2 Thessalonians 2

Laradi Xapmek

Mumu lomlong at Leeme Silok atdik ne Iesu Karisito, la lovotpot atdik ti nemen saparav i. Luvutnetak mi luvurinuk, ma sing nimi do nemen mita lok bukbulu soso kopla mita rakdu at levelinga leventaba di tong i do mo laaleng at lovotpot at Leeme Silok ga rupot pam. Leventaba diga xarang nimi do na levelinga ni lavapaase alii boro atnama kopla maga lox aonon i saparap nimi ro xeneng at lovoang maga malagan i rinimi. Mi guta ke avolo tara na xarang nimi kerepmo, mila lekarakat silok naba rupot avot ti lovotpot at Leeme Silok. Ap mo levenaleng mumuat, buaang limixin dinaba lox abulubun kepe ne Moroa. La lara laradi kapmek naba ru asuvos. Ketla ne Moroa naba lok kapmex i ro at lemenemen songsongot. Avot be mo laradi xapmek naba sok tixirixes ne Moroa la levelotu axap; la neni naba tong i do neni i silok aleng la nabat kis to at loogu laplavang at ne Moroa la neni naba lok ti limixin keretna, “Nenia ne Moroa.”

Mina doma su ap mo levelinga, nenia aga tong i rinimi ap mo levenaleng agak lox eburu minimi. La mi xasep pam do lara lavanga ik lok pe nom laradi xapmek kusu neni naba ru asuvos ap mo laaleng ne Moroa ga lok katling pam i. La ne Satan ga lox aonon pam loklok ting tonga xepe ude at na lavatbung menemen la mo levempanga i gugu nemnem to xeneng at lorooro at limixin; ketla buaang limixin kopmen dina xasep teren. Mo lavanga loklok pe naba lok pe mo loklok kakapmek at ne Satan se ne Moroa naba lok kepe mo lavanga loklok pe la ap mo laaleng laradi xapmek naba suvos ba. Ketla at lovotpot at Leeme Silok ne Iesu, neni naba lok kepe mo laradi xapmek mi lamamas teren la naba sev amer i mi lagamgames at lemeren.

At lovotpot at nom laradi xapmek, Satan naba lok tooro i. Neni naba ruuna lololos silok la ni ba lok levempanga sangsangu la leveloklok katling kusu na xarang arup limixin min. 10 La neni naba lok leveloklok i lok kapmek kusu na xarang arup limixin mo dinaba seeve, dinaba onon uto at lemenemen songsongot mila diba ronga xepe levelinga ruturun mo im taba limixin mi loklox arooro. 11 Kuren la ne Moroa naba lox angtangku lodoxoma atdi xusu dina nuunu ap mo levelinga xaxarang, 12 la kusu dinaba lok kaka lumumuat silok, ni lemenemen songsongot, mila di noxo nuunu at levelinga ruturun teren la dibak lok momo mene mi levempanga kopmen nak mokso.

Moroa Ga Soxolik Ka Vam Nimi Ri Lorooro

13 Luvutnetak mi luvurinuk. Leeme Silok i balamu nimi. La ik mokso do mana tong avukat amisik ti ne Moroa mumu nimi, mila ne Moroa gara soxolik ka vam nimi ganoxa at lereot kusu neni na lox arooro nimi. Na loklox arooro ga ravasu keretna; miga nuunu at levelinga ruturun at ne Moroa, la Loroonan Kaala ga lox adadat lorooro atnimi. 14 Moroa ga ro ka nimi ri lorooro avolo xeneng at Lagale Lavavang, maga tong i rinimi. Neni ga ro xaka nimi xusu mina ruuna xaka loxot at lisisixam at Leeme Silox atdik ne Iesu Karisito. 15 Kuren la luvutnetak mi luvurinuk, mina tu lolos la minam tebeng lolos mo levenanasa maga lox ase vam nimi min. Maga tong asu i nom tinimi gano la maga lox aonon bok mo levelinga at levempoang.

16 Lisingising atnama i lok keretna. Leeme Silok atdik, ne Iesu Karisito la ne Moroa ne Temen nedik duga balamu nedik, la duga raba dik mi levelinga loklok tooro, naba nemen amisik la duga raba dik mi lodoxoma voovo ti lorooro avolo. 17 Ma sing du do duna lox alolos lorooro atnimi xusu mina lok leven gugu nunuan la mina tong asu levelinga i nunuan.

Copyright information for `MMX