaknixip mi lumulus. Limixin dip sep nama, la di lok li nema at loxokoxo, la di soso antiriban nema la di lok nema ma gugu lolos aleng la kopmen manak lok ka tevenanunga avukat la kopmen tevempanga anan atnema. At loklok dadat atnema, la lakleklen, la loklok mumulus, la loklok nunuan, maga lox asuusu i do nema lavasaxaruki at ne Moroa, la at Loroonan Kaala bok mi labalamu ruturun. La maga lox asuusu box i at levempapaase ruturun atnema, la mi lololos at ne Moroa. Ma ruuna lorooro mokmokso ngan lavanga esep atnama, ti esep la ti see bok atnama. Lentaba di lok ngangao atnama la lentaba di paase galelep bok tinama; lentaba di paase aksaksa rinama la lentaba di emi asu bok minama. Dik lok tinama do nema luvuttadi xaxarang, ketla ma paase mi luruturun; limixin at na lavatbung menemen di lox abulubun nama, ketla limixin at ne Moroa diklen nama; ma vekip tangarang amisik mi lanmet, ketla mina ven ba nema move ma rooro. Di raba songsongot nema, ketla kopmen dina sev amet nama. 10 Keke i do ma suma lainbulu, ketla ma momo amisik mun teren; mat kis banbalo, ketla ma lox apnovos nedi limixin buaang; ma xis apkap, ketla ma rebeng kobot ka levempanga axap.

11 Larapen tangas atnama dom Korin. Mara paase palas avukat pam levelinga rinimi, la lebelen nama i rem suang tinimi. 12 Kopmen mana rebeng alis lebelen nama rinimi; ketla nemi xa mi vipe lolos lebelen nimi rinama. 13 A paase nga na rinimi ngan nemi laxamdak tarak; lusumsuma salai ma raba nemi min, nom i mina lox ase nama min. Mina suang levempeve atnimi.

Nemen Mita Etangas Eburu Mi Limixin Kopmen Dina Nuunu

14 Nemen mita etangas eburu minedi limixin kopmen dina nuunu, mila ixo epovo xuren. Lomokmokso mi laxapmek duba ru buru xereva? Laxasep mi lamain duba nemen eburu xereva? 15 Karisito mi ne Satan duba mulus kereva at tara todoxoma? Laradi nuunu mi laradi xopmen na nuunu duba mulus kereva? 16 Lumukmulus naba vot kereva at loogu laplavang at ne Moroa eburu mi laxampoovo vanga? Mila nedik axa laraugu laplavang at ne Moroa, neni i rooro; la ne Moroa xa ga tong i xeretna,

“Abak lox eburu midi la anat pas kantubu atdi, la nenia ba ngan ne Moroa atdi la diba lok ngan limixin tarak.
17 Kuren la mina vas su basinge limixin kapmek la mina nemen petpes basinge di. Nenia Leeme Silok ne Moroa a tong i na.”
Moroa ga tong box i xeretna,

“La nemen mita vubeles at laxapmek, kusu nia aba siam ka nimi.
18 La nia aba ngan ne Temen nimi, la nemi miba lok ngan luvutnuruk; nenia Leeme Silok ne Moroa a lolos aleng la a tong na levelinga.”
Copyright information for `MMX