Ephesians 4

Nedik Limixin Nuunu I Ngan Labantuxu At Ne Iesu

Nenia ak lok at loxokoxo mumu lugugu at Leeme Silok. Kuren la nia a sing nimi do lorooro atnimi naba lok nunuan axap, i epovo mi lorotoro at ne Moroa tinimi la i epovo mi lavavara at ne Moroa. Lorooro axap atnimi na umsu mi langsangan loklok ngangao la loklox anare; mina nemen mulus mene la mina lox asuusu labalamu rinedi di lok laxakapmek. La mina lolos kusu mina tu buru mi legesa doxoma at Loroonan Kaala, la lorooro atnimi nat kis atnaasan mi limila. Legesa bantuxu mene nga la legesa Roonan Kaala, kerekngan mun ne Moroa gara ro xaka vam nimi ti legesa doxoma voovo, la leges Eme Silok, legesa nuunu la legesa sep susu; legesa Moroa la neni ne Temen nedik axap. Neni lamgomgo at limixin axap teren, ni ik lok at lengkot axap la i nemen keneng atnedik limixin axap teren.

Karisito ga lox epes letaba nabalamu ren tinedik getgesara. I ngan Lovoang Kaala i tong i,

“Ap mo laaleng ni gat pas uto vana at laxalibet, ni ga emu ka buaang limixin kokoxo eburu min, la ni ga raba levenasen tamtaba ri limixin teren.” a 

Anai, i tong i do neni gat pas uto vana at laxalibet, kuren la avot ti nom neni ga si ukopok ti na lavatbung menemen. 10 Neni ga si ukopok, la melemu gat pas uto mavana xa at laxalibet kusu laasen teren na epeseves ti lengkot axap. 11 Neni vam ga raba leventamtaba ri limixin teren. Ni ga soxolik ka lentaba ri gugu ngan luvuttadi vavang la lentaba ri gugu ngan luvuttadi vapaase alii. Lentaba diga lok ka lugugu ngan luvuttadi vapaase asu levelinga at ne Moroa, la lentaba ri gugu ngan luvuttadi loklok tatao lotu la lentaba ti lox ase limixin mi levelinga at ne Moroa. 12 Karisito ga raba leventamtaba kerepmo ri lox agagas limixin teren ti lok lugugu ren kusu diba epovo na elok tooro ela la dina lox alolos labantuxu at ne Karisito. 13 La na loklok ba gugu xeneng nedik axap se taba lok ngan legesara rinotno at lunuunu saparap ne Nitna ne Moroa la taba ruuna ka nom lakleklen mumu ne Nitna ne Moroa. Kerepmo la nedik taba vee ngan limixin mukun ap mo lunuunu la lorooro atdik ba nunuan axap kerekngan ne Karisito.

14 Do lorooro atdik nak lok kuren, lunuunu atdik noxo lok ngan lunuunu at laxamdak lixilik, it los ekat ngan laras i repit la iap sep tang at lisim la ira onon taba ugo la ude to at lamaxat. Kerepmo lavaeme loklox ase xaxarang di lok tong i xusu dina sar asoogong lunuunu atdik basinge ne Karisito mi leveloklox ase xaxarang la levelinga babala arup. 15 Ketla nedik ta paase asu levelinga ruturun at ne Moroa, la lorooro atdik na umsu mi labalamu; la at lorooro axap atdik, ataba ravasu lolos la mina sep sogo ri lamgomgo atdik ne Karisito. 16 Nedik axap ta lok ngan labantuxu ren la maxeneng teren dik tat kis buru. La lengkot axap at labantuxu ren na elok tooro ela, la kerepmo labantuxu ren ba su lolos la ba lox aru axa i mi labalamu, mo do lengkot axap na gugu nunuan.

Lorooro Maxat Maxeneng At Ne Karisito

17 Nia a sing lolos nemi keneng at laasen at Leeme Silok do mina ronga res at na levelinga. Mina xap ti mu asu leveloklok kakapmek at limixin kopmen di me Judaia. Mo levendoxoma atdi noxo lok tooro di. 18 Levendoxoma atnedi i nemen keneng at lamain. Nedi xopmen dina ruuna ka toxot keneng at na lorooro ne Moroa im taba i, mila kopmen takleklen tinotno atnedi la lebelen atnedi i rebonot pe. 19 Nedi xopmen dina suma lainmangan mumu leveloklok kakapmek dik lox i. La dira xap kusu dina lok leveloklok nunuan la dia vubeles at leveloklox axap i bilingot. La levendoxoma atdi i vekip kaxat ti lok laxakapmek.

20 Levenanasa mumu ne Karisito xopmen na lok kuren. 21 Nemi migara ronga xaka vam levelinga ren la diga lox ase nimi min, ik sixit emu mi levenanasa ruturun at ne Iesu. 22 Miga lox ase kusu mina lok kepe lorooro maut mo gak lok at lorooro atnimi ganoxa, la lodomdoma ri laxakapmek gara lok kapmex i. 23 La miga lox ase kusu levendoxoma atnemi na maxat. 24 La miga lox ase kusu mina lox ekun nom lorooro maut mi lorooro maxat, mo i lok ngan lampoovo at ne Moroa la i umsu mi loklok mokmokso i ruturun la loklok i dadat.

25 Kuren la nemi getgesara mina lok pes kepe levelinga xaxarang la mina paase mi luruturun ti limixin at ne Moroa, mila nedik axap lengkot at labantuxu at ne Karisito. 26 Do mina musak, nemen mita lok laxapmek; lumukmusak atnimi na xap avot ti laxangking na lotup. 27 Nemen mita raba ne Satan mi toxonin angavang. 28 Mo laradi xipkip pilo gutap kip pilo bok ba. Ketla neni na lok lugugu mi lukngen la na lok leven gugu nunuan kusu neni na epovo na lok tooro nedi limixin pakpakes.

29 La lavapaase kapmek noxo ravasu at levenngusno atnemi. Levelinga avukat mene nga mina paase asu i, kusu na lox alolos nedi limixin dik pakes ti levelinga avukat la kusu na lok tooro limixin di ronga nimi. 30 Nemen mita lox abulu Loroonan Kaala at ne Moroa. Loroonan Kaala neni loklok katling ne Moroa ga raba vam nimi min, i ngan lampinebeng ti loklox arooro atdik. 31 Nemi mina lok kepe axap loklok ti lebelen kapmek, lebelemamao, lumukmusak, loxoxo xaka, lavapaase mumu, la mo axap leveloklok kakapmek. 32 La mina suxa lorooro atnimi mi lebelen tuntun la labalamu kantubu atnemi limixin nuunu, la mina domampe laxakapmek atnimi getgesara kerekngan ne Moroa ga lok pes laxakapmek atnimi at laasen at ne Karisito.

Copyright information for `MMX