2 Timothy 1

Lavapaase Axasep

Nenia ne Pol, Luun Pavang at ne Iesu Karisito; Moroa ga soxolik ka ia xusu ana tong asu levelinga at lorooro keneng at ne Iesu Karisito.

A malagan na levelinga ru ne Timoti; nenu lamdak orong tarak.

Letaba nabalamu, lebelemumu, la lenmila bok tu boro at ne Moroa ne Temen dik la ne Iesu Karisito, Leeme Silok atdik.

Levelinga Emi Asu La Loklox Alolos

Nenia a tong avukat ti ne Moroa, nia a gugu rin ngan lavalabat tarak diga gugu rin la kopmen taxapmek i nemen keneng tarak. Nia a emi asu amisik mi ne Moroa at levenaleng kangking la levenaleng kanimin keneng at levesingising tarak. A doma su bok ap mo laaleng aga on basinge u la ugang teng; la a vara i do ana ven box u xusu lorooro rak naba umsu mi lomomo. A doma su bok at lunuunu ram. Lunuunu lolos bok ga nemen at lorooro at ne tubum ne Lois la at lorooro bok at nenam ne Iunis; la nenia aklen i do lunuunu lolos kerepmo ik lok bok at lorooro ram.

Na mun i lavasuun teren la nia a vaase alolos u xusu unam tebeng alolos nom laramtaba ne Moroa gara raba vam u min ap mo loxonaleng nenia aga sa li lukngak mavana ram. Atla nom Loroonan ne Moroa ga raba dik min kopmen nak lox amarat dik, ketla Loroonan teren ik suxa aumsu dik mi lololos, labalamu la lodoxoma avukat.

Kuren la nemen uta lok mamangan ti paase asu levelinga at Leeme Silok atnedik. La nemen uta lok mamangan mu box ia atla nenia a nemen at loxokoxo mumu ne Karisito. Ketla atap kip levesongsongot mumu Lagale Lavavang mi lololos ne Moroa ga raba dik min. Neni ga lox arooro dik la ga ro ka dik kusu ataba lok ngan limixin teren. Kopmen mumu levempanga dik gara lok pam i; ketla at lavavara ren, i lok ngan letaba nabalamu ren tidik keneng at ne Iesu Karisito; ni ga raba dik mi na letaba nabalamu avot ti luruntudum li at na lavatbung menemen. 10 Ketla ne Iesu Karisito ga rupot pam de at na lavatbung menemen, la ga lox asuusu vam nom letaba nabalamu ren ngan Laradi Loklox Arooro atdik la ni ga lox axap lololos at lanmet. La at na levelinga at Lagale Lavavang ni ira lox asuusu vam lorooro avolo. 11 Ne Moroa gara soxolik ka vam ia ngan luun pavang la laradi loklox ase ri paase asu Lagale Lavavang. 12 Ni lavasuun teren la nia arap kip levesongsongot; ketla nia move a tu lolos mila nia a nuunu at ne Iesu Karisito; la akleklen tinotno i do neni i epovo na lok tatao ia la na lok tatao bok mo lugugu ne Moroa ga raba ia min, se ap mo laaleng neni nabamlong teren.

13 Unam tebeng alolos nom levelinga ruturun at ne Moroa, nia aga anasa u min gano. Ni lampoovo una mumu asu i, la una nemen alolos at lunuunu ram; la labalamu ram saparap ne Iesu Karisito na nemen lolos. 14 At lololos at Loroonan Kaala nom i nemen keneng at lorooro atnedik, una lok tatao avukat nom levelinga ruturun uga lok ka i.

15 Uklen i do nedi axap limixin nuunu boro at lenep silok Asia eburu mi ne Pigalas la ne Eremogenes diga on basinge vam ia. 16 Ketla a sing Leeme Silok do ni naba lox asuusu lebelemumu ren ti ne Onisiparas midi loxoetemen; atla neni gak lox alolos amisix ia la neni goxo lok mamangan do nia aga nemen at loogu xokoxo. 17 Se neni ga rupot de Rom, neni ga puse ria se ni ga vuse ka ia. 18 A sing Leeme Silok atdik dola neni na lox asuusu lebelemumu ren ti ne Onisiparas ap mo laaleng at Leeme Silok. Nenu u xasep nunuan do ne Onisiparas gak lok tooro aleng ia ro Epesas.

Copyright information for `MMX