Acts 1

Saparap leeme silok ne Tiopilas;

At lovoang avot tarak aga malagan axasev u mi lempanga ne Iesu ga lox i la ga anasa min; ga ru ka i ap mo laaleng ni ga vaxaru kaxat leven gugu ren,
se at laaleng ne Moroa ga lam kaka i uto vana at laxalibet. Goxovisi ni goxo urut uto vana la ni ga vaase mi levelinga at Loroonan Kaala rinedi luvuttadi ni ga soxolik ka nedi do luvuttadi vavang teren. At lavanuet sangaun aleng melemu at lanmet teren, ni ga ru asuvos tinedi luvuttadi vavang teren ti lox asuusu i do ni i ruturun mo gara roo xat amlong pam basinge lanmet, la nedi axap diga ven i; la ni ga paase axasep mumu Linintoo at ne Moroa. At lara laaleng diga vot pasa i la ni ga raba nedi mi lavapaase alii la ga tong lolos i ridi xeretna, “Nemen mita vas kaxat basinge lemenemen Jerusalem, ketla mina nemen tangais laramtaba ne Tamak ga vaase alii min tinimi, i ngan nia aga tong pam i rinimi xeretna, Jon ga sep susu nimi mi ladan, ketla noxo lox abao bok ba la miba lok kaka lesep susu at Loroonan Kaala, la Loroonan Kaala na vubeles atnimi.”

Moroa Ga Lam Kaka Ne Iesu Uto Vana At Laxalibet

(Mt 28:16-20; Mk 16:19-20; Lu 24:50-53)

At lara laaleng luvuttadi vavang digak lox eburu mi ne Iesu la diga sue i, “Leeme Silok. Kereva, uba riki xepe bok luvuttadi amgomgo boro Rom, kusu nedik axa mede Israel ataba lok tatao nedik at na levenaleng?”

Iesu ga vorang i ridi xeretna, “Ne Tamak axa ga lok katling pam mo laaleng mo lavanga naba rupot teren, la ixo epovo xusu minaklen i do at ua laaleng. Ketla nemi minaba umsu mi lolos mo do Loroonan Kaala na vubeles atnimi; la minaba paase katling mi lorooro rak tinedi limixin to at lemenemen silok Jerusalem, la to bok at lengkot axap at lunep silok Judaia la Samaria, la to at lengkot axap bok at na lavatbung menemen kopok.”

Melemu at na levelinga ren, Moroa ga lam kaka i upana la loxontakabu ga lok pe i basinge levereven atnedi.

10 Nedi move diga reven lolos mu at ne Iesu upana at lamavangkap la soso mun lura luradi duga siga levesingsiga bunbun duga ru saparap nedi. 11 La duga lok, “Luvuttadi me Galili, lai mo mi tu mu i la mia reven upana at lamavangkap? Na ne Iesu, ne Moroa i lam kaka i basinge nimi uto vana, ni nabamlong bok kerekngan tai mo nemi mi ven i, i urut uto vana at laxalibet.”

Diga Soxolik Ka Lara Ri Lok Kun Ne Judas

12 Melemu luvuttadi vavang digamlong uto Jerusalem boro at loxongkaana, laasen teren, Lakaana Olip, ik lok saparap lemenemen silok Jerusalem. 13 Diga vubeles uto xeneng at lemenemen silok Jerusalem la diga vubeles uto vana at loogu diga nemen teren; Pita, Jon, Jems la ne Endru, Pilip la ne Tomas, Batolomiu la ne Metiu, Jems nitna ne Alpias, Simon neni at lubungmixin me Selot; la ne Judas nitna ne Jems. 14 Digat pot eburu amisik mi lentaba lavakin la ne Maria nenen ne Iesu mi luvutneton ngan loxonbinam tadi xusu dina ngising.

15 At lara laaleng Pita ga xatu kaxat kantubu atnedi legesa sangaun kobot mi legepu sangaun (120) luvuttadi nuunu; 16 la ga lok tidi, “Luvutnetak mi luvurinuk, levelinga keneng at Lovoang Kaala migomgo na ira sorun; kerekngan Loroonan Kaala ga tong asu i at lengkompixan at ne Devit, mu ne Judas, neni laradi gam gomgo rinedi luvuttadi xusu dina ranga alis ka ne Iesu. 17 Judas neni mo lara atnedik ga gugu eburu minedik.”

18 Judas ga lok ka luunun ti mo laxakapmek teren, la neni ga un kaka loxongkangka min. Ni ga subu go la lorongtong teren gara repagam la labantine ren ga sixisu nga ukamang. 19 La nedi limixin axap diga nemen go Jerusalem, diga ronga mo lavanga, la diga so asen mo loxongkangka at lavapaase axa atdi, do Akeldama, lavasuun teren keretna, “Loxongkangka at Lada.”

20 La ne Pita ga lok bok, “Keneng at levempikpixan at ne Devit ni ga malagan i xeretna,

‘Mo loogu ren na nemen gamasa; la tara noxo nemen bok ba ren.’ a 

Melemu bok,

‘Mo lugugu ren tara naba xip kaka i ren.’ b 

21 Kuren la ata soxolik ka tara, kusu na gugu eburu midik la na tong asu laxakatu kaxat amlong at Leeme Silok ne Iesu. Ata soxolik ka tara atnedi luvuttadi diga nemen eburu midik ap mo levenaleng Leeme Silok ne Iesu ga emu eburu midik; ga vaxaru ka i ap mo laaleng ne Jon ga sep susu ne Iesu se at laaleng ne Moroa ga lam ka i uto vana at laxalibet; la neni ba xip ka mo lugugu at ne Judas.”

23 Kuren la diga soxolik ka legepu radi; Josep, laasen bok teren ne Basabas, la lara laasen bok ne Jastas; la ne Matatias. 24 La diga sing keretna, “Leeme Silok, nenu ukleklen lodoxoma at limixin. Una lox ase nama mi tara atdu na luradi nu ura soxolik ka vam i, 25 kusu na xip ka mo lugugu at ne Judas ngan luvuttadi vavang la ni gat pas uto at lemenemen songsongot i epovo rin.” 26 La diga ekampoovo mi levenuat la mo luat at ne Matatias ga subu avot to at laxangka, kuren la ni ga vubeles eburu minedi lasangaun legesara xusu rip kip mo lugugu.

Copyright information for `MMX