Ephesians 3

Pol Ga Ruuna Lugugu Ti Paase Asu Lagale Lavavang

Nenia ne Pol, a ruuna mo lugugu ti lox axis nemi, limixin kopmen nemi me Judaia eburu mi ne Iesu Karisito, la ni lavasuun bok teren la nenia ak lok de at loxokoxo.

Nia a doxoma i dola nemi miga ronga vam i do ne Moroa ga raba ia mi lugugu ti paase asu mo levelinga mumu letaba nabalamu ren tinimi. Mo levelinga ganoxa ga nemen lipe, ni ne Moroa ga lox asuvos i ria, la nia aga malagan i rinimi at lovoang mutmut gano. La mo dola nemi mina us i, miba xasep at lodoxoma rak mumu mo levelinga lipe at ne Karisito. At levenaleng axap gano, Moroa xopmen goxo lox asuvos mo levelinga lipe tinedi lavaola. Ketla na mun Loroonan Kaala at ne Moroa ga lox asuvos i rinema luvuttadi vavang eburu mi lavaeme vapaase alii ren ngan nema lavaanat soxolik at ne Moroa. Mo levelinga lipe i lok keretna. At Lagale Lavavang limixin kopmen di me Judaia di epovo na lok kaka leveloklox anarong at ne Moroa kerekngan limixin me Judaia; la nedi legepu bungmixin diba lok ngan lengkot at legesa bantuxu mun la nedi eburu diba lok kaka mo lempanga ne Moroa ga vaase alii i rinedi di nuunu at ne Iesu Karisito.

Moroa ga lok li ia ngan lasaxaruki ren ti paase asu Lagale Lavavang; na lugugu i ngan letaba nabalamu ria, mo ga ravasu at lololos teren, la i lox alolos ia at na lugugu. Nenia laradi lixilik tinedi axap limixin at ne Moroa, ketla neni ga lox asu letaba nabalamu ren tia kusu nenia ana vavang mi ne Karisito, ni i lok ngan lapnovos i silok aleng la kopmen tara i epovo na vuse ka tempanga silok kerekngan neni. La a vavang ti limixin kopmen di me Judaia, kusu nedi eburu mi limixin axap diba xasep ap mo levelinga lipe, ni mo levelinga ne Moroa ga raba ia min kusu ana tong asu i. Nom levelinga Moroa ga lipe i gano la ga nemen kuren at laxanmaares buaang, ga ru ka i at levenaleng ne Moroa ga rudum li lempanga axap. 10 Lavavara ren ga lok keretna, neni na lox asuvos lagale lodoxoma ren la mo nga limixin lotu dinap kip ka mo lugugu ti lox asuusu mo lodoxoma ren ti lubung angelo la leventoonan to vana at laxalibet. 11 Nom lodoxoma ren i epovo mi lodomdoma alii avolo ren, neni ga lox epovo i mi lugugu at ne Iesu Karisito, Leeme Silok atnedik. 12 Maxeneng teren nedik ta epovo na vosiga ne Moroa, kopmen tavanga i ru pe dik la kopmen tainmarat, mo do dik ta nuunu at ne Iesu Karisito. 13 Kuren la nia a sing nimi do mina lolos la nemen mita subu kot kantubu at lunuunu atnimi mumu levesongsongot nia ap kiv i. Na levesongsongot ga vot mila agak lok tooro nimi, ketla mina lok momo mun maxeneng teren.

Lisingising At Ne Pol Ti Limixin Me Epesas

14 Do nenia a doxoma na lodomdoma alii ren, nia a xis tintiding to melamgo at ne Tamak. 15 Neni i so asen limixin teren mi laasen loklox avolo ren, nedi boro vana at laxalibet la nedi bok at na lavatbung menemen, nedik axap di lok ngan legesa bungmixin. 16 Nenia a sing ne Moroa do maxeneng at langsangan lapnovos teren, neni naba lox alolos lorooro axap atnimi mi lololos boro at Loroonan Kaala. 17 La at lunuunu atnemi, ne Karisito naba nemen to at lebelen nimi. La a sing ne Moroa do mina umsu mi labalamu kusu lunuunu atnimi na tu lolos, kerekngan levenixe at luuna ing tanga alis laxangka la luuna ira tu lolos; 18 la mina umsu mi lolos eburu minedi limixin at ne Moroa kusu miba xasep do labalamu at ne Karisito i babaalom, ip teplas, i urut, la i si aleng tino, 19 la miba xasep do nom labalamu ren i silok polo lakleklen at limixin la kerepmo miba umsu mi leveloklox avukat axap at ne Moroa xa.

20 Ata emi asu mi ne Moroa, i epovo na lok laxampanga solo, mo i volo axap mo lempanga nedik di ngising tin la di doxoma i, la mo levempanga i ravasu at lololos teren, mo i gugu xeneng at lorooro atdik. 21 La limixin lotu dinap kip aurut laasen at ne Moroa to at lotu, la keneng at laasen at ne Iesu Karisito, la lavaola move i tu umelamgo dinap kip aurut laasen teren amisik la kopmen taxavaxap teren. I ruturun.

Copyright information for `MMX