aPas 20:12
bLen 5:16

Ephesians 6

Levelinga Ri Laxamdak Mi Laxaalik

Nemi laxamdak mi laxaalik. Minang tonga res at levelinga at luvuttemen nimi mi luvutnen nimi at laasen at Leeme Silok, mila na loklok ik mokso ti mu asu i. Lovoang Kaala i tong i,

“Mina lok ngangao at luvuttemen nimi mi luvutnen nimi.” a 

Na loxot at lasangaun lenavolo, ni lara avot i tong asu loklox anarong tinedi di ronga res teren.
Nom loxot i lok keretna,

“Mina lok ngangao at luvuttemen nimi mi luvutnen nimi kusu lorooro atnimi naba lox avukat mun la naba nemen babaalom at na lavatkangka.” b 

Nemi luvuttemen laxamdak mi laxaalik. Nemen mita lok kapmek lebelen laxamdak mi laxaalik atnimi la dina musak, ketla mina lok tatao di mi loklok tik lox akmokso di at luruptuvuk atdi la mina anasa di mi levenanasa at Leeme Silok.

Lavasaxaruki. Minang tonga res at luvuttadi amgomgo atnimi la mina umsu mi loklok ngangao la lanmarat; la lebelen nimi nak lox avukat tidi. Minang tonga res atdi kerekngan nemi ming tonga res at ne Karisito. Minang tonga res atdi kopmen do ap mo mene nga di reven tata nemi, ketla mina gugu amisik ngan lavasaxaruki at ne Karisito la mina lox epovo lavavara at ne Moroa mi lorooro axap atnimi. Mina lok leven gugu atnemi mi lorooro axap atnimi, i lok ngan ta do mi gugu ri Leeme Silok, la kopmen ti limixin mun, mila miklen i do Leeme Silok naba raba luunun tinedi axap dik lok luvukat, keke i do neni lasaxaruki xopla xopmen.

Nemi lubung amgomgo. Luruptuvuk atnemi na lok ngan legesara parap lavasaxaruki atnimi la mina xap at loklok ti paase mukmusak tidi. Mina doxoma i do ne Karisito laradi gomgo atnimi la atnedi bok, la ik lok to vana at laxalibet la i viila mumu nedik axap mi leges ampoovo mene nga.

Mina Gagas Ti Leesep

10 Ti lox axap na lovoang. Mina lox alolos lorooro atnimi keneng at Leeme Silok la mina lok kaka lololos teren i silok pologat. 11 Mina siga levempanga singsiga no ne Moroa ga raba nemi min kusu miba epovo ri esep la mina tu lolos tangarang laxanbabala at ne Satan. 12 Nedik na kopmen ta esep tangarang mi limixin ketla nedik di esep tangarang mi laxampanga lolos at lamain at na lavatbung menemen, nedi lubungangelo xapmek, lubunggas, la luvuttadi amgomgo atdi. La dik ta esep tangarang mi lubungmixin kapmek at ne Satan dik lok to vana at lamavangkap. 13 Kuren la mina siga axap levempanga singsiga at ne Moroa i raba i ri leesep kusu mina gagas avukat ti mo laaleng kapmek at leesep, la miba epovo na tu lolos. La do mi gagas avukat pam, minaba tu tuxuruxun at nom leesep.

14 Kuren la mina tu tuxuruxun; mina rebeng ka levelinga ruturun, i ngan labanbaane di sevut li i at labangbaangis atnimi; la mina suxa lorooro atnimi mi loklok mokmokso, i ngan labantaape at lobongobong. 15 La mina gagas ti paase asu Lagale Lavavang at lumulum i ngan labantaape at lengkangkedek tit pas avukat at nom leesep. 16 La mina sosolok bok nom lunuunu i ngan lenban kusu ri sep banpe nom axap levesoso xao at ne Satan i soso min. 17 La mina lok ka loklox arooro i ngan lavatkiam tik lok pe lesepsep la minaklen ka levelinga at ne Moroa i ngan lavarise sepsep at Loroonan Kaala. 18 Mina lox i na levempanga xeneng at levesingising atnemi, kusu minaba sing ka loklok tooro at ne Moroa. At levenaleng axap mina ngising at leventaangas axap no Loroonan i sasat ase nemi min. La mumu mun na langas, minaba tu lolos la mi noxo subu kot; mina ngising amisik ti limixin at ne Moroa.

19 La mina ngising bok tia, kusu ne Moroa naba raba ia mi levenngas linga at levenaleng nia a lok gagas ti paase, kusu nia noxo marat la anaba lox axasep Lagale Lavavang mo ga nemen alipe. 20 Ni lavasuun teren la nenia, laradi xipkip levelinga at ne Moroa, ak lok de at loxokoxo. Mina ngising bok do nenia noxo marat ti tong asu Lagale Lavavang kerekngan ne Moroa i vara i.

Levempapaase Avit

21 Tikikas, neni neton orong atdik la lasaxaruki ruturun at Leeme Silok. Neni naba vosiga nimi la naba raba nimi mi lavapaase axasep mumu lorooro rak la lugugu rak nade. 22 Ni lavasuun teren la nenia aba riki i udom saparap nimi xusu miba xasep do lorooro atnema ik lok kereva, la kusu neni naba lox alolos nimi.

23 Moroa ne Temen dik la Leeme Silok ne Iesu Karisito duna raba nemi luvutneton nama mi lenmila, la labalamu eburu mi lunuunu, 24 la letaba nabalamu naba nemen eburu minedi axap di balamu Leeme Silok atnedik, ne Iesu Karisito la mo labalamu noxo xap. I ruturun.

Copyright information for `MMX