Acts 5

Ananias Mi Ne Sapira

Ketla lara laradi laasen teren ne Ananias eburu mi latkin teren ne Sapira. Ni ga sesep mi loxongkangka atdu, ketla ni ga ranga alis lenep unun ap mo levempilas do tin; latkin teren gakleklen i, la ni ga raba lenep uto ri luvuttadi vavang.

Pita ga lok tin, “Ananias, tila u siam abeles ne Satan ia umsu at lodoxoma ram? La ia lok u, ura xarang Loroonan Kaala, la ura ranga alis bok lenep pilas ap mo luunun uga lok ka i ap mo loxongkangka. Avot nu goxovisi sesep min, ga taram axa; la melemu nu ga sesep min, levempilas bok ataram. Tila ba nenu u doxoma i do una lok na loklok? Nu xopmen una xarang limixin, nenu u xarang ne Moroa!”

Ananias ga ronga i na la ga subu si ukopok la ga met; la nedi axap diga ronga i na, la diga marat aleng. La luvuraau maxat diga beles ukeneng la diga bom labantuxu ren, diga xip asu i ukamang la digak mir i.

Melemu lixilik latkin teren ga vubeles, ketla ni goxoklen i do latlok teren ga met pam. Pita ga lok tin, “Una tong i ria; kereva nai luunun axap nemu mi latlok taram muga ranga ka i ap mo loxongkangka?”

La ni ga siam la ga lok, “I ruturun, luunun axap.”

La ne Pita ga lok tin, “Tila nemu mi latlok taram mu doma i do muna lok tong pen Loroonan Kaala at Leeme Silok? Limixin no dik mit latlok taram no di tu at lumusaragu mo nga, la diba xip kaka box u ukamang.”

10 Ap mo mene loxonaleng ni ga subu saparap luxangkedek at ne Pita la ni ga met ta. Mo luvuraau diga beles ukeneng la diga ven i do latkin mo ga met, diga xip kaka i ukamang la digak mir i saparap latlok teren. 11 Langsangan lanmarat ga ravasu xantubu atnedi axap limixin nuunu la nedi bok mo diga ronga mo lavanga.

Luvuttadi Vavang Diga Lok Lempanga Sangsangu

12 Buaang lempanga sangsangu Leeme Silok ga lox i at levengkikngen di luvuttadi vavang teren kusu dina lox i xantubu at limixin. Nedi axap mo luvuttadi nuunu digat pot eburu amisik ngan loxonbinam tadi to at loxot laasen teren ‘Loxot at ne Solomon.’ 13 Mo limixin kopmen tunuunu atdi diga marat tik lox eburu minedi, keke i do buaang limixin diga lok ngangao aleng atdi. 14 Ketla buaang nedi limixin, lavatlok mi lavakin diga lok kaka lunuunu at Leeme Silok la diga beles at loxonbinam atdi. 15 Kuren la limixin diga lok kaka luvuttadi mekmeres mi levenora atdi uto at levengkonngas kusu do, ne Pita na vas polo, mo lamamau at lovoovo ren naba lok pavaa di. 16 La buaang nedi limixin diga vas kaxat boro at leven menemen saparap Jerusalem, diga lok kaka levenanmeres atdi, la nedi bok lubunggas ga suxuna nedi; la nedi axap diga lok avukat.

Luvuttadi Vavang Diga Xip Levesongsongot

17 Ketla lamaasa gomgo at lavamaasa ga xatu kaxat eburu minedi limixin teren; mo limixin diga tong nedi do lubung Sadiusi, diga umsu mi levereven peves ti luvuttadi vavang. 18 Diga ranga alis ka luvuttadi vavang la diga lok li nedi at loogu xokoxo. 19 Ap mo laxanimin laangelo at ne Moroa ga suang lumusaragu ap mo loogu xokoxo la ni ga sat asu di ukamang la ga lok tidi, 20 “Uto nimi at loogu laplavang la mina tong asu Lagale Lavavang mumu lorooro maxat.”

21 Luvuttadi vavang diga ronga res la ga maxantamak suubu diga beles to at loogu laplavang la diga vaxaru ka i xusu dina anasa limixin.

Lamaasa gomgo eburu mi limixin teren, diga ro bubua ka lubung amgomgo at lubungmixin me Judaia kusu nedi axap dina lok lavapaase silok; la diga lox aonon levelinga uto at loogu xokoxo xusu dina lok taba nedi mi luvuttadi vavang.
22 Ketla at loxonaleng diga rupot di goxo ven luvuttadi vavang to at loogu xokoxo; kuren la digamlong uto at luvuttadi amgomgo xusu dina tong axasep nedi min. 23 Diga lok keretna, “At loxonaleng ma rupot to at loogu xokoxo, ma ven i do i tu pipe rinotno, la nedi mo luvuttadi rutu mu mo bok di tu at lumusaragu; la ma suang mo lumusaragu la nema maxo ven tara go xeneng.” 24 La mo lavamaasa silok la laradi gomgo at luvuttadi rutu mu diga ronga i na la diga rangku do lai mo ga rupot saparap mo luvuttadi vavang.

25 La lara laradi ga rupot la ga lok tidi, “Mina ronga i na. Luvuttadi mita lok li di itinongo ro at loogu xokoxo no di tu at loogu laplavang la dia anasa limixin.” 26 Kuren la laradi gomgo ga vas kaxat eburu mi luvuttadi rutu mu la diga lam ka amlong luvuttadi vavang. Kopmen di goxo sep nedi mila diga marat do limixin dina lu amet di mi laxanuat.

27 Nedi diga lam kaka luvuttadi vavang ukeneng, la diga vaxaru nedi ro melamgo at luvuttadi amgomgo at loxot tongtonga linga; la lamaasa gomgo ga lok tinedi xeretna, 28 “Maga raba nemi mi levelinga lolos do nemen gat nemi mita anasa mi mo laasen at ne Iesu; ketla ming tonga xepe i. Mira vaase asu vam nom levenanasa at lengkot axap de xeneng Jerusalem, la nemi mi lox i xuren kusu do nema maba xip tutu mi lanmet teren.”

29 Pita eburu minedi luvuttadi vavang diga vorang i ridi xeretna, “Mana ronga res kusuk mun at ne Moroa la ma noxo ronga res at limixin mun. 30 Moroa, neni lomoroa at lavalabat atnedik, neni ga lox axatu ne Iesu basinge lanmet, melemu atnemi miga vaxarem i ro at laxaba. 31 Moroa ga xiv aurur i upana la ga vaxaxis i ro at lekngen tino mila neni lamgomgo la Laradi Loklox Arooro xusu na raba limixin me Israel mi langas ti leeng basinge laxakapmek atdi la ne Moroa naba doxoma xepe i. 32 Nema na ma vaase asu na levelinga; Loroonan Kaala bok i vaase asu i, neni nom laramtaba ne Moroa ga raba i rinedi ding tonga res at levelinga ren.”

33 Diga ronga i mo la diga musak aleng, la diga lok do dina sev amet di. 34 Ketla lara atdi, neni la Parisi laasen teren ne Gamaliel; neni laradi loklox ase at Lenavolo la limixin axap diga lok ngangao aleng teren. Ni ga xatu kaxat kantubu at luvuttadi amgomgo la neni ga sing nedi xusu dina riki asu be mo luvuttadi vavang ukamang at toxonaleng mutmut mun. 35 La neni ga lok tinedi luvuttadi amgomgo xeretna, “Leme Israel, mina doxoma avukat mumu lavanga salai mi lok do mina lox i ridi na. 36 Gano ne Tiudas ga vot, ga lok do neni mo i silok aleng; la mo limixin diga mumu asu i ga epovo at lavanuet sangaun kobot (400). Ketla neni ga uu la mo limixin teren diga epeseves la mo lugugu atdi ga met gamasa nga.

37 Melemu at na, ne Judas boro Galili ga rupot ap mo levenaleng at loklok ka asen; neni bok ga sat ka buaang limixin saparav i; ketla neni bok ga uu la mo limixin diga mumu asu i, diga epeseves. 38 Kuren la at na lempanga nanga, nia ana tong asu i rinimi; nemen mita sev amet di. Mina ke mulus di xuren; mila do na lugugu di lox i mi lodoxoma axa atdi, to gira xap pam. 39 Ketla do lugugu atdi boro vana at ne Moroa, nemi xopmen mina epovo xusu minaba ru pe i. Miba ven i do nemi mi esep mi ne Moroa!”

40 Luvuttadi amgomgo diga mu asu na lavapaase at ne Gamaliel. Diga ro abeles luvuttadi vavang ukeneng, la digak pixis nedi; la diga tong alolos i ridi do nemen gat nedi ta tong asu laasen at ne Iesu; la diga soxomus asu di.

41 Luvuttadi vavang diga vas kaxat basinge luvuttadi amgomgo, diga umsu mi lomomo mila ne Moroa ga siam do diga epovo rip kip lainmangan at laasen at ne Iesu. 42 La at levenaleng axap to xeneng at loogu laplavang la to at leventaugu at limixin, diga anasa la diga vavang mi Lagale Lavavang at ne Iesu, neni Lanarong.

Copyright information for `MMX