aAis 26:19
bLur 2:24

Ephesians 5

Lorooro Atdik Keneng At Laxasep

Nemi luvutnitna at ne Moroa, mo i balamu aleng nimi; kuren la mina mu asu lampoovo ren. La lorooro atnimi na umsu mi labalamu kerekngan ne Karisito ga lox asuusu labalamu ren tidik la ga raba lorooro ren; mo loklok at ne Karisito i lok ngan laramtaba i so misigisigis la lavanga laplavang saparap ne Moroa.

Ketla nemen tara atnimi guta lok laxakapmek i lok keretna, loklok kakapmek maxamang at lixitkis epot, lengkot mamangan, loklok ti belegaao. Na lempanga xopmen nak mokso ri limixin dadat at ne Moroa kusu dina lox i. La mina ke xepe lavapaase kapmek, levelinga rangtangku, la lavapaase sese i lok kapmek; na lempanga kopmen na lox avukat. Ketla mina umsu mi levelinga ti tong avukat ti ne Moroa. Nemi mina xasep at na. Do tara na lok loklok kakapmek maxamang at lixitkis epot, kopla na lok lengkot mamangan, kopla loklok ti belegaao (na loklok i ngan loklok ti lotu saparap lempoovo moroa), kopmen toxot tin to xeneng at Linintoo at ne Karisito la ne Moroa. Nemen tara na bala arup nimi ri laxakapmek mi levelinga gamasa mila, do tara na lok nom lempanga la na ronga xepe levelinga at ne Moroa, lebelemamao ren ba vot saparap nom laradi. Kuren la nemen mitat kis etangas eburu mi mo limixin tongtonga xepe.

Gano nemi miga nemen at lamain. Ketla na nga Leeme Silok ga lok li nemi at laxasep. Nemi minat pas ngan luvuttadi at laxasep. Mo laradi i ruuna laxasep at lorooro ren i lox asuusu luvukat, loklok mokmokso la loklok at lavapaase i ruturun. 10 La mina lok tong pen i kusu mina xasep ap mo leveloklok, i lox amomo Leeme Silok. 11 Nemen mita etangas eburu minedi luvuttadi dik lok leveloklok at lamain. Mo leveloklok i ngan lavanga gamasa la noxo visik asu lempanga avukat, ketla mina vaase sok nedi limixin di lox i; 12 mila lavanga mamangan do tara na vaase asu levengkakapmek i lipe ro at lemeren limixin. 13 Ketla laxasep i lox asuvos leveloklok kakapmek la limixin dira xasep ba do mo lempanga i lok kapmek, 14 mila lamain kopmen na epovo nak lox eburu mi laxasep. I lok ngan na levelinga,

“Nenu laradi mo u vunga, soso una aus. Nenu una aus basinge lanmet la ne Karisito naba raba u mi laxasep.” a 
15 Nemi mina lok tatao avukat lavatpas atnemi. Nemen mitat pas ngan laradi kopmen takleklen teren. Minat pas ngan laradi i ruuna lakleklen. 16 Amisik mina gagas kusu mina lok leven gugu at ne Moroa, mila na levenaleng i umsu mi laxakapmek. 17 Kuren la nemen nimi mita lok lempanga rangtangku, ketla mina xasep at lavavara at Leeme Silok. 18 La nemen mita inin tangtangku mi laxadan lolos; mo loklok naba lok kapmek nimi. Ketla mina umsu mi Loroonan Kaala, 19 la mina paase kantubu atnimi mi levengkompixan at ne Devit la lengkompixan at lotu la lengkompixan emi asu. Minak pixan la mina lok levempanga kerepmo mi lorooro axap atnimi saparap Leeme Silok. 20 At levenaleng axap mina tong avukat ti ne Moroa Temen dik at lempanga axap neni i lox i at laasen at Leeme Silok atnedik, ne Iesu Karisito.

21 Mina lox asi nimi maxopok at luvutneton nemi kusu miba lox asuusu loklok ngangao atnemi ri ne Karisito.

Levelinga Ri Lavaun Epot

22 Nemi lavakin. Minang tonga res at levelinga at lavatlok atnemi, kerekngan ming tonga res at levelinga at Leeme Silok; 23 mila latlok ni lamgomgo at latkin teren, kerekngan ne Karisito ni lamgomgo at lotu. Lotu ni labantuxu at ne Karisito, la ne Karisito neni Laradi Loklox Arooro atdik. 24 Lotu i nemen maxopok at ne Karisito, la kerepmo bok lavakin dinang tonga res at lavatlok atdi at leveloklox axap.

25 Nemi lavatlok. Mina balamu lavakin atnemi, kerekngan ne Karisito ga balamu limixin lotu la ni ga raba lorooro ren tidi. 26 Neni ga lox i xuren kusu ri lox adadat di basinge laxakapmek. Ni ga lox adadat di mi levelinga ren i ngan ladan. 27 Neni ga vara i do na lox agagas li di kusu dina ven nunuan tinotno at lemeren. La nedi di noxo ruuna taxakapmek, toxot kapmek la tevenasen panga xerepmo, diba nemen mokmokso la kopmen taxapmek atdi. 28 At na mun langas lavatlok, mina balamu lavakin atnimi, kerekngan mi balamu axa labantuxu atnemi. Mo laradi i balamu latkin teren, i lox asuusu i do i balamu axa i. 29 La kopmen taradi na munepen mi labantuxu axa ren, ketla neni i raba luxa i la i lok tatao avukar i, kerekngan ne Karisito i lok tatao limixin at lotu; 30 mila nedik lengkot at labantuxu at ne Karisito.

31 I ngan Lovoang Kaala i tong i xeretna,

“Ni lavasuun teren la laradi i onon basinge ne temen mi nenen kusu neni na nemen eburu mi latkin teren, la nedu duna lok ngan legesara.” b 

32 Na levelinga ni lavanga i silok aleng la i lolos kusu dik tana xasep teren. Ketla nia a doxoma i do i ru katling ne Iesu eburu mi lotu ren. 33 Ketla nemi getgesara mina balamu lavakin atnimi, kerekngan mi balamu axa nimi. La lavakin dina lok ngangao at lavatlok atdi.

Copyright information for `MMX