Galatians 6

Ata Ekip Tooro Ela Mi Levenmumuat Atnedik

Luvutnetak mi luvurinuk. Amo dola limixin nuunu dina long terek tara xantubu atdi do neni i lok tavanga i lok kapmek, nemi limixin tongtonga res at Loroonan Kaala, mina lox akmokso mo laradi; ketla mina lox i mi lumulus. La mina lok tatao avukat lorooro atnemi axa, kusu mo laxakapmek teren noxo lok tong pen nemi. Mina ekip tooro ela mi levenmumuat atnemi; do mina lox i xuren, i lok ngan pam do ming tonga res at levelinga at ne Karisito. Do tara na doma i do neni mo laasen teren i volo rinotno ketla neni laradi gamasa mene, neni mo laradi i xarang axa i. Nemi getgesara mina viila avukat luruptuvuk atnemi. Dola luruptuvuk at tara atnemi na lox avukat, i epovo ba do neni na momo at levempanga neni ga lox i; ketla ixok mokso do neni na mii poovo i mi luruptuvuk at leventaba vetpes. La nedik axap ata lok tatao avukat luruptuvuk atnedik getgesara.

Do lara i lok kaka levenanasa ti mumu asu ne Karisito, i epovo do neni na raba mo leeme loklox ase mi levempanga ri lok tooro i.

Nemen gat mi guta ke tara na xarang arup nimi xusu mina lok laxakapmek; ixo epovo do tara na xarang arup ne Moroa, atla lavanga sala laradi itlo li i, neni axa naba lok kaka levempipisik teren. Do neni natlo li lavavara mun at labantuxu ren, neni naba dik kaka levempeven teren, neni lanmet; la do neni natlo li levempanga at Loroonan, neni naba dik kaka lorooro avolo. Nemen gat nedik guta molo basinge leven gugu i lox avukat; atla, do nedik atoxo molo basinge i, mo laaleng tinotno naba vot la nedik ataba dik kaka levempeven teren. 10 Kuren la amo nga nedik move di ruuna levenaleng, i lox avukat do atanak lok loklok i lox avukat ti limixin axap, i ngan tinedi rinotno bok dik lox eburu minedik keneng at lunuunu atnedik.

Levempapaase Aronga Avit

11 Mina ven i do nenia a malagan lempatkolinga silok tinotno la nenia xa a malagan i mi lakngak.
Lara vetpes ga malagan i na levelinga keneng at na lovoang ne Pol ga vaase min.


12 Nedi limixin dik lok tong pen i xusu dinak sok aruru parang nemi do ri rivit kepe lengkontuxu atnemi; nedi luvuttadi dim simi aurut nedi mumu lavatpas atdi keneng at Lenavolo. La dik lok mene nga i xusu di naba sepsu basinge losongsongot mumu laxaba at ne Karisito. 13 La nedi bok no dik lox arala xaka di mi livirivit kepe lengkontuxu atdi, nedi dixong tonga res at Lenavolo; di vara i do dina rivit kepe lengkontuxu atnemi xusu dina lox aurut levenasen atdi mila mi ronga res atdi la mi rivit kepe lengkontuxu atnemi. 14 Ketla nenia anaba lolos kusuk mun ti paase aurut laxaba at Leeme Silok atdik ne Iesu Karisito; mumu mun mo laxaba ren, levendoxoma momo rak ti loklok at na lavatbung menemen ga met axa gano, la levempanga bok gak lox angtang ia at na lavatbung menemen ga met axa gano. 15 Ixo lok petpes tinotno xantubu at taradi diga vit kepe toxontuxu ren, la tara di goxo vit kepe toxontuxu ren; mo loklok kopmen lavanga silok. Ketla lavanga mene nga i silok keretna, laradi i ba gili lorooro ren kusu na lok ka lorooro maxat. 16 Lenmila eburu mi lebelemumu nabak lox eburu minedi di mumu asu na levelinga xeneng at lorooro atnedi, la nedi axap bok limixin tuturun at ne Moroa.

17 Ti lox axap na levelinga rak keretna, a xopara i xusu teta mego na raba ia mi tekarakat, atla labantuxu rak ira umsu vam mi laxanbuluo at laxanandas i lox asuusu i do nenia laradi saksaxaruki at ne Iesu.

18 Luvutnetak mi luvurinuk. Letaba nabalamu at Leeme Silok atnedik ne Iesu Karisito nabak lox eburu axap minemi. I ruturun.

Copyright information for `MMX