Hebrews 4

Loklok Mamas Ti Limixin At Ne Moroa

Lumusaragu move i rem suang kusu ri pubeles ti mo loxot loklok mamas teren; kuren la mina lok tatao avukat nimi xusu teventaba atnimi di noxo subu kot ti mo loklok mamas. Nemi bok miga ronga Lagale Lavavang kerekngan nedi diga ronga i. Ketla mo lavavang diga ronga i, goxo lok tooro di mila di goxo nuunu ren. Mo nga nedik dira nuunu vam, i lok ngan ta do tara vubeles pam ap mo loxot loklok mamas kerekngan ne Moroa ga tong i do,

“Kuren la aga vangpe at lumukmusak tarak do, ‘Di noxo vubeles tinotno at na loxot loklok mamas tarak.” a 

Ketla lugugu ren gara xap pam ga ru ka i at luruntudum li at na lavatbung menemen.
To xeneng at Lovoang Kaala ne Moroa ga vaase mumu laaleng sepsev avanuti mi na levelinga,

“At laaleng sepsev avanuti, Moroa ga lox amas basinge leven gugu axap teren.” b 

La ap mo levelinga a tong pam i, i lok bok keretna,

“Di noxo vubeles tinotno ri loxot loklok mamas tarak.” c 

I ruturun do leventaba move diba vubeles ap mo loxot loklok mamas. La nedi gano diga ronga Lagale Lavavang, di goxo vubeles teren mila diga ronga xepe levelinga at ne Moroa. Kuren la ne Moroa ga lok katling bok lara laaleng, ga soxor i do ningina. La at leventaba levenmaares melemu at lavatpas su at leeme Israel boro Isip, neni ga vaase at lungusno ne Devit kerekngan levelinga neni ga tong i gano, ga lok keretna,

“At na loxonaleng lingina, do mina ronga laxaka ren, nemen gat mita lox alolos lebelen nimi.” d 

Do ne Josua gita raba di mi loklok mamas ap mo levenaleng neni ga lam abeles limixin uto Kanan, Moroa xopmen gixo vaase bok ba melemu mumu taaleng petpes, kusu nedik taba lok ka loklok mamas teren. Loxonaleng ti vubeles to xeneng at loxot loklok mamas at ne Moroa move i rem suang ti limixin teren. 10 Do tara i ruuna loklok mamas at lorooro ren, neni ira on basinge vam lugugu axa ren at na lavatbung menemen. I lok ngan ne Moroa ga lok mamas basinge lugugu ren. 11 Kuren la mina raba axap lodoxoma atnimi xusu mina vubeles ap mo loklok mamas la kopmen tara noxo subu kot la na mu asu lampoovo atnedi leme Israel, diga raba arulu ne Moroa.

12 Levelinga at ne Moroa i ruuna lorooro la i lolos aleng; i lok ngan lavarise i anan evan, mo i tara xoxorop laranin etudum la laramomodong atdik; la kerepmo bok levelinga at ne Moroa i pubeles uto xa xeneng at lodoxoma la lorooro atdik kusu na lox asu leveloklok kakapmek; kuren la nedik toxo epovo xusu ata lipe at lemeren ne Moroa, neni ikleklen levendoxoma atdik la levesumsuma at lebelen dik. 13 Kopmen tevempanga at na lavatbung menemen axap i epovo na nemen alipe at lemeren ne Moroa. Neni ne Pen Axasep la i reven leveloklok axap at limixin dim doma i xopla dim suma i, la neni naba lok li limixin at lavapaase mumu mo leveloklok.

Iesu Neni Lamaasa Avolo

14 Nedik di ruuna Lamaasa Avolo, neni ga urut pam uto vana at laxalibet, la mo nga it kis at lekngen tino at ne Temen. Neni ne Iesu, Nitna ne Moroa. Kuren la nedik atam tebeng lolos mo lunuunu atnedik tagara ruuna ka vam i. 15 Mo Lamaasa Avolo atdik, neni i epovo na suma rooro dik at leveloklok tong pen mila neni ga suma bok laxaloklok tong pen ngan dik, ketla neni xopmen goxo lok taxakapmek. 16 Kuren la nemen dik guta marat kusu tana vot pasa ne Moroa mi lodomdoma atdik mila neni i umsu mi lebelemumu la nedik taba ruuna ka letaba nabalamu ren la loklok tooro do nedik atak pakes tin.

Copyright information for `MMX