James 1

Lavapaase Axasep

Nenia ne Jems, lasaxaruki at ne Moroa la at Leeme Silok ne Iesu Karisito. Nia a malagan na levelinga ri lasangaun mi legepura larabibinat me Judaia di epeseves at na lavatbung menemen axap.

Nia a malagan lavapaase momo rinemi.

Levenmumuat I Lox Asu Lunuunu Lolos

Luvutnetak mi luvurinuk. Do levenasen panga mumuat na vot parap nimi, i lox avukat do mina momo mene, atla miklen i do nom levenmumuat i tupot parap nimi kusu ri lox alolos lunuunu atnimi la melemu miba tu tuxuruxun keneng at lunuunu atnimi. Mina tu lolos amisik maxeneng at levenmumuat, la nemen mita subu kot. La kerepmo miba vee ngan limixin mukun at lunuunu atnimi la kopmen tempanga xapmek bak lok at lorooro atnimi mo ba umsu aleng mi leveloklok nunuan. Ketla do tara atnimi ik pakes ti lodoxoma avukat, ni na sing ne Moroa, atla ne Moroa naba raba aleng i min; Moroa im taba buaang lempanga ri limixin getgesara la neni xopmen noxo rebeng alis toxot teren mumu loklok atdik. Ketla mina nuunu lolos at lengkonaleng mi ngising parap ne Moroa, la nemen lodoxoma atnimi na sixit ekarakat. Laradi xopmen na nuunu lolos, i ngan lovotas i repit to at laras la ik sixit la lamanman i mas ekapus i uto la uto at lengkot axap. Laradi xerepmo noxo nua i do naba lok ka levenasen panga boro at Leeme Silok. Neni xopmen na epovo ri lox alii lodoxoma at lorooro axap teren la ni xopmen na epovo ri lox aulis lunuunu ren parap ne Moroa.

Laradi Banbalo La Laradi Nopnovos

Do laradi banbalo ik lok kantubu atnemi limixin nuunu, neni na lok momo mun, keke i do kopmen tevempanga ren; laaleng move ne Moroa naba xip aurur i. 10 Ketla do laradi nuunu i ruuna buaang levempanga, neni naba lok momo mo do ne Moroa na lox asi i. Neni i lok ngan mun lempusuvus aaxa i nemen lixilik mun la ia met ta. 11 Laxangking i urut la iplivi aleng la i lox amolos axap nom lempusuvus aaxa la i subu uto xopok at laxangka; lampeneves teren ira xap. At nom mun langas laradi i ruuna levempanga solo naba met basinge leven gugu axap teren ap mo levenaleng i lok lugugu ren.

Leveloklok Tong Pen Ti Laradi Nuunu

12 I lox avukat aleng do laradi nuunu na tu tuxuruxun maxopok at leveloklok tong pen. Mo do laradi ira sak tup pam mi leveloklok tong pen, i lox avukat mila ne Moroa naba raba i mi lavatbungorong, i lok ngan luunun tin la neni lorooro avolo. Ganoxa ne Moroa ga paase alii i do ni naba raba i ri mo limixin di balamu i.

13 Do loklok tong pen i vot parap tara la i lok laxakapmek, ni noxo lok do ne Moroa i raba na loklok tong pen tin. Kopmen tara i epovo ri lok tong pen ne Moroa ti lok laxapmek, la neni xa noxo lok tong taradi. 14 Ketla laradi i suma loklok tong pen at loxonaleng lavavara xapmek axa ren i sar asoogong i. 15 La mo lavavara xapmek teren naba sisilok la ba lox asuusu laxakapmek. Melemu at na, laxakapmek na sisilok la na lox asu lanmet.

16 Luvutnetak mi luvurinuk orong. Nemen tara na xarang nimi mumu i na. 17 Leventamtaba mo i lox avukat aleng, ni axap nom boro vana at laxalibet; i si boro vana at ne Temen dik, mo ga rudum li laxangking, lagaaling, la laxampenti; kopmen teretepukus at loklok teren la kopmen toxot at lamain ik lok keneng teren. 18 Neni ga mumu asu lavavara ren la ga raba nedik mi lorooro maxat, mo ga laa boro at levelinga ruturun teren, kusu nedik taba lok ngan levempipisik avot, la taba gomgo ri lempanga axap, ni ga rudum li i.

Nemi Mina Ronga Na Levelinga, La Mina Mumu Asu Box I

19 Luvutnetak mi luvurinuk. Mina doxoma na lavanga. Nemi axap mina lok soso ri ronga res, ketla nemen mita vaase porang soso levelinga, la mita musak soso, 20 mila lumukmusak at laradi kopmen na lox asuusu luruptuvuk avukat, kerekngan ne Moroa i vara i. 21 Kuren la, leveloklok axap i bilingot la laxakapmek i umsu aleng at na lavatbung menemen, ni nom mina lok pes kape i. La mina lox asi nimi la mina xonom ka levelinga at ne Moroa, ni gatlo li i ro xeneng at lorooro atnimi. Ni mun nom levelinga i epovo na lox arooro nimi.

22 Nemen mita lok ngan luvuttadi rongtonga xape mun di ronga levelinga at ne Moroa, la kopmen dina mumu asu i. 23 Do laradi i ronga mo levelinga, ketla kopmen na gu mu asu i, ni i ngan laradi i ven loroonan teren at liriong 24 la i reven avukat lemeren la melemu i vas kaxat, la soso mun i domampe mo lemeren i lok kereva. 25 Ketla do tara i ven kibis mo levelinga i nunuan aleng, mo levelinga naba lox asepmus i basinge loxokoxo at laxakapmek. Do neni nang tonga amisix i la noxo domampe i, ketla na gu mu asu i, Moroa naba lox anarong i at lempanga ni i lox i.

26 Lentaba dik lok keretna, “Nenia laradi nuunu la loklok tarak i lox avukat at lemeren ne Moroa.” Ketla do ni xopmen na lok tatao avukat lavapaase ren, ni i xaxarang axa lebelen, la lunuunu ren i ngan lavanga gamasa. 27 Leveloklok mo i nemen, ne Moroa i vara i do limixin dina lox i. Do dina lox epovo i, i lox asuusu i do di nuunu ruturun. Nom leveloklok i lox avukat aleng la i lok keretna. Limixin dina lok tatao avukat lubungkarun la lavakin, lavatlok atdi diga met pam; la dina lok tooro di at levenmumuat atdi. La lara lavanga bok, nedik ata lok tatao avukat lavatpas atnedik, la loklok at na lavatkangka noxo lox abilingot lorooro atnedik.

Copyright information for `MMX