aKex 16:5
bAis 28:16

2 Timothy 2

Laradi Esep Tuturun At Ne Iesu Karisito

Timoti, nenu lamdak tarak. Nia a tong i na ru do una lolos at letaba nabalamu nedik tan tuuna ka i at ne Iesu Karisito. Unam tebeng alolos levenanasa nu uga ronga ia aga paase asu i at lemeren nedi buaang limixin, una raba nedi limixin min no di epovo nam tebeng avukar i, la di epovo na lox ase limixin petpes bok min.

Do levesongsongot na vot saparav u, una tu lolos at lunuunu ram kerekngan laradi esep at ne Iesu Karisito. Laradi esep i gugu lolos kusu laradi gomgo ren na lok momo min, la neni noxo gugu at teven gugu vetpes. Una lok ngan bok laradi ik sixit at lekampoovo. Do neni i vara na sixit polo nedi dik sixit eburu min, neni na mu asu avukat levelinga at luvuttadi di lok tatao mo lekampoovo. Una lok ngan bok laradi gugu taamang; neni i gugu lolos kusu neni avot na lok kaka loxot at levempipisik at laraamang. Una doxoma na levelinga nia a paase i, mila Leeme Silok naba lox axasev u mi lavasuun teren.

Una doxoma ne Iesu Karisito, neni ga roo xat amlong basinge lanmet, neni livisik li at ne Devit. Anai levelinga ni Lagale Lavavang nia a vavang min. La nenia a ekip tangarang mi levesongsongot atla nia a vavang mi Lagale Lavavang, la di xoxo alis ia ngan laradi xapmek mi lavaroos; ketla levelinga at ne Moroa xopmen na nemen at lavaroos. 10 Kuren la nia a tu lolos keneng at levesongsongot kusu ri lok tooro mo lavaanat soxolik at ne Moroa la kusu nedi bok dinaba lok kaka loklox arooro at ne Iesu Karisito la ri lox asuusu bok lisisixam avolo ren. 11 Na levelinga i ruturun;

“Do dik taga met buru vam min, dik ataba roo xat eburu bok min.
12 Do dik tana tu lolos keneng at levesongsongot, dik tanaba lok tatao limixin eburu min. Do dik ata sev apkap kepe i, neni bok naba sev apkap kepe dik. 13 Do dik kopmen ata ruturun, neni move na ruturun, mila neni noxo los polo levelinga ren.”

Laradi Gugu Ruturun At Ne Moroa

14 Una tong aronga amisik limixin at lotu mi na levelinga la una paase lolos tidi at lemeren ne Moroa do nemen dita etep mi levelinga. Na loklok ixo lok tooro di la naba lok kapmek lodoxoma at limixin tongtonga.

15 Nenu xa una lolos kusu luruptuvuk taram naba lox avukat at lemeren ne Moroa ngan laradi xopmen na lok mamangan mi lugugu ren, la neni i anasa avukat mi levelinga ruturun at ne Moroa.

16 Nemen uta paase eburu mi limixin di paase rangtangku la di paase ngan ta xopmen dina lok ngangao at ne Moroa; la mo loklok atdi i sat kaka limixin basinge ne Moroa; 17 la levelinga xerepmo i lok ngan laxanabi silok, mo i anan labantuxu at laradi. Legepu radi du anasa xerepmo, ne Aimenias mi ne Pilatas. 18 Nedu duga soogong basinge levelinga ruturun at ne Moroa. La duga lok kapmek lunuunu at leventaba limixin, duga xarang di keretna, “Moroa ga lox arooro vam limixin at na lorooro la noxo lox axatu amlong bok ba limixin basinge lanmet.” 19 Ketla levelinga at ne Moroa i tu lolos la kopmen tara i epovo na ba gili i. Diga lox amuat levelinga ren keretna,

“Leeme Silok ikleklen nedi ateren axa,” a 

la

“Nedi di tong asu i do nedi limixin at Leeme Silok, dina lok kepe laxakapmek at lorooro atdi.” b 

20 At loogu silok at lara leeme silok leventingtigon mo ik lok; diga lox i mi levempanga i nunuan ngan leven gol la levenuat gamgames. La leventaba leventingtigon bok diga lox i mi levengkonuna la diga vov i ro maxamang mi lengkongkangka mila leventaba di ove min at levenaleng silok, la mo leventaba vetpes di ove min at levenaleng gamasa. 21 Lavasuun at nom keretna; do tara i lok kepe leveloklok kakapmek teren, neni naba lok ngan nom leventingtigon avukat di anan min at levenaleng silok, atla ni i lok lugugu avukat ti leeme silok teren la ni i gagas kusu na lok leven gugu nunuan. 22 Kuren la una ke xepe leveloklok kakapmek, kerekngan loklok at luvuraau; la una lolos kusu una mu asu leveloklok keretna; loklok mokmokso, lunuunu, labalamu, la limila. Una lok na levempanga eburu minedi limixin di nuunu at Leeme Silok la nedi lorooro atdi i lok nunuan.

23 Ketla una nemen petpes basinge limixin tangtangku la di etep mi levelinga rangtangku. Limixin dik lok kerepmo, di lox asuusu levenekarakat. 24 Lasaxaruki at Leeme Silok, kopmen noxo lok levenekarakat, neni na etaba belen mi limixin axap, la neni lagale laradi loklox ase. 25 Neni na lok ngan laradi mulus do ni nak lox akmokso nedi xopmen dina etaba belen min, kusu ne Moroa naba siam ka amlong di la ni na doxoma xepe laxakapmek atnedi la dinabaklen luruturun. 26 La melemu levendoxoma atnedi naba xasep, la dina sixiro basinge lelixo at ne Satan, i ranga alis kaka di xusu dina ronga res teren.

Copyright information for `MMX