aLur 15:6
bLen 27:26
cAbk 2:4
dMas 18:5
eLen 21:23

Galatians 3

Lenavolo Xopla Lunuunu

Laxampanga rangtangku nemi leme Galesia. Nege rinotno ga sar asoogong lodoxoma atnemi basinge lunuunu ruturun, kusu mina mumu asu Lenavolo? Gano migara ven axasep pam lavasuun at lanmet at ne Iesu Karisito ro vana at laxaba. La mina tong be i ria. Kereva, nemi miga ruuna xaka bok Loroonan at ne Moroa mumu lumumu asu atnemi at Lenavolo? Kopla, miga ruuna xaka Loroonan at ne Moroa mumu lorongtonga atnemi ri Lagale Lavavang la lunuunu atnemi saparav i? Ming tangku solo xereva? Miga ru kaxat avot lunuunu atnimi mi Loroonan at ne Moroa; la mo nga mi lok do mina ruuna ka lunuunu ngan limixin mukun mi lololos axa atnimi. Ketla kopmen mina epovo. Migarap kip levesongsongot mumu lunuunu atnemi. Kereva, migang songot gamasa mun? Kereva, Moroa im taba nemi mi Loroonan Kaala la ik lok levempanga sangsangu xeneng atnemi, atla mik lok levempanga Lenavolo i paase i, kopla at levereven kibis atnemi ri Lagale Lavavang?

Mina doma mu be lorooro at ne Abaram, ngan Lovoang Kaala i vaase i xeretna,

“Neni ga nuunu at ne Moroa, la mumu mun lunuunu ren saparap ne Moroa, Moroa ga siam kaka i ngan laradi mokmokso.” a 

Kuren la mina ven kibis i do nedi limixin di ruuna lunuunu, diba ravasu ngan livipisik li rinotno at ne Abaram. Lovoang Kaala ga vaase avot be i xeretna do ne Moroa naba lok li limixin kopmen di me Judaia ngan nedi limixin mokmokso mumu mun lunuunu atnedi. La avot ti lovotpot at Lagale Lavavang keneng at ne Iesu, Lovoang Kaala ga vaase asu i ri ne Abaram keretna, “Mumu mun lunuunu ram, nenia anaba lox anarong limixin axap at na lavatbung menemen.” Ne Abaram ga nuunu, kuren la neni ga lok ka loklox anarong, la nedi di nuunu, dinaba lok kaka bok loklox anarong ngan i.

10 La nedi axap ding tonga res kusuk mun at Lenavolo at leme Judaia xusu dina lok kaka lorooro, nedi dik lok maxopok at lasaxaek ne Moroa im taba i. I ngan Lovoang Kaala i vaase i xeretna,

“Do nege do ixong tonga res amisik at levengkot axap keneng at Lenavolo, neni ik lok maxopok at lasaxaek ne Moroa im taba i.” b 

11 Amo nga, i xasep tinotno do, kopmen teta naba sepmus basinge loklok kakapmek mumu mun lumumu asu ren at Lenavolo; i ngan Lovoang Kaala i vaase i xeretna,

“Laradi xusuk mun ua neni i sepmus keneng at lunuunu ren, neni naba ruuna ka lorooro avolo.” c 

12 La Lenavolo ixo ruuna tekot keneng at lunuunu, ketla Lovoang Kaala i vaase i xeretna,

“Do nege i lox epovo levempanga axap Lenavolo i paase i, neni naba ruuna ka lorooro avolo.” d 

13 Ketla ne Karisito ga ruuna ka lasaxaek at loxonaleng neni ga ru korop ka lasaxaek, no ne Moroa im taba nedi di mumu asu Lenavolo min; kerepmo neni ga un ka amlong nema basinge nom lasaxaek; i ngan Lovoang Kaala i vaase i xeretna,

“Do nege na rem to vana at laxaba, neni i ruuna xaka lasaxaek boro at lebelemamao at ne Moroa.” e 

14 Ne Karisito ga un ka amlong nama kusu no loklox anarong ne Moroa ga xaape min ti ne Abaram naba volo bok ti limixin kopmen di me Judaia. Ne Iesu Karisito ga lox epovo i na rinama, kusu mumu mun lunuunu atnama maba ruuna xaka Loroonan no ne Moroa ga xaape min.

Iesu Neni Livisik Li At Ne Abaram

15 Luvutnetak mi luvurinuk. Ana vaase poovo mi legepu radi do nedu du paase mi tavanga at laxanaleng axap la du siam teren la du malagan tovoang ti lox axasep livirivit li atdu; ixo epovo bok ba xusu teta naba ba gili i xopla na soxurung arup tepempanga ukeneng teren. 16 La i ngan pam ne Moroa ga lok laxakaape ren ti ne Abaram eburu mi legesi visik li ren. Lovoang Kaala kopmen na vaase mi loxolinga ri limixin solo, ngan loxolinga “Livipisik li ren.” Lavasuun teren do buaang limixin, kopmen. Legesara mene nga, ngan loxolinga, “Legesi visik li ren,” la neni ne Karisito. 17 Lavasuun at levelinga rak keretna; ne Moroa ga lok laxakaape eburu mi ne Abaram la neni ga vit li i xusu neni noxo doma xepe i. La Lenavolo no ga vot ba melemu at lavanuet sangaun kobot mi lavantun sangaun maares (430) la ixo epovo xusu na los polo xopla na lok kepe mo laxakaape at ne Moroa ri ne Abaram. 18 Do laramtaba at ne Moroa ri ne Abaram ga vot mumu mene nga Lenavolo, naba milik ngan ta do, mo laramtaba ren kopmen nak lok at laxakaape ren. Ketla mumu mun laxakaape ren ne Moroa, la neni ga lox asuusu letaba nabalamu ren la ga raba laramtaba ren ti ne Abaram.

19 Lavanga sala ba i neni lugugu at Lenavolo? Lenavolo ga vot kusu ri lox aven kibis limixin mi lavanga sala rinotno laxapmek, la gak lok mun se at lovotpot at livisik li at ne Abaram, la neni ne Moroa ga xaape min. La ne Moroa xa ga raba lubung angelo ren mi Lenavolo xusu dina raba ne Moses min ngan laradi me xantubu, la ne Moses ga raba limixin min. 20 Ketla at laaleng ne Moroa ga raba ne Abaram mi laxakaape ren, neni axa ga lox i, kopmen teangelo xopla laradi me xantubu gita raba ne Abaram min.

21 Kereva ba, Lenavolo i ra korop levengkakaape at ne Moroa? Kopmen tinotno. Amo dola neni gita raba bok tenavolo rim taba lorooro, i lok ngan do limixin axap ding tonga res at Lenavolo, nedi dinabak mokso basinge loklok kakapmek. Ketla kopmen na ruturun. 22 Ketla Lovoang Kaala i vaase i xeretna do, limixin axap at na lavatbung menemen, dik lok maxopok at lololos at laxapmek; kuren la na laramtaba ne Moroa ga xaape min ti limixin, it pot mumu mun lunuunu saparap ne Iesu Karisito, la ne Moroa im taba i rinedi di nuunu.

23 Ketla, avot ti langas at lunuunu ga vot, Lenavolo gak soxoba pe nema ngan luvuttadi dik lox at loxokoxo se rinotno at laaleng lunuunu saparap ne Karisito ga ravasu. 24 Kuren la Lenavolo gak lok tatao luruptuvuk atnema la ga gagas li nama ti mo laaleng ne Karisito ga vot teren; neni ga vot kusu mana sepmus basinge loklok kakapmek keneng at lunuunu atnema. 25 Kuren la amo nga, lunuunu ik lok atnema, la Lenavolo ixo lok tatao bok ba nema.

Nemi Luvutnitna At Ne Moroa

26 Nemi axap luvutnitna ne Moroa mumu mene lunuunu atnemi saparap ne Iesu Karisito. 27 Nemi miga sep susu ukeneng at laasen at ne Karisito, la amo nga Moroa ga lok nimi xusu mina vee ngan ne Karisito. 28 Kuren la limixin me Judaia eburu minedi xopmen di me Judaia, di epovo axap mun, kuren bok pam at luvuttadi asaxaruki la luvuttadi dik lok gamasa, la nedi bok lavatlok la lavakin; nemi axap mi lok ngan mun legesara keneng at lurutu eburu mi ne Iesu Karisito. 29 Do nemi at ne Karisito, mi lok ngan pam do nemi livipisik li at ne Abaram, la minaba ruuna xaka mo loklox anarong ne Moroa ga xaape min ti ne Abaram.

Copyright information for `MMX