Acts 24

Leme Judaia Diga Lok Li Ne Pol At Lavapaase

Melemu at lavalimo aleng lamaasa gomgo, ne Ananias gat pas uto Sisaria eburu mi lentaba at loxongkulao silok at limixin me Judaia, la lara leeme vapaase bok, laasen teren ne Tetalas. Diga ru ro melamgo at laradi gomgo ne Pelik la diga lok li lavapaase atdi ri ne Pol. Diga xup kaka ne Pol ukeneng ap mo loogu la ne Tetalas ga lok keretna, “Laradi silok ne Pelik! Loklok tatao ram tinama i lok li nama at langsangan lumulum, la buaang lempanga loklok tooro mo nenu uga lox i ri limixin at lenep silok atnama. Ma lok momo aleng at na ro at lengkot axap at levenaleng getgesara, la ma tong avukat tinotno ru. Axo vara i do ana lox amolo u mi lempapaase rak, ketla a vara i do una ronga avukat na levelinga lixilik atnama.

Maga ronga i do na laradi i lox araut lekarakat; ni ik paxaru kaxat levenesep to xantubu at leme Judaia no di nemen at lengkot axap at na lavatbung menemen; la neni lamgomgo at loxonbinam tadi laasen teren Nasarin. Neni ga lok bok pam do na lok puvula loogu laplavang, la maga xoxo xaka i. [Maga lok do mana lok li i at lavapaase kerekngan Lenavolo atnama i tong i. Ketla leeme gomgo ne Lisias ga rupot posiga nama la ga lam ka i basinge nama, eburu mi buaang limixin esep teren. Kuren la ne Lisias ga lok tinama do maba vaase mumu ne Pol to melamgo ram. Mo do una susue na laradi, nenu uba ronga i do levelinga rak i ruturun.”]

La nedi axap leme Judaia diga lok tooro ne Tetalas at mo lavapaase la diga lok do mo levelinga ga ruturun.

Pol Ga Vorang Levelinga Atdi Ro Melamgo At Ne Pelik

10 La ne Pelik ga lok loklok katling ti ne Pol kusu na vaase, la ne Pol ga lok, “Aklen i do nenu ugang tonga linga at na lenep silok at levenmaares buaang; kuren la nia a momo ri vorang levelinga atdi de melamgo ram. 11 Nenu xa uba long lenget ka i atdi do una sue di, do gat lasangaun mi legepura levenaleng ga xap pam, nia agat pas uto Jerusalem ti lotu saparap ne Moroa. 12 Leme Judaia di goxo ven ia mi tara, do ma gita epaase musak to xeneng at loogu laplavang, kopla a gita lox axatu lodoxoma at limixin to xeneng at laraugu singising kopla to ap mo lemenemen silok. 13 Ketla dixo epovo do dina lox asuusu i do na levelinga atdi i ruturun. 14 Ana tong i na ru. Nia a lotu saparap ne Moroa at lavalabat atnama keretna; a mumu asu mo langas di tong i do i xaxarang. Ketla a nuunu at levelinga diga malagan i at Lenavolo at ne Moses, la levenmamalagan at lavaeme vapaase alii. 15 Nia a doxoma voovo ri ne Moroa xerekngan bok di, di nuunu do limixin axap, limixin avukat la limixin kapmek, diba roo xat amlong basinge lanmet. 16 Kuren la a lolos amisik ti ke laxakapmek la ana nemen mokmokso at lemeren ne Moroa la limixin.

17 Melemu at lentaba levenmaares aga nemen petpes basinge lemenemen Jerusalem, agat pas ugo ri xip ka lempilas tinedi limixin tarak mo dik pakes; la aga vara i do anaplavang saparap ne Moroa. 18 Aga lox i na la aga lox epovo loklok tik lox adadat; la nedi na diga vosiga ia ro at loogu laplavang. Goxopmen bok timixin solo diga nemen eburu minia la goxopmen bok tekarakat ap mo loxot. 19 Ketla leme Judaia boro at lenep Asia mo diga nemen go; ba lox avukat do nedi axa dina ru de melamgo ram la dina lok lavapaase, mo do di ruuna tevelinga xusu dina lok li i mavana rak. 20 Kopla i epovo do na limixin na di tu de, dina tong lavanga salai diga ven i rak, aga bilinga ren ap mo laaleng nia aga tu ro melamgo at luvuttadi amgomgo. 21 Nia aga tu mun at legesa vanga. Nia aga xup lolos ap mo laaleng nia aga tu ro melamgo atdi xeretna, ‘Mi vaxaru ia at lavapaase mo lingina mila a nuunu do limixin no diga met pam diba roo xat amlong ti lorooro.”

22 Kuren la ne Pelik, gakleklen tinotno mo langas at Leeme Silok ga lox axap mo lavapaase. Ni ga lok tidi, “Aba ronga bok ba na levelinga melemu, la aba lok axav i, mo do leeme gomgo at limixin esep ne Lisias na rupot.” 23 Ni ga tong i ri laradi loklok tatao at ne Pol do ni nak lok maxopok at loklok tatao at luvuttadi rutu mu, ketla dina raba i mi tevengkonaleng tin kusu na vas tangtagap la dina siam abeles larapen tangas teren kusu dina raba i mi tempanga i epovo at lavakpakes teren.

Pol Ga Ru To Melamgo At Ne Pelik Mi Ne Darusila

24 Melemu at lentaba levenaleng Pelik ga rupot mi latkin teren ne Darusila, neni boro Judaia. Pelik ga tong mu ri ne Pol do neni na vubeles la ni ga ronga ne Pol ga paase mumu lunuunu at ne Iesu Karisito. 25 Ketla ne Pol ga paase mumu luruptuvuk avukat, la loklok ti lok tatao avukat lodoxoma, la laaleng at ne Moroa naba lok li limixin at lavapaase, la ne Pelik ga marat aleng tinotno la ga lok, “I epovo nga. Aba ro xaka bok ba u do nia ana ruuna bok ba taaleng.” 26 Pelik ga vara ri tempilas boro at ne Pol la ni ga tong i rin do ni naba soxomus asu ne Pol mo do neni na raba i mi tuunun; kuren la ni gap kup kaka amisik ne Pol la ga paase mumu mo luunun ti un asu i.

27 Melemu at legepu maares gara volo, Pokias Pestas ga lok ka loxot at ne Pelik ngan laradi gomgo ap mo lenep silok. Pelik ga vara i do na lox atdan lodoxoma at leme Judaia, kuren la ni ga ke xepe ne Pol to at loogu xokoxo.

Copyright information for `MMX