Acts 12

Levesongsongot Ga Vot Manga Saparap Limixin Nuunu

Ap mo levenaleng loorong silok, ne Erodes ga ranga alis lentaba atnedi luvuttadi diga nuunu at ne Iesu la ga lok li di at loogu xokoxo. Neni ga ra korop laxaka at ne Jems, neton ne Jon mi lavarise sepsep. La ni ga ven i do na laniu ga lox amomo luvuttadi amgomgo at leme Judaia, kuren la ni ga ranga alis bok ne Pita la ga lok li i at loogu xokoxo. Na ga ravasu at levenaleng limixin me Judaia diga lok laanan at loxongkide diga ove vetpes i. Melemu at larangtanga alis at ne Pita diga lok li i ro at loogu xokoxo, mo go diga song araba lavanuet lara binam tadi esep, lavanuet at legesa binam kusu na lok tatao i. Erodes ga doxoma i do ni naba lok li i at lavapaase melemu ap mo laanan, laasen teren, Lovovolo Pe.

Kuren la ne Pita ga nemen to xeneng at loogu xokoxo, ketla luvuttadi nuunu diga ngising amisik ne Moroa mi lorooro axap atnedi xusu ne Moroa na lok tooro i.

Laangelo Ga Soxomus Asu Ne Pita At Loxokoxo

At laxanimin avot ap mo laaleng kusu ne Erodes na lok li ne Pita at lavapaase ro melamgo at limixin, Pita ga unga xantubu at luradi rutu mu. Ni goxo epovo na sixiro mila diga xoxo i mi luvaroos sen, la luvuttadi rutu mu mo digak lok at lumusaragu ap mo loogu xokoxo. Soso mun laangelo at ne Moroa ga ru go, la laxasep ga soo to xeneng ap mo loxot. La laangelo ga sox aus ne Pita ro at laxavis teren la ga lok tin, “Soso mun! Katu kaxat!” La mo luvaroos sen ga subu basinge lukngen ne Pita.

La laangelo ga lok, “Una sevut atmatkun labaane ram, la una xoxo li luvanga vatpas taram.” Pita ga lox i xuren la laangelo ga lok tin, “Una siga lavanga singsiga ram, la una mumu asu ia.” Pita ga mumu asu i uto xamang. Ni goxo xasep at levelinga ap mo laangelo; ni ga nua i do ni mo ga reven mun lapnobo. 10 Duga vas polo lara loxot avot, mo luvuttadi rutu mu diga lok tatao i; la melemu duga volo loxot sepsev agepura; la melemu duga vot to at lumusaragu mi lemparoos sen teren no ga tu raba uto at lemenemen silok. Mo lumusaragu ga rem suang kaparang axa ridu, la duga vas su ukamang. Duga mu asu mo langas ap mo lemenemen la soso mun laangelo ga on basinge ne Pita.

11 La ne Pita ga ven kibis mo lavanga ga rupot saparav i la ga lok, “Na nia aklen ba i do i ruturun tinotno! Moroa i riki laangelo ren la ni ira lox asu ia at lolos at ne Erodes la basinge lempanga xakapmek leme Judaia di lok do na lox i ria.”

12 Se ni ga ven kibis pam mo lavanga ga vot saparav i, la ni gat pas uto at loogu at ne Maria, nenen ne Jon Mak. Buaang limixin diga nemen go la diga ngising. 13 Pita gapdipdi ro maxamang at lumusaragu la lara loolik asaxaruki, laasen teren ne Rodi ga vas kaxat kusu na vorang linga ren. 14 Ni ga ronga xibis laxaka at ne Pita la ni ga lok momo aleng la ni ga sixit beles manga ukeneng, ketla ni xopmen goxo suang lumusaragu; la ni ga vaase axasev i do ne Pita mo ga tu xamang.

15 La diga lok tin, “U baulang!” Ketla ni ga tong amisix i do mo levelinga ren i ruturun. Kuren la diga lok, “Laangelo ren mo.” 16 Nedi move diga epaase la ne Pita garapdi amu bok. La diga suang mo lumusaragu la diga ven i la diga rakdu aleng. 17 Ni ga sep makmak nedi xusu dinak lok pilo, la ni ga soxomus ba i ridi do ne Moroa ga lox asu i boro at loogu xokoxo kereva. Ni ga lok, “Mina tong i na ri ne Jems la luvuttadi nuunu. La ni ga on basinge nedi la gat pas uto at lemenemen petpes.”

18 Ga maxantamak luvuttadi rutu mu diga rangku aleng at lavanga salai mo ga rupot saparap ne Pita. 19 Erodes ga raba linga di xusu dina ven tin, ketla di goxo long lenget kaka i. Kuren la ni ga lok li luvuttadi rutu mu at lavapaase la ni ga tong i ri luvuttadi esep do dina sev amet di.

Melemu at na, Erodes ga on basinge lenep Judaia la ga nemen at lentaba levenaleng to Sisaria.

Lanmet At Ne Erodes

20 Erodes ga musak aleng mi limixin boro Taia la Sidon; ketla mo limixin diga lok ka ne Balastas ti lok tooro nedi; neni laradi ga lok tatao loogu at ne Erodes. Kuren la digat pas saparap ne Erodes keneng at legesa binam tadi. La diga vara aleng do na lok luburadong, mila ap mo loxot atnedi, digak lok kaka leveluxa atnedi boro at lenep teren.

21 Diga lok katling pam lara laaleng at lixitkis buru atnedi, la ap mo laaleng ne Erodes ga sigaara mi lempanga singsiga nunuan teren; la gat kis to at loxonin orong teren, la ga lok lavapaase ri mo limixin. 22 Diga xup lolos keretna, “Kopmen laradi nom i paase, ketla lomoroa nom.” 23 Ap mo mene loxonaleng laangelo at ne Moroa ga sep ne Erodes mi lanmeres, neni goxo lok ngangao at ne Moroa. Laxangkolon ga anan labantuxu ren la ga met ta.

24 Ketla levelinga at ne Moroa ga epeseves uto at lengkot axap la buaang limixin diga nuunu ren.

25 Banabas mi ne Sol duga lox axap lugugu atdu, la dugamlong uto Jerusalem; duga lok kaka ne Jon Mak eburu midu.

Copyright information for `MMX