aJer 31:31-34

Hebrews 8

Iesu Neni Lamaasa Gomgo At Lekabus Maxat

Lavasuun at na levelinga atnama i lok keretna. Nedik ta ruuna lamaasa gomgo xerepmo, mo it kis at lekngen tino at loxonin orong at ne Moroa i silok aleng, to vana at laxalibet. Neni ik lok lugugu at ne Moroa ro xeneng at loxot i xaala aleng mo ik lok at loogu ruturun, kopmen limixin di goxo lox i, ketla ne Moroa xa ga lox i.

Nedi axap, lavamaasa amgomgo dip kip lugugu xusu dina raba ne Moroa mi leventamtaba la levempanga laplavang, la kerepmo bok i epovo do Lamaasa gomgo ne Iesu na ruuna tavanga xusu ni na raba ne Moroa min. Do neni gik lok nade at na lavatbung menemen, neni gi toxo ruuna ka lugugu ngan lamaasa mila leventaba luvuttadi mo gik lok pam kusu ri raba leventamtaba ngan Lenavolo i tong i. Nedi di gugu ro at loxot kaala nade xopok at na lavatbung menemen, na loxot kaala neni lampoovo mun ap mo loxot kaala no vana at laxalibet. Ni lavasuun teren la ne Moroa ga vaase lolos ne Moses at laaleng neni ga lok do na xip loogu kadis at ne Moroa, la ne Moroa ga lok tin keretna, “A vara i do una xip avukat na loogu ngan lampoovo nia aga lox ase u min to at lakaana Sinai.” Ketla mo lugugu ne Iesu ga lok ka i, i lox avukat ti lugugu at lavamaasa mede xopok, i ngan bok lekabus maxat i lox avukat ti lekabus migomgo; la leveloklox anarong at lekabus maxat i lox avukat ti leveloklox anarong at lekabus migomgo. La ne Iesu neni lavasuun at lekabus maxat, ni ga lok lumulum kantubu at limixin mi ne Moroa.

Lekabus migomgo goxo epovo na lox axis eburu ne Moroa mi limixin, kuren la ne Moroa ga lok lekabus maxat. Moroa ga ven kibis i do lekabus migomgo goxo epovo mila limixin diga soogong aleng; ni ga lok,

“Mina ronga i na. Laaleng mo naba vot la nia anaba lok lekabus maxat mi limixin tarak to Israel la limixin tarak at libibinat me Juda.
Mo lekabus maxat ba lok petpes ti lekabus migomgo, mo nia aga lox i eburu mi lavalabat atdi ap mo levenaleng nia aga lam asu di boro Isip. Nia aba lok lekabus maxat mila di goxo ruturun ti lekabus migomgo, la nia aga raba arulu di. 10 Nenia ne Moroa, mina ronga na levelinga. Melemu nia anaba lok lekabus maxat mi limixin me Israel. Mo lekabus naba lok keretna; nia anaba lox adoxoma di mi levelinga rak, la anaba buradong levelinga rak keneng at lebelen di. Nia anabat kis esogo midi la anabak lok tatao di ngan limixin tarak. 11 Kopmen bok ba tara naba anasa lentangas teren kopla neton mi levelinga keretna, ‘Unaklen ne Moroa.’ Mila nedi axap dinaba xis ekilen eburu minia; nedi limixin silok la limixin gamasa bok. 12 Nia anaba doxoma xepe laxakapmek atdi la nia noxo domangke rinotno bok ba at laxakapmek atdi.” a 

13 Moroa ga soxot na lekabus do lekabus maxat, kuren la Moroa ga ke xepe lekabus migomgo mila kopmen bok ba tugugu ren la ma lixilik na sonao axap.

Copyright information for `MMX