Acts 19

Pol Ga Vavang Mi Laasen At Ne Iesu To Epesas

Ap mo levenaleng ne Apolos ga nemen to Grik at lemenemen Korin, la ne Pol gat pas at langas babaalom maxeneng ap mo lunep silok Galesia la Pirigia la ni ga rupot to Epesas. Mo go ni ga vosiga lentaba luvuttadi nuunu. La ni ga sue di, “Kereva, miga lok kaka bok Loroonan Kaala at loxonaleng nemi miga nuunu?”

Diga vorang i xeretna, “Nema xovisi mana ronga i do Loroonan Kaala mo i nemen.”
Pol ga sue di, “Lesep susu salai nemi miga lok ka i?”

Diga vorang i xeretna, “Maga lok ka lesep susu at ne Jon.”

Pol ga lok, “Lesep susu at ne Jon tinedi diga on basinge laxakapmek atdi; la ne Jon ga tong i ri limixin do dina nuunu at lara mo ga mumu asu i, neni ne Iesu.” Diga ronga i na la diga lok ka lesep susu at laasen at Leeme Silok ne Iesu. Pol ga lok li lukngen to mavana atdi, la Loroonan Kaala ga vubeles atdi la diga paase mi lempapaase vetpes la diga tong asu levelinga at ne Moroa. Nedi axap diga epovo at lasangaun mi legepura.

Maxeneng at lavantun gaaling Pol ga pubeles at loogu singising, la ni ga paase lolos ti limixin, ni ga vetep mi levelinga eburu minedi la ga lok tong pen i do na sat ka lunuunu atnedi ri Linintoo at ne Moroa. Ketla lentaba atdi di goxopara levelinga ren la di goxo nuunu, la diga vaase kapmek ti langas at Leeme Silok to melamgo at limixin axap. Kuren la ne Pol ga on basinge di la ga lam ka luvuttadi nuunu eburu min; la at levenaleng axap ni ga paase ro at loogu vapaase at ne Tirinas. 10 Pol ga nemen go la ga anasa limixin at legepu maares; kuren la limixin no diga nemen taba ro at lengkot Asia, nedi leme Judaia la leme Grik bok diga ronga levelinga at ne Moroa.

Lubunggas Diga Sep Laxamdak At Ne Siva

11 Moroa ga lok buaang lempanga sangsangu silok at lekngen ne Pol. 12 La limixin diga soe ka lengkontamon at labantuxu ren, la diga lok li at labantuxu at limixin mekmeres la levenanmeres atdi gara xap, la lubunggas diga ravasu basinge di.

13 Lentaba at leme Judaia mo digat pas tangtagap la digak lok pes lubunggas basinge limixin; diga lok tong pen i do dina gugu mi laasen at Leeme Silok ne Iesu. Diga lok ti lubunggas keretna, “Nia a tong i rinimi do mina sixisu at laasen at ne Iesu, mo ne Pol i vavang min.” 14 Nedi lavanuti laxamdak at laradi boro Judaia, ni laradi gomgo at lubungmaasa, laasen teren ne Siva, mo digak lox i na. 15 Ketla lara lagas ga lok tidi, “Aklen ne Iesu la aklen bok ne Pol, ketla axoklen nimi.” 16 Laradi mi nom lagas ga nemen teren ga xala di mi langsangan lololos teren ga volo axap di, la gap sep kakapmek di. Diga sixiro basinge mo loogu ren la lengkot atdi ga lok kakapmek tinotno, la diga sixiro beleben nga.

17 La nedi axap limixin me Judaia la boro Grik bok, no diga nemen to Epesas diga ronga i na; la diga lingun, la limixin axap diga lok ngangao aleng at laasen at ne Iesu. 18 Buaang atnedi luvuttadi nuunu mi lavakin nuunu diga vot eburu la diga tong asu lempanga xakapmek digak lox i gano. 19 Buaang atnedi mo digakleklen lasak, diga lok buru levenbuk kakapmek atnedi la diga xotos i ro melamgo at limixin axap. Diga exes luunun ap mo levenbuk diga un i min, ga volo lavalimo sangaun larabin sangsangaun kobot (50,000) levempilas gamgames. 20 La kerepmo levelinga at Leeme Silok ga epeseves la ga lox alolos bok limixin nuunu.

Langsangan Lekarakat To Epesas

21 Melemu at na lempanga ga ravasu, Pol ga doma li be i do ni nat pas uto Jerusalem la na mu langas kantubu at lenep Masadonia la at lenep Grik. Ni ga lok, “Melemu at lavatpas tarak uto Jerusalem, abat pas uto Rom.” 22 Kuren la ni ga riki ne Timoti mi ne Erastas, nedu luradi loklok tooro ren uto Masadonia, la ni ga nemen to Asia at lentaba levenaleng.

23 Ap mo levenaleng langsangan lekarakat ga nemen go Epesas mumu langas at Leeme Silok. 24 Lara laradi ga nemen go, laasen teren ne Demitrius; ni ga gugu lempoovo moroa mi lisiliva; la gak lok bok lempoovo vanga at loogu laplavang at lomoroa rixin ne Atemis; la nedi luvuttadi diga gugu lugugu xerepmo diga xip kaka langsangan luunun ap mo lugugu. 25 Kuren la ni ga xup bubua ka nedi digak lok mo lugugu la ga lok tidi, “Nemi limixin, miklen i do luunun atdik ip tavasu mun at na leven gugu. 26 Nemi xa mira ven pam i la mira ronga vam mo levelinga ne Pol i tong i. Ni lok do levenmoroa limixin di lox i mi levengkikngen di, kopmen levenmoroa ruturun. La ni ira sat ka vam buaang nedi limixin mi levelinga ren, la ira lox asubu di basinge lomoroa rixin nade Epesas la at lengkot axap bok at na lenep Asia. 27 I lok kapmek do na ne Pol ira vot de la na lok limixin kusu dina lox abulubun kepe lempoovo vanga nedik tak lox i. I lok kapmek bok do limixin dina lox abulubun kepe loogu laplavang at lomoroa rixin ne Atemis la dina lok abulubun kepe bok ne Atemis; limixin axap nade Asia la at na lemenemen axap di lotu saparav i.”

28 Mo limixin diga ronga na levelinga la diga musak aleng la diga xup lolos kaxat, “Atemis me Epesas neni i silok aleng.” 29 Mo luxupkup ga epeseves ap mo lemenemen axap; mo limixin diga ranga alis ne Gaius mi ne Aristakas, nedu boro Masadonia dugat pas amisik eburu mi ne Pol, la diga sixit eburu minedu uto at loxot papaase buru. 30 Pol ga vara i do nat pas uto melamgo at limixin axap, ketla luvuttadi nuunu di goxo siam do ni nat pas. 31 Lentaba luvuttadi amgomgo at lenep silok Asia, nedi larapen tangas at ne Pol diga lox aonon bok lavapaase rin; diga sing tin do ni noxo vas uto at loxot papaase buru; kuren la ne Pol goxot pas tin.

32 La nedi limixin axap ap mo loxot papaase buru diga lok langsangan luxupkup; ketla buaang atdi digap kup gamasa mene mila di goxoklen lavasuun ap mo lovotpot buru. 33 Lentaba atdi diga lok do ne Aleksanda neni lavasuun at nai, mila leme Judaia diga lok li i do ni na ru ro melamgo at limixin. Kuren la ne Aleksanda ga sep makmak di mi lekngen kusu na lok lavapaase axasep tinedi limixin do neni eburu mi larapen tangas teren kopmen toxot atdi ap mo leedak. 34 Ketla diga ven kibis i do neni laradi me Judaia, la digap kup amisik aleng ngan legesa radi xeretna, “Atemis me Epesas neni i silok aleng!”

35 La melemu at nai leeme gomgo at limixin ga lox amila di. Ni ga lok, “Limixin me Epesas! Nemi axap miklen i do nedik mede Epesas tak lok tatao loogu laplavang at lomoroa silok ne Atemis la lovoovo ren, no ga subu boro vana at laxalibet. 36 Ixo epovo do tara na tong i do na levelinga kopmen na ruturun. Kuren la minak lox atnaasan la nemen mita lok tempanga xapmek. 37 Mi lam ka vam na luradi ude, ketla du xopmen du goxo xip pilo tavanga ro at laraugu laplavang la du goxo vaase xapmek ti lomoroa rixin atdik. 38 Dola ne Demitrius la nedi luvuttadi gugu box eburu min di ruuna tekarakat eburu mi tentaba, levengkonaleng move ri lavapaase la luvuttadi amgomgo mo di nemen; di epovo ri lok li tara at lavapaase ren. 39 Ket do tavanga gove nemi mi vara rin, minaba epaase mu ba i ro at lovotpot buru atnimi xa. 40 I epovo do dina lok li dik at lavapaase mumu na leedak i ngan mo lingina. Kopmen tavasuun at na leedak, la nedik ta noxo lox epovo i do ataba tong tavasuun nunuan ti nai.” 41 Melemu at lavapaase ren ni ga lox aepeseves nedi.

Copyright information for `MMX