Acts 6

Lavanuti Radi Ri Lok Tooro Luvuttadi Vavang

Ap mo levenaleng leexes at luvuttadi nuunu ga uturut amisik upana; la leedak ga ravasu xantubu atnedi limixin me Judaia mo diga paase Grik la nedi limixin me Judaia diga paase Judaia. Limixin mo diga paase Grik, diga lok do lempat naa atdi, di goxop kip ka epovo levempanga loklok tooro ridi at levenaleng axap. Kuren la nedi na lasangaun mi legepura luvuttadi vavang diga ro bubua ka nedi axap luvuttadi loklok ka anasa la diga lok, “Kopmen nak mokso rinama xusu mana ke xepe na Lagale Lavavang at ne Moroa la mana raba panga nimi. Luvutnetak mi luvurinuk, mina soxolik ka tavanuti tuvuttadi xantubu atnemi xa, mo nemi mikleklen di do di umsu mi Loroonan Kaala la lodoxoma avukat; la nema maba lok li di, kusu dina lok tatao na lugugu, La nema xa maba raba lorooro axap atnema ri lugugu at lisingising la lugugu at lavapaase asu Lagale Lavavang.”

Nedi axap diga lok momo ap mo levelinga at luvuttadi vavang; kuren la diga soxolik ka ne Stiven, laradi ga umsu mi lunuunu la Loroonan Kaala; la ne Pilip, Porokaras, Nakano, Timon, Pamenas; la ne Nikolaus neni boro Antiok, la goxopmen neni laradi me Judaia, ketla neni gam tebeng lunuunu ngan leme Judaia. Nedi na diga raba nedi ri luvuttadi vavang la diga lok lising la diga lok li levengkikngen di ro mavana atdi, kusu dina lox anarong di.

La levelinga at ne Moroa ga epeseves. Leexes at limixin nuunu ro Jerusalem ga uturut amisik mene la buaang atnedi lavamaasa diga lok kaka lunuunu maxat ap mo Lagale Lavavang.

Luvuttadi Amgomgo Diga Xoxo Ka Ne Stiven

Stiven neni laradi ga umsu mi letaba nabalamu at ne Moroa; la ni ga umsu bok mi lolos la ga lok lempanga sangsangu kantubu at limixin. Ketla lentaba luvuttadi di goxopara rin, nedi luvuttadi boro at lumenemen Sairini la Aleksandria; diga lotu at lara loogu singising, laasen teren, ‘Loogu Singising at Luvuttadi Sepsen.’ La lentaba limixin bok me Judaia boro Silisia la Asia di goxopara ne Stiven; nedi axap eburu mi ne Stiven diga etep mi levelinga. 10 Ketla Loroonan Kaala ga raba ne Stiven mi lakleklen silok; kuren la ni ga vaase mi lolos la di goxo epovo xusu dina vorang i.

11 La diga lok li lentaba xusu dina bala raba i, diga lok keretna, “Nema maga ronga ne Stiven, neni ga paase vupu ri ne Moses la ne Moroa.”

12 Kerepmo diga lox axatu lodoxoma at limixin, loxongkulao silok la luvuttadi loklox ase at Lenavolo. Diga vosiga ne Stiven, la diga ranga alis i; la diga lam kaka i uto melamgo at luvuttadi amgomgo. 13 La diga lox abeles lentaba luvuttadi xusu ti xarang taba i. Diga lok, “Na laradi i paase vupu ri na loogu laplavang at ne Moroa la Lenavolo at ne Moses. 14 Maga ronga i do ga lok do ne Iesu me Nasaret ba ut asi na loogu laplavang la naba ba gili bok leretere ne Moses ga raba avolo dik min.”

15 Nedi axap digat kis go, diga ven tooro ne Stiven la diga ven lemeren ga ngan ta lemeren at laangelo at ne Moroa.

Copyright information for `MMX