aPas 16:18

2 Corinthians 8

Laramtaba Ri Limixin Pakpakes To Judaia

Luvutnetak mi luvurinuk. Ma vara i do minaklen avukat letaba nabalamu at ne Moroa ga lox asuusu i ri limixin at lotu ro Masadonia. Digak lok keneng at levenmumuat ga lolos aleng, ketla lomomo atdi ga silok aleng tinotno; kuren la digak lik kat asu rinotno mo leventamtaba atdi, keke i do nedi limixin pakpakes mun. A tong tuturun i rinimi do diga raba silok mavana at levempanga atdi diga ruuna i. At lodoxoma xusuk mun, diga sing lolos nama xusu mana siam kusu nedi bok dina raba teventamtaba ri limixin at ne Moroa to Judaia; la kopmen ana xusuk mun i. Avot diga raba lorooro atnedi ri Leeme Silok, la at lavavara bok at ne Moroa diga raba bok lorooro atnedi ri ronga res atnama. Kuren la maga sing ne Taitas, mo ga vaxaru ka lugugu ti gagas mo laramtaba xantubu atnimi, kusu na lox epasum na lugugu la na lok tooro nemi ri lox axap na lugugu at labalamu. Mip novos aleng at levempanga nemi mi ruuna i, ngan lunuunu la levempapaase la at lakleklen bok atnimi, la keneng at lomomo atnimi ri lok tooro, la keneng bok at labalamu atnimi rinama; kuren la mina lolos kusu minak lox aplivi na lugugu tik lox agagas li mo laramtaba.

A noxo lok li teventaangas linga xusu miba mu asu i. Ketla a paase mumu leventamtaba limixin petpes diba raba i, kerepmo ana lok tong mun labalamu atnimi do i lolos aleng ti labalamu at limixin petpes kopla xopmen. Nemi mikleklen letaba nabalamu at Leeme Silok atdik ne Iesu Karisito, neni gap novos aleng, ketla ti luvukat tinedik neni ga ravasu ngan laradi banbalo, kusu mibap novos.

10 Lodoxoma rak at nai lavanga xeretna; i lox avukat tinimi do mina lox axap lugugu mumu letaba miga vaxaru ka i at no lamaares ga xap. Nemi avot tinotno migamgo, la kopmen do miga lok poovo mene i, ketla lebelen nimi ga vara aleng kusu mina lox i. 11 Kuren la mina lox angtang mi mo lugugu, la mina lok axap avukar i. Lebelen nimi na xatu xusu mina lox axav i, kerekngan levendoxoma atnimi, la mina lox i mi nom levempilas mi ruuna i. 12 Mo do lebelen nimi naplivi ri raba, ne Moroa ba siam ka laramtaba atnimi i epovo at levempilas mi ruuna i la kopmen at levempilas mixo ruuna i.

13 Nia axo vara i do ana ke atnaasan teventaba la nemi xusuk mun mina xip mo lugugu at laramtaba pilas ngan laknixip silok; ketla a vara i do nemi eburu midi mina epovo ela mun. 14 At na levenaleng mo lapnovos atnimi, i epovo xusu mina lok tooro di min; la do melemu mina xis pakpakes manga, diba lok tooro nimi mi lapnovos atdi. Mo do mina mu asu i na, loklok tooro ela naba epovo mun kantubu atnimi limixin at nom lumenemen. 15 I ngan Lovoang Kaala i tong i do,

“Laradi gap naba solo, ni goxo ruuna ka tempanga ga volo aleng; la mo laradi ga lili lixilik, ni goxok pakes ti tempanga.” a 

Taitas Eburu Mi Larapen Tangas Teren

16 Ma tong avukat ti ne Moroa mila neni ga lox epovo box i do na lok li mo lebelen angtang keneng at ne Taitas kerekngan nema maga ruuna i xusu ri lok tooro nimi. 17 La kopmen ap mo xusuk mun do neni ga siam ka lisingising atnama, kusu ri vosiga nimi la na lok tooro nimi; ketla at lavavara rinotno xa ren la neni nabat pas kusu na vosiga nimi. 18 Maba riki ne Taitas eburu bok mi lara neton nedik, mo, limixin di lok ngangao aleng teren to at laraugu lotu axap mumu lugugu ren ti tong asu Lagale Lavavang. 19 La kopmen ana xusuk mun i, limixin at laraugu lotu diga soxolik ka i xusu na emu eburu minama uto Judaia la nap kip laramtaba. Na laramtaba naba xip aurut laasen at Leeme Silok, la naba lox asuusu box i do ma vara aleng i do mana lok tooro. 20 Maba lok tatao avukat laramtaba xusu tara noxo vaase mumu nama mumu na laramtaba silok nema mabap kiv i. 21 Lodoxoma atnama xeretna, ma vara aleng i do mana nemen mokmokso, la kopmen to at lemeren Leeme Silok kusuk, ketla to bok at lemeren limixin.

22 La maba riki aonon bok neton nedik petpes eburu midu; buaang levenaleng neni gara lox asuusu vam i rinama do i gagas amisik kusu na lok tooro; la mo nga i lolos aleng ti lok tooro mila lunuunu ren i rem saga atnimi. 23 La ti ne Taitas, neni lara bok atarak la i gugu eburu minia xusu ri lok tooro nimi. La tinedu luneton dik, nedu duba emu eburu min saparap nimi, nedu du ru katling laraugu lotu, la loklok atdu i lox asuusu loklok ngangao ri ne Karisito. 24 Kuren la mina lox asuusu labalamu atnimi ridi, kusu laraugu lotu axap diba xasep do levelinga atnama ti emi asu minimi i ruturun.

Copyright information for `MMX