Acts 23

Pol ga sok katli ka luvuttadi silok la ga lok tidi, “Luvutnetak. Luruptuvuk tarak i lox avukat axap at lemeren ne Moroa, ise at na laaleng lingina.” Ketla lamaasa gomgo ne Ananias ga tong i ridi luvuttadi diga tu auret ne Pol do dina vasa lungusno ren. Pol ga lok tin, “Moroa naba vasa u, nenu u ngan ta laxapla ro maxamang inbun la to xeneng i lok kapmek! Ut kis de xusu una mumu asu Lenavolo at ne Moroa la una ronga linga rak; ketla nenu xa u los polo Lenavolo at ne Moroa la ura tong i ridi do dina vasa ia!”

Mo luvuttadi diga tu saparap ne Pol diga lok tin, “Nenu u paase kapmek ti lamaasa gomgo at ne Moroa!”

Pol ga vorang i ridi, “Luvutnetak, nia axoklen i do neni lamaasa gomgo. Levelinga ik lok to xeneng at Lovoang Kaala i lok keretna, ‘U noxo vaase kapmek ti laradi gomgo at limixin.”

La ne Pol ga ven i do lentaba atdi na limixin nedi lubung Sadiusi la lentaba bok atdi nedi lubung Parisi, la ni ga vaase silok tinedi luvuttadi, “Luvutnetak, nenia la Parisi, la ne tamak bok, neni la Parisi. A tu at lavapaase mila nia aklen i do ne Moroa naba lox arooro amlong nedi diga met pam diba roo xat amlong.” Diga ronga i na, la lubung Parisi mi lubung Sadiusi diga edak kaxat, la diga epeseves ti legepu binam tadi. Mila lubung Sadiusi dik lok do limixin di noxo roo xat amlong basinge lanmet, la do kopmen tubung angelo mi labaroonan; ketla lubung Parisi di nuunu at na lavantun lempanga.

Luxupkup go ga silok la lentaba luvuttadi loklox ase at Lenavolo, nedi at lenep at lubung Parisi diga xatu kaxat la diga vaase lolos, “Maxo vuse ka tavanga i lok kapmek at na laradi. Agut loroonan at na lorooro xopla laangelo mo ga paase rin!” 10 Mo leedak ga lolos tinotno la leeme gomgo at limixin esep ga marat do limixin dina etep mi ne Pol la dina sev amer i. Kuren la ni ga tong i ri luvuttadi esep do dinat pas uto saparap mo limixin la dina lam ka ne Pol basinge di, la dina lok li i ro at loogu lolos.

11 Ap mo laxanimin Leeme Silok ga ru saparap ne Pol la ga lok, “Una lolos! Ura tong asu vam levelinga rak na de Jerusalem, la unaba tong asu box i to Rom.”

Leme Judaia Diga Tong Li Langas Ti Sev Amet Ne Pol

12 Ga maxantamak suubu ap mo lara laaleng melemu, lentaba at leme Judaia diga rupot buru la diga tong li levempapaase. Diga xaape ri ne Moroa do di noxo an tempanga anan la di noxo in taxadan se dina sev amet ne Pol. 13 Nedi axap diga epovo at lavanuet sangaun mo diga lok na lavapaase ri sev amet ne Pol. 14 Kuren la diga vot pasa lavamaasa silok at luvuttadi laplavang la loxongkulao silok la diga lok, “Mara lok pam laxakaape saparap ne Moroa do nema axap ma noxo anan tempanga anan la ma noxo in taxadan se manaba sev amet ne Pol. 15 Monga nemi eburu mi luvuttadi amgomgo mina lox aonon tevelinga ri leeme gomgo at limixin esep boro Rom kusu na lok taba nimi mi ne Pol; mina xarang i dola mi vara i xusu mina ronga levelinga ruturun mumu i. Ketla nema maba nemen gagas go mun auret ti sev amer i, mo neni xovisi noxo rupot nade.”

16 Ketla lisixilik at ne Pol ga ronga mo lavapaase alii atdi; kuren la ni gat pas la ga beles to xeneng ap mo loogu lolos la ga tong na levelinga ri ne Pol.

17 Kuren la ne Pol ga ro xaka lara laasesep la ga lok tin, “Una lok ka na laau radi uto at leeme gomgo at limixin esep; neni i ruuna levelinga xusu na tong i rin.” 18 Mo laasesep ga lam ka i uto at leeme gomgo at limixin esep la ga lok, “Laradi xokoxo ne Pol i xup kaka ia la i sing ia xusu ana lam ka na laau radi ude saparav u, mila neni i ruuna levelinga xusu na tong i ru.”

19 Leeme gomgo ga ranga tu at lekngen la ga lam ka i uto at loxot mimila la ga sue i, “Lai mo nu u lok do una tong i ria?”

20 La ni ga lok, “Leme Judaia di siam do diba sue u kantamak kusu una lok ka ne Pol uto saparap nedi axap luvuttadi amgomgo, diba xarang i dola luvuttadi amgomgo di vara i do dina ronga levelinga ruturun mumu i. 21 Ketla nemen uta ronga res atdi, mila i vanuet sangaun la i soxope asu lenep bok mo diba lipe tangais i. Dira lok pam laxakaape saparap ne Moroa do di noxo anan tempanga anan la di noxo in taxadan, se dinaba sev amet ne Pol. Mo nga di gagas ti lox i, la di ngangais linga mun taram.”

22 Leeme gomgo ga lok, “Nemen uta tong i na ri tara do nenu ura tong pam i ria.” La ni ga sak tiki aonon i uto.

Leeme Gomgo Ga Lox Aonon Ne Pol Uto Saparap Ne Pelik

23 Leeme gomgo at luvuttadi esep ga ro xaka luasesep teren la ga lok tidu, “Muna lox agagas li tegepu sangaun kobot (200) luvuttadi esep la minat pas uto Sisaria, eburu mi lavanuti sangaun luvuttadi esep no dit kis at lemparos, la legepu sangaun kobot (200) luvuttadi esep mi levesoso, la mina gagas ti vas kaxat at lavasik konaleng at laxanimin. 24 Mina lox agagas li bok temparos tip kip ne Pol la lempanga ren, la mina lok ka atnaasan i uto saparap laradi gomgo ne Pelik.”

25 Kuren la leeme gomgo at luvuttadi esep ga malagan levelinga la ga lok keretna:

26 “Nenia ne Kolodias Lisias; a malagan na levelinga ru laradi gomgo ne Pelik ma lok ngangao rino ram. Nia a lox aonon lavapaase momo ru.

27 Leme Judaia diga ranga alis na laradi la diga lok do dina sev amer i. Agaklen ka ba i do na laradi neni lanat boro Rom. Kuren la nenia atat pas itinongo eburu mi luvuttadi esep tarak la mata lok ka i basinge di. 28 Ata vara i do anaklen tinotno ua lavasuun at lumukmusak atdi rin, kuren la nia ata lam ka i uto saparap luvuttadi amgomgo axap atdi. 29 Nia ata long lenger i do ni xopmen toxo lok tepanga xapmek kusu ni naba met nov i xopla ana lok li i at loogu xokoxo; lelinga dita lok li rin mumu mene Lenavolo atdi. 30 La lelinga i rupot tia do lentaba me Judaia mo di tong li leventaangas do ri sev amer i; kuren la mo a lox aonon soso i udom saparav u. Aba tong i ridi do dina lok li i at lavapaase ro melamgo ram.”

31 Luvuttadi esep diga lox epovo levelinga at leeme gomgo. Diga lam ka ne Pol la diga emu eburu min ap mo laxanimin uto vaxalom at lemenemen Antipatris. 32 Ap mo lara laaleng melemu, nedi luvuttadi esep mo digat pas at laxangka, digamlong uto at loogu lolos; diga on basinge no limixin mi lemparos kusu dina emu mi ne Pol. 33 Diga lam ka i uto Sisaria la diga raba lovoang mi levelinga loklox axasep ti laradi gomgo ne Pelik, la diga lok li ne Pol saparav i. 34 Laradi gomgo ga exes mo levelinga la ga sue ne Pol do ni meva. La ni ga ronga i do neni boro Silisia. 35 La ni ga lok, “Aba ronga linga ram do mo luvuttadi di lok li u at lavapaase dina rupot.” Kuren la ni ga tong i ri limixin loklok tatao do dina lok tatao ne Pol to at loogu silok at ne Erodes.

Copyright information for `MMX