Acts 4

Pita Mi Ne Jon Duga Ru At Lavapaase

Pita mi ne Jon move duga paase ri limixin la ap mo loxonaleng lavamaasa, mi laradi esep ga lok tatao loogu laplavang, la lubung Sadiusi diga vot pasa du. Diga musak mila nedu duga tong i ri limixin do ne Iesu mo ga roo xat amlong pam basinge lanmet, ti lox asuusu i do limixin di met, dinaba roo xat amlong bok. Kuren la diga ranga alis du, la diga lok li du at loogu xokoxo se ap mo laaleng melemu, mila laxangking mo ga lok do na lotup ta. Ketla buaang atnedi diga ronga i mo lavapaase at ne Pita, diga nuunu; la lexekexes atnedi limixin nuunu ga urut ti lavalimo larabin sangsangaun kobot. (5000)

Ap mo laaleng melemu luvuttadi amgomgo at lubungmixin me Judaia, loxongkulao silok mi luvuttadi loklox ase at Lenavolo diga rupot to Jerusalem. Diga rupot eburu mi ne Anas neni lamgomgo at lubungmaasa, la ne Kaiapas, ne Jon, ne Aleksanda la nedi bok lentaba at libibinat at ne Anas. Diga vaxaru ne Pita mi ne Jon to melamgo atdi la diga sue du, “Lolos atnege nemu mu ruuna ka i xusu muna lox i na? La laasen atnege nemu mu gugu min?”

Pita ga umsu mi Loroonan Kaala la ni ga lok tidi, “Luvuttadi amgomgo at limixin, la nemi loxongkulao silok; mi sue nama lingina ri lempanga avukat mata lox i ri na laradi, luxangkedek teren ga molo, la kereva neni i lox avukat. 10 Minaklen i la limixin axap bok me Israel minaklen i do na laradi na i tu melamgo atnimi, ni ita lox avukat at lolos at laasen at ne Iesu Karisito me Nasaret, no nemi miga vaxarem i at laxaba. Ketla ne Moroa ga lox axatu amlong i basinge lanmet. 11 Iesu neni laradi Lovoang Kaala ga paase mumu i xeretna,

‘Mo luat nemi luvuttadi xipkip gu miga sok tixirixes kepe i, na nga neni i ngan lamgomgo ri levenuat axap.’ a 

12 Keneng mun at laasen teren nedik ataba lok ka lorooro avolo; mila kopmen bok ba teta at na lavatbung menemen kopok, laasen teren ne Moroa ga raba limixin min kusu nedik ataba rooro mu i.”

13 Luvuttadi amgomgo diga sangu aleng at ne Pita mi ne Jon duga paase lolos la kopmen du goxo marat; diga ven kibis box i do nedu dugat pas amisik eburu mi ne Iesu; la nedu luradi gamasa mun, la kopmen du goxok lok at toloklox ase. 14 Di goxo vorang tempanga mila diga ven mo laradi no duga lox avukar i mo ga tu eburu mi ne Pita la ne Jon. 15 Kuren la diga tong i ridu kusu duna vas su basinge mo loxot tongtonga linga; la diga epaase mumu mo lavanga kantubu atdi. 16 Diga esue xeretna, “Ataba lok lavanga salai ridu na luradi? Limixin axap na di nemen de Jerusalem diaklen pam na lavanga sangsangu nedu na luradi duta lox i, la nedik kopmen ta epovo bok ba do ataba tong i do du toxo lox i. 17 Ketla ata ru pe na lavanga xusu noxo epeseves kantubu at limixin; ata tong i ridu do nemen bok ba duta vaase asu mo laasen ti tara.”

18 La diga ro abeles du ukeneng la diga tong alolos i ridu do nedu noxo tong bok ba mo laasen at ne Iesu la du noxo anasa mi mo laasen teren.

19 Ketla ne Pita mi ne Jon duga vorang i ridi keretna, “Nemi xa mina doxoma mumu i na, do ua i lox avukat at lemeren ne Moroa; mana ronga res atnimi xopla mana ronga res at ne Moroa. 20 Kuren la nema ma noxo xap ti vaase asu mo lempanga nema maga ven i la maga ronga i.”

21 Luvuttadi amgomgo diga vaase lolos aleng tidu, la melemu diga soxomus asu du. Di goxo epovo do dina sev amarat du; mila buaang limixin diga emi asu mi ne Moroa ri mo lavanga sangsangu ga rupot kantubu atdi. 22 Mo laradi duga lok mo lavanga sangsangu rin, levenmaares teren ga volo lavanuet sangaun.

Lisingising At Luvuttadi Nuunu

23 Melemu at losoksoxomus asu atdu, Pita mi ne Jon dugamlong saparap lentaba atdu, la duga tong mo levelinga, lavamaasa silok mi loxongkulao silok diga tong i. 24 Diga ronga i mo, la diga lok legesa doxoma mi lisingising saparap ne Moroa, diga lok keretna, “Leeme Silok, nenu luruntudum li at laxalibet, lavatbung menemen, laras la lempanga axap mo di rooro xeneng teren. 25 Uga vaase asu na levelinga mi Loroonan Kaala at lungusno at ne Devit, lurubuno nama. Neni lasaxaruki ram, ni ga lok,

‘Tila ba limixin kopmen me Judaia di musak; tila limixin di gagas ti esep eburu mi ne Moroa? Mo lodoxoma atdi ba xap kot.
26 Lavaorong silok at na lavatkangka di gagas li nedi la lavaeme silok bok di tupot eburu amisik kusu dina esep eburu mi ne Moroa la Lanarong teren.’ b 

27 Kerepmo ne Erodes mi ne Pontias Paelat diga rupot eburu at na lemenemen silok eburu minedi limixin me Judaia la limixin kopmen di me Judaia; kusu dina lox abulubun kepe ne Iesu, neni lasaxaruki dadat taram, mo nu ga lok li i do Lanarong. 28 Diga rupot buru ri lok lempanga no nenu ugara gagas li vam i mi lolos taram la lodoxoma ram do naba vot. 29 Monga Leeme Silok, u ronga vam mo levelinga lolos di tong i; la una lox abelemes nema lavasaxaruki ram kusu mana vaase asu Lagale Lavavang. 30 Una song asu mi lakngam ti lox aroo levenanmeres la una lok bok tempanga sangsangu xeneng at laasen at lasaxaruki dadat taram, ne Iesu.”

31 Melemu at lisingising atdi, mo loxot nedi diga vot eburu ren gang nengne. Diga umsu mi lolos at Loroonan Kaala la diga vaxaru ka i xusu dina paase asu levelinga at ne Moroa la kopmen bok ba teanmarat.

Luvuttadi Nuunu Diga Epes Lempanga Kantubu Atdi

32 Mo luvuttadi nuunu diga nemen mun keneng at legeso doxoma la legese belen. Kopmen teta atnedi ga lok do mo lempanga ren, ateren axa; ketla diga epes di getgesara mi lempanga axap diga ruuna i. 33 Luvuttadi vavang diga ruuna ka lolos la diga paase asu Lagale Lavavang at laxakatu kaxat amlong at Leeme Silok ne Iesu. La ne Moroa ga suxa umsu di mi leveloklox anarong. 34 Kopmen teta xantubu atdi gat kis pakpakes. Lentaba diga ruuna lengkongkangka la lentaba diga ruuna laraugu, diga sesep min la diga lok kaka levempilas at nom, 35 la diga raba luvuttadi vavang min; la mo levempilas diga epes ba i xantubu atnedi ga epovo at lavakpakes atnedi getgesara.

36 La ne Josep neni at libibinat at ne Levi, neni boro Saipras, mo luvuttadi vavang diga tong box i do Banabas (Lavasuun at laasen Banabas do, “Laradi loklox alolos.”) 37 Neni ga sesep mi loxongkangka ren, ga lok ka levempilas, la ga song araba luvuttadi vavang min.

Copyright information for `MMX