Acts 26

Pol Ga Vorang Lavapaase Ro Melamgo At Ne Agripa

La ne Agripa ga lok ti ne Pol, “I lox avukat do una lok lavapaase ram.”

Pol ga sep makmak di, la ga lok keretna,
“Laradi silok ne Agripa, a vara na tong i do a lok momo mila ana lok bok lavapaase rak de melamgo ram na lingina, la ana vorang levelinga at leme Judaia diga lok li i rak. Ana i ruturun mila nenu ukleklen tinotno leretere la levenekarakat ik lok kantubu atnedi leme Judaia. A sing nimi na, do mina xis atnaasan la mina ronga ia.

Buaang atnedi leme Judaia diklen avukat lorooro rak ga vaxaru xaka i at laau rak. Diklen avukat luruptuvuk tarak ga lok kereva to at lemenemen tarak la to bok Jerusalem. Buaang levenmaares digakleklen ia. La nanga dikleklen i do aga nemen keneng at lara libinam tadi at lotu atnama mo di mumu asu aleng Lenavolo. Di tong nedi do lubung Parisi. Di epovo do dina tong i do na levelinga rak i ruturun, mo do di vara i. La na a tu nade at lavapaase atla a ngangais ne Moroa do ni ba lox empana laxakaape ren ga lox i ri lavalabat atdik. Na laxakaape ri lox axatu limixin basinge lanmet la diba vubeles at Linintoo at ne Moroa. La lasangaun mi legepura levenabung mixin atnama di ngangais ne Moroa xusu naba lox epovo na laxakaape ren tidi la dina lotu saparap amisix i at levenaleng axap. La mumu vam i na laxakaape, la leme Judaia, limixin tino rak, dia lok li ia at lavapaase! Tila ba, i lolos aleng tinimi xusu nemi mina nuunu do ne Moroa i epovo naba lox arooro amlong limixin diga met pam?

Ganoxa nenia bok aga doxoma i do ana lok lempanga axap kusu ri ru pe lugugu at ne Iesu boro Nasaret. 10 Aga lok na lempanga ro Jerusalem la aga lok ka levelinga lolos boro at lavamaasa silok kusu ana lok li limixin buaang at ne Moroa ro at loogu xokoxo; se diga lok do dina sev amet di, la nenia bok aga sisiam do dinap sev amet di. 11 Buaang laxanaleng agak lox asongot di ro xeneng at laraugu singising, la agak lok di xusu dina tong i do di xopara ri ne Iesu. Agak musak aleng tinotno di, kuren la agat pas bok uto vaxalom at lara menemen petpes kusu anak lox asongot nedi.

Pol Ga Ven Kibis Ne Iesu Ro At Langas

(Gu 9:1-19; 22:6-16)

12 La kerepmo agat pas uto Damasko mi lavapaase axasep boro at lavamaasa silok, diga raba ia mi lisisiam. 13 Mo go mun ap mo langas ga xanangking tubu, aga ven lababao gamgames aleng, ga soso boro vana at laxalibet; laxasep teren ga volo laxasep at laxangking la ga ngao pavaa ia eburu minedi luvuttadi diga emu minia. 14 Nema axap maga subu ukopok at laxangka, la aga ronga laxaka at lara ga vaase Ibru ria, ga lok keretna, “Sol, Sol! Tila uk lox asongor ia? Uk lox asongor axa u xerekngan lodongki i rubut alu mi laxangkedek teren la kerepmo i lok asongor i at loxonuna at laradi loklok tatao ren!’

15 Aga sue, ‘Leeme Silok, nenu nege?’

La Leeme Silok ga lok, ‘Nia ne Iesu, mo nenu uk lox asongor ia.
16 Ketla una xatu kaxat la una ru mi luxangkedek taram. Ana ara vot asaxaven pam tu xusu ri soxolik ka u, i ngan lasaxaruki rak; nenu uba tong asu na lavanga nenu u ven i rak lingina ri lentaba vetpes la lempanga bok aba lox ase u min melemu. 17 Aba lox arooro u basinge limixin me Judaia la basinge bok limixin kopmen di me Judaia, nia aba riki u saparap di. 18 Nenu uba suang lodoxoma atnedi la uba sat kaka nedi basinge lamain at ne Satan uto at laxasep at ne Moroa, la basinge lolos at ne Satan uto saparap ne Moroa, kusu dina nuunu rak. La kerepmo ne Moroa naba doxoma xepe leveloklok kakapmek atnedi la dinaba ruuna ka loxot tidi xantubu ap mo limixin ne Moroa ga soxolik ka vam di.’

Pol Ga Vaase Asu Lugugu Ren Ngan Laradi Vavang

19 Kuren la laradi silok ne Agripa, a goxo ronga xepe mo lisilimet aga ven i boro vana at laxalibet. 20 Aga vavang avot to Damasko la to bok Jerusalem, la melemu bok to at lengkot axap Judaia, la kantubu bok at limixin kopmen di me Judaia; aga vavang do dina leeng basinge laxakapmek atnedi la dina mumu asu ne Moroa la dina lok lempanga ri lox asuusu i do dira leeng pam. 21 Lavasuun mun at nai la leme Judaia diga ranga alis ia ro at loogu laplavang, la diga lok do dina sev amer ia. 22 Moroa ga lok tooro aleng ia ise at na laaleng lingina; kuren la nia a ru na de, a tong asu levelinga ruturun tinemi axap, limixin gamasa la limixin silok. La na levelinga rak nia a tong asu i, i epovo mi levelinga at lavaeme vapaase alii la ne Moses, nedi diga tong i do na lempanga naba vot. 23 Diga tong i do Lanarong naba xip losongsongot la neni lara avot naba roo xat amlong basinge lanmet, kusu ri vaase asu langas ti lok ka lorooro ri leme Judaia la ti limixin kopmen di me Judaia.”

24 Pol move ga paase la ne Pestas ga xup tin keretna, “U baulang nom, ne Pol! Langsangan lakleklen taram i lox u la ura baulang!”

25 Pol ga vorang i rin keretna, “Leeme silok! Nia xopmen ana baulang. Na levelinga rak i ruturun la ik mokso. 26 Loorong silok ne Agripa! Ana vaase ru mi lolos la kopmen a noxo marat, mila nenu u xasep at na lempanga mumu ne Iesu. Nia a lok do nenu u xasep at na lempanga axap, mila na lempanga xopmen goxo ravasu ro at toxot lipe. 27 Kereva, u nuunu at levelinga at lavaeme vapaase alii? Aklen i do nenu u nuunu xuren!”

28 Agripa ga lok ti ne Pol, “Kereva, at na mun loxonaleng la u lok do una lox ia ngan laradi nuunu?”

29 Pol ga lok, “At na loxonaleng kopla loxonaleng melemu, lisingising tarak ti ne Moroa do nenu la nedi axap nom ding tonga ia mo lingina, diba nuunu at ne Iesu xerekngan ia, ketla di noxo nemen at loxokoxo ngan ia.”

30 La ne Agripa, la laradi gomgo ne Pestas, la ne Benis, la nedi bok lentaba vetpes diga xatu kaxat. 31 La diga vas su la diga lok tinedi getgesara xeretna, “Na laradi ixo lok kapmek tepanga xusu ni naba met nov i xopla na nemen at loxokoxo.”

32 La ne Agripa ga lok ti ne Pestas, “I epovo xusu ata lox asu na laradi mo do ni xopmen goxo sing ti ne Kaisar kusu na ronga linga ren.”

Copyright information for `MMX