aAis 53:7-8

Acts 8

Sol Ga Lox Asongot Limixin Nuunu

La ne Sol ga mulus ap mo laniu at ne Stiven.

Ap mo mun laaleng luvuttadi nuunu ro Jerusalem diga vaxaru ka i xusu dina suma ka laxasongsongot silok. Luvuttadi nuunu diga epeseves at lengkot axap Judaia la Samaria, ketla luvuttadi vavang diga nemen to Jerusalem.
Ket lentaba luvuttadi diga lotu saparap ne Moroa digak mit ne Stiven, diga saxaanu ren. Ketla ne Sol ga lok tong pen i do na sev amet limixin axap diga nuunu. La limixin esep digat pas uto at laraugu atnedi xusu dina ranga alis ka di, lavatlok eburu mi lavakin, la diga lok li di at loogu xokoxo.

Pilip Ga Vavang To Samaria

Luvuttadi nuunu no diga epeseves, digat pas ti lengkot axap, la diga vavang mi Lagale Lavavang. Pilip gat pas uto at lara lemenemen at lenep Samaria la ni ga vavang mi Lagale Lavavang at Lanarong tinedi limixin me go. Buaang limixin diga ru pilo la diga ronga avukat mo levelinga at ne Pilip. Digang tonga i mo la diga ven bok lempanga sangsangu neni ga lox i. Laxan gas diga ravasu basinge buaang limixin mi langsangan lerengteng; buaang atnedi limixin mo lengkot atnedi ga molo la nedi bok lentaba di goxo epovo rit pas, diga lox avukat. Kuren la langsangan lomomo ga rupot saparap limixin ap mo lemenemen.

Keneng ap mo lemenemen lara laradi laasen teren ne Simon; neni at leventaba levenaleng neni gak lox arakdu limixin me Samaria mi mo lempanga sangsangu ren. Ni ga lok do neni mo i silok tinotno. 10 La buaang nedi ap mo lemenemen, nedi limixin gamasa la nedi lentaba silok diga lok ngangao aleng teren. Diga lok, “Neni nom lara i ruuna lolos at ne Moroa la lolos teren i silok.” 11 At levenaleng buaang neni gak lox arakdu nedi mi mo lempanga sangsangu ren; kuren la diga mumu asu levelinga ren. 12 La nedi diga nuunu at lavapaase at ne Pilip mumu Lagale Lavavang at Linintoo at ne Moroa la at laasen at ne Iesu me Nasaret, Pilip ga sep susu di, lavatlok la lavakin bok. 13 Simon bok neni ga nuunu, la melemu at lesep susu ren ni ga nemen auret ne Pilip, la ni ga rakdu aleng at lempanga sangsangu ni ga ven ne Pilip gak lox i.

14 Luvuttadi vavang to Jerusalem diga ronga i do limixin to Samaria diga nuunu at levelinga at ne Moroa; kuren la diga riki ne Pita mi ne Jon saparap nedi. 15 Duga rupot la duga sing ne Moroa xusu nedi bok diba lok ka Loroonan Kaala. 16 Loroonan Kaala goxovisi vubeles at tara atdi, diga lok kaka mene lesep susu at laasen at ne Iesu neni Leeme Silok. 17 La ne Pita mi ne Jon duga lok li levengkikngen du at lempatlak atdi, la nedi diga lok ka Loroonan Kaala.

18 Simon ga ven i do ne Moroa ga suxa nedi mi Loroonan Kaala ap mo loxonaleng ne Pita mi ne Jon duga lok li levengkikngen du at lempatlak atdi. La ni ga lok do na raba ne Pita mi ne Jon mi levempilas 19 la ni ga lok, “Muna raba ia mi nom lololos, kusu do nia ana lok li lukngak at tara, ni ba umsu mi Loroonan Kaala.”

20 Ketla ne Pita ga vorang i rin, “Nenu eburu mi lempilas taram mi bat pas uto at lemenemen songsongot mila nu u doxoma i do nenu mo una un ka laramtaba at ne Moroa mi lempilas! 21 Nenu xopmen tekot taram at na lugugu atnama; mila labalam kopmen nak mokso at lemeren at ne Moroa. 22 Una lox ekun lorooro ram la una sing saparap Leeme Silok, kusu neni ba doxoma xepe na laxakapmek ik lok at labalam. 23 Nia a ven i do nenu u umsu mi levereven peves, la lorooro ram i umsu mi laxakapmek la kopmen na epovo xusu una sixiro basinge i.”

24 La ne Simon ga lok ti ne Pita mi ne Jon, “A vara i do muna sing ti Leeme Silok, kusu kopmen tara at na lempanga mu tong pam i, naba rupot saparav ia.”

25 Melemu at lavapaase asu atnedu la levelinga at Leeme Silok, Pita mi ne Jon duga vas bilong uto Jerusalem. Ap mo lomlong atnedu duga vavang mi Lagale Lavavang to at laxanmenemen solo mego Samaria.

Pilip Eburu Mi Leeme Gomgo Boro Itiopia

26 Laangelo at ne Moroa ga vaase ri ne Pilip keretna, “Una lok agagas li u la una vas kaxat uto at langa i laa boro Jerusalem la uto Gasa.” (Na langa kopmen bok ba dinat pas teren). 27 La ne Pilip ga gagas la ga vas kaxat. La lara laradi boro Itiopia, neni leeme silok la ni ga lok tatao lempilas at latkin gomgo ne Kades boro Itiopia. Ni gat pas uto Jerusalem kusu naplavang saparap ne Moroa, la ni ga vas bilong mi lavatkaris teren. 28 Ni gat kis la ni ga utus at lubuk at leeme vapaase alii ne Aisaia. 29 Loroonan Kaala ga tong i ri ne Pilip, “Una vas tangarang mo lavatkaris la unat pas saparav i.”

30 Pilip ga sixit soso mun uto at lavatkaris la ni ga ronga mo laradi ga utus lubuk at leeme vapaase alii ne Aisaia; la ni ga sue i, “Uklen lai mo nu u utus i?”

31 Mo laradi ga vorang i rin, “Nia abaklen i xereva? Kopmen tara vetpes kusu naba tong axasev ia min.” La ni ga sing ne Pilip do na eng urut la na xis to at lavatkaris eburu min.

32 Mo levelinga at ne Moroa xeneng ap mo lubuk ni ga utus i, ga lok keretna,

‘Neni ga lok ngan ta lisipsip no diga lok ka i xusu dina sev i; neni ga lok ngan lisipsip maxat no xopmen nak lok gusugus do di sep korop levengkabinim teren, ni goxo tong tekolinga.
33 Neni ga lox alixilix i la ni goxo vorang i mi tekolinga. Kopmen teta noxo lox epovo do na paase mumu livipisik teren, mila lorooro ren nade at lavatbung menemen ira vot pam at laxavaxap teren.’ a 

34 Mo leeme silok ga lok ti ne Pilip, “Tong i ria, do nege mo na leeme vapaase alii ga paase mu i? Tin kopla ti tara vetpes?” 35 Pilip ga vaase rin, ga vaxaru ka i ap mo loxot, neni ga utus i, neni ga tong Lagale Lavavang at ne Iesu rin.

36 Nedu dugat pas ap mo langa la duga rupot to at lara loxot ladan ga nemen teren. La mo laradi gomgo ga lok, “Ladan na ik lok. Lai mo ik lok pe ia do ana lok kaka lesep susu?” 37 [Pilip ga lok tin, “Nenu u epovo do una lok ka lesep susu, mo do u nuunu ruturun mi lorooro axap taram.” Ni ga vorang i rin, “A nuunu do Iesu Karisito neni Nitna ne Moroa.”] 38 Mo leeme silok ga lox alis mo lavatkaris la lakaris ga ru; la Pilip eburu mi mo laradi duga vas si uto xopok at ladan la diga ru ro xeneng teren, la ne Pilip ga sep susu i. 39 Diga vas su boro at ladan la Loroonan Kaala at ne Moroa ga lok ka ne Pilip uto vetpes. La mo laradi goxo ven bok ba i, ketla ni gat pas epolo mun at langa, la ga umsu mi lomomo. 40 Pilip ga ven kibis i do ni mo ga nemen ta ro Asotas, la ni ga vas kaxat la gat pas kantubu ap mo levenmenemen, la ni ga vavang mi Lagale Lavavang se neni ga rupot to Sisaria.

Copyright information for `MMX