Acts 27

Limixin Esep Diga Lok Ka Ne Pol Uto Rom

Lavaeme silok diga tong li levelinga rinama xusu maba sen kaxat mi lavattaaxup uto Itali at lemenemen silok Rom, la diga lok ka ne Pol la lentaba limixin kokoxo bok uto saparap ne Julias, neni laasesep at limixin esep boro Rom diga tong nedi do, “Limixin esep at ne Kaisar.” Nema mi ne Pol maga los kas at lavattaaxup boro Adramatiam, mo ga gagas kusu na sen kaxat uto at levesoolom at lenep silok Asia, la maga sixit kaxat. Aristakas, neni boro Masadonia at lemenemen Tesalonia, neni ga emu eburu minema.

Ap mo lara laaleng melemu maga rupot to Sidon; Julias gak lok loklox avukat aleng ti ne Pol la ni ga siam ti ne Pol kusu ni nat pas la na ven larapen tangas teren, kusu diba raba i mi levempanga salai neni gak pakes tin. Maga sen kaxat basinge mo lenep, la maga sesen uto melemu ap mo losoxan Saipras kusu lamanman noxo mas tangarang lavattaaxup. Maga volo laras saparap lenep Silisia la Pampilia, la maga vot to Mira at lenep Lisia. Mo go laasesep ga ronga i do lara lavattaaxup boro Aleksandria mo ga lok do na sen kaxat uto Itali; kuren la ni ga lox aurut nema uto vana ren. Maga sesen sila at laxanaleng buaang, ga lolos aleng tinama xusu mana sesen saparap lemenemen Kinidas; la ma goxo lox epovo i xusu mana mu mo lenep tas mumu langsangan lamanman. Kuren la maga sesen epopolo uto melemu at losoxan Krit, maga volo lungusungus laasen teren Salmoni. Maga sesen auret tinotno ro loxon, la lavatpas ga lolos aleng ketla maga vot to at lara loxot diga tong i do Losoolom Avukat; goxo vaxalom bok boro at lemenemen silok Lasia.

Maga nemen at lentaba levenaleng mo go, ga lolos tinotno rinama ri sen mi lavattaaxup, mila leven gaaling at lamanman ga rupot pam la laras ga repit aleng. Laaleng at ne Moroa ti mun anan no gara volo vam, neni laaleng ga lok katling laxakatu kaxat at leven gaaling at lamanman. Kuren la ne Pol ga vaase aronga di. Ni ga lok keretna, 10 “Nemi limixin, a ven i do lavatpas atdik mede la uto, naba lok kapmek tinotno; langsangan lumumuat naba vot saparap lempanga atdik la ti lavattaaxup bok, la ti lorooro bok atdik.” 11 Ketla laasesep ga mumu asu levelinga at laradi gang tanga lisitia ap mo lavattaaxup la at laradi gam gomgo ap mo lavattaaxup, la kopmen ni goxo nuunu at levelinga at ne Pol. 12 Mo losoolom kopmen goxo lox avukat tinama xusu mana nemen teren ap mo leven gaaling at lamanman; kuren la buaang atnedi diga lok do dina sen kaxat mi lavattaaxup la dina sen epopolo uto Pinisia mo do dina epovo. Ni lara losoolom to Krit ga nemen alipe at lamanman la diba nemen go at leven gaaling at lamanman.

Langsangan Lamanman Ga Rupot To At Laras

13 Lamanman kakalik borou ga mas kaxat, la limixin diga lok do naba lox avukat mun mo lavatpas atnedi; kuren la diga rep aurut laaga la diga sen auret tinotno ro loxon at losoxan Krit. 14 Ketla soso mun mo lamanman lolos ga mas kaxat boro at losoxan. Limixin diga so asen mo lamanman mi lamanman silok borois mero xopok. 15 Ga mas lolos mo lavattaaxup la lavattaaxup goxo epovo xusu na sixit tangarang mo lamanman. Maga molo ri lok tong pen i la maga ke xepe i la lamanman gat mas aonon lavattaaxup atnama. 16 Maga sesen alipe ro melemu ap mo losoxan kakalik, laasen teren Koda; ga lolos aleng kusu mana lok li avukat lesepang kakalik mo maga sasar i go melemu at lavattaaxup. 17 Maga xip aurur i la maga dos alis lavattaaxup mi lempatkua. Diga marat aleng mila lavanga dina sixit mavana at laxangkaneng at lenep Libia la lavattaaxup na reporok; kuren la diga lox asi laaga ap mo lavattaaxup la maga ke lavattaaxup, lamanman gat mas aonon gamasa i. 18 Mo langsangan lamanman ga lolos aleng tinotno; kuren la ap mo lara laaleng melemu diga lok kaxar i xusu dina lu asi mi lempanga go vana ap mo lavattaaxup ukopok ti laras. 19 La ap mo manga lara laaleng melemu diga lu asi mi lempanga gugu ap mo lavattaaxup. 20 Buaang laxanaleng ma goxo ven laxangking mi laxampenti, la lamanman mo gat mas lolos aleng, maga nua i do nema axap ma noxo roo suu.

21 La buaang laxanaleng mo limixin di goxo anan la ne Pol ga ru ro melamgo atdi la ga lok, “Nemi loxongkulao, nemi mi goxo mumu asu levelinga rak la taga sen kaxat boro Krit; do mi gita ronga res tarak, dik gixo ekip tangarang mi na lumumuat. 22 Ketla na a sing nimi do mina lolos! Kopmen teta atnimi naba met. Ketla lavattaaxup kusuk mun naba lok kapmek. 23 Nia aklen i na mila at laxanimin laangelo boro at ne Moroa no nenia ateren la a lotu saparav i, i vot pasa ia. 24 La i lok tia xeretna, ‘Pol! Nemen uta marat gat. Uba tu ro melamgo at ne Kaisar; la ne Moroa i balamu nimi la i siam pam do nedi axap at lavattaaxup dinaba roo suu.’ 25 Kuren la nemi limixin mina lolos mila nia a nuunu at ne Moroa do ni naba lox epovo lempanga xerekngan ni i tong pam i ria. 26 Ketla lamanman ba rev aoso lavattaaxup uto loxon at lara losoxan.”

27 At laxanimin at laaleng sev asangaun mi lavanuet at lamanman gap kiv aonon nema ro at laras Adaria. At laxanimin tubu luvuttadi loklok tatao ap mo lavattaaxup diga nua i do nema mo maga sesen auret ta uto loxon. 28 Kuren la diga lu asi mi luxua, losoxovo ga nemen teren la maga long lenger i do mo laras ga epovo at legesa sangaun kobot mi legepu sangaun (120) lababaalom teren ukopok; melemu xakalik diga soxovo manga i la diga long lenger i do ga vasik sangaun lababaalom teren ukopok. 29 Diga marat aleng mila lavattaaxup naba ebaa ro at laxanuat; kuren la diga lox asu lavanuet lemparaga ro melemu at lavattaaxup la maga sing kusu laxangking na losu.

30 Luvuttadi loklok tatao ap mo lavattaaxup diga lok do dina sixiro basinge lavattaaxup; diga lox asi lesepang kakalik uto xopok at laras la diga lok poovo i do dina lok li laxanaga ro melamgo ap mo lavattaaxup. 31 Ketla ne Pol ga lok ti laasesep eburu mi limixin esep keretna, “Mo do na luvuttadi loklok tatao di noxo nemen de vana at lavattaaxup, nemi xopmen mi noxo roo suu.” 32 Kuren la limixin esep diga ra korop luxua no gang tanga mo lesepang lixilik la ni ga sen su basinge di la uto nga.

33 Laxangking mo ga lok do na losu nga, la ne Pol ga sing nedi axap kusu dina an tempanga anan. “Migak lok bukbulu la miga nemen gamasa at lasangaun mi lavanuet aleng ta, la at na axap levenaleng mi goxo anan tempanga anan. 34 A sing nimi, do monga mina an tempanga anan; mik pakes tin kusu kopmen tara atnimi noxo met la kopmen tara atnimi noxo seeve.” 35 Melemu at na lavapaase ren, Pol ga lok ka lengkongkide, la ga tong avukat ti ne Moroa ro melamgo atnedi axap, la ga sebex i la ni ga an kaxat. 36 Diga lok ka lolos at levelinga at ne Pol, la nedi getgesara bok diga an bok lempanga anan. 37 Leexes atnama ga epovo at legepu sangaun kobot mi lavanuti sangaun mi lavanna (276) mo maga nemen go vana at lavattaaxup. 38 Melemu atnedi diga an mais, diga lu asu mi laxampiao uto xopok ti laras kusu lavattaaxup naba balalak.

39 Laxangking ga losu la luvuttadi loklok tatao ap mo lavattaaxup di goxo ven kibis mo losoxan. Ketla diga ven lara losoolom mi laxangkaneng teren la diga doxoma i do, mo i epovo, diba sen oso mi lavattaaxup atdi uto at laxangkaneng.

40 Kuren la diga ra korop asu lemparaga la diga ke nedi diga dong si ukopok at laras; la ap mo mene loxonaleng diga soxomus lara kua no diga xoxo alis mo lisitia min. Diga lox aurut labantamon to melamgo at lavattaaxup kusu lamanman naba mas aonon lavattaaxup, la na sen epopolo uto loxon. 41 Ketla lavattaaxup ga so ru ro mavana at laxangkaneng, la ga xis tino nga, no melamgo at lavattaaxup ga ebaa la goxo epovo ri sen bilong uto melemu la lara paxanao ga saava vovorok axakalik mo lavattaaxup.

42 Limixin esep diga lok lodoxoma xusu ri sev amet luvuttadi xokoxo, kusu di noxo box oso uto loxon la dina sixiro. 43 Ketla laasesep ga vara i xusu na lox arooro ne Pol, kuren la ni ga vaase vepe di do nemen di guta lox i mo. Ni ga tong i rinedi digakleklen ti xobok kusu dina los su boro at lavattaaxup la ukopok la dina bok oso uto loxon. 44 La nedi di goxo epovo ri xobok, diba mumu mi lengkonuna ga tepovorok ap mo lavattaaxup. La kerepmo nema axap maga rupot avukat to loxon.

Copyright information for `MMX