James 5

Levempapaase Ri Luvuttadi Nopnovos

Nemi limixin nopnovos mina ronga ia. Minang teng la mina bulu mila levenmumuat naba vot saparap nimi. Lapnovos atnimi ira xap pam, la levesingsiga atnemi laxampide ira ngas koxorop pam i. Leven gol atnimi la levesiliva ira lok kapmek pam mi libilinga, la na libilinga naba lox asuusu laxakapmek atnimi at laaleng ete la neni naba rin labantuxu atnimi ngan laxao. Nemi migak lok li bubua buaang levenaknixip la levempilas at na levenaleng kavaxap.

Nemi xovisi mina raba luunun at luvuttadi di kaxat panga ro xataamang. Mina lox empana levesingising atdi! Levenanteng atdi, ne Moroa ira ronga vam i. Neni Leeme Silok la i lolos aleng. Lorooro atnimi at na lavatkangka i umsu mi laxampanga avukat la nemi mik lok momo. Nemi mira anan avukat la mirang pong solo, ketla laaleng at ne Moroa rip sep kutkut limixin kapmek mo naba vot. Nemi mi lok li limixin avukat at lavapaase la mip sev amet nedi di goxo lok taxakapmek; la kopmen dina tu ebelen eburu minimi.

Lorooro Atnedik Na Tu Tuxuruxun Mi Lising

Luvutnetak mi luvurinuk. Mina ngangais mi lomomo se Leeme Silok nabamlong. Mina doma mumu laradi loklok tatao at laraamang; i tu tuxuruxun, la ia ngangais se laxangka na lox asuusu lempanga. Neni i nemen kangais bok ti larakabu mo na vot at leven gaaling teren. Nemi bok mina tu tuxuruxun la mina ngangais mi lomomo, mila lovotpot at Leeme Silok i auret. Luvutnetak mi luvurinuk. Nemen nemi mita gagalinga mu luvutneton nimi, mila ne Moroa naba vaxaru nimi at lavapaase. Lovotpot at laradi rongtonga linga i auret.

10 Luvutnetak mi luvurinuk. Mina doma bilong ti lavaeme vapaase alii. Nedi diga vavang mi laasen at Leeme Silok la limixin diga lox asongot di, ketla diga tu tuxuruxun. La nedi di lok ngan lampoovo rinimi kusu mina tu tuxuruxun, mo do levenmumuat na vot saparap nimi. 11 Nedik di so asen nedi lavaeme vapaase alii do limixin nunuan mila diga tu lolos. Nemi miga ronga vam leretere at ne Jop; neni ga tu tuxuruxun la ga sosolok laxanmumuat gat pot parav i, la melemu Leeme Silok ga lok luvukat tin. Leeme Silok i umsu mi labalamu la lebelemumu.

12 Luvutnetak mi luvurinuk. Lara lavanga i silok aleng, i lok keretna; nemen mita vangpe mi laxalibet kopla laxangka kopla levempanga vetpes bok. Dola nemi mina tong i do, “tuturun,” kopla “kopmen,” Moroa ba lok momo. Do mina lok lavangpangpe xerepmo, Moroa ba raba luunun kapmek tinimi.

Lising At Laradi Avukat I Ruuna Lololos

13 Kereva, tara go atnimi ip kip tevenmumuat? Neni nak lok lising. Tara bok go i lok momo? Neni nak pixan emi asu. 14 Tara bok go atnimi i meres? Neni na ro ka loxongkulao silok at lotu la dina lok levesingising tin la dina saba i mi loxodan momonok at la olip at laasen at Leeme Silok. 15 Mo do nedi di nuunu ruturun do Leeme Silok naba lox aroo mo laradi, Leeme Silok naba lox aroo i. La do neni ga lok laxakapmek, Leeme Silok naba doxoma xepe laxakapmek teren. 16 Kuren la mina soxomus ela laxakapmek atnimi kantubu atnimi, la mina sing tinemi getgesara, kusu Leeme Silok naba lox aroo nimi. Do laradi nuunu loklok teren ik mokso, levesingising teren naba lolos aleng la naba epovo rinotno ri lok tooro laradi.

17 I lok ngan levesingising at ne Elaisa. Ni laradi ga lok ngan dik. Neni ga ngising lolos ne Moroa ri larakabu noxo vot la larakabu goxo vot ti laxangka at lavantun maares la lavanna gaaling. 18 La melemu ni ga lok bok lising la ne Moroa ga lox asi larakabu ri lavatkangka la leveluxa ro at lentaamang ga su avukat.

Laradi Nuunu I Lox Amlong Laradi Xapmek Basinge Lanmet

19 Luvutnetak mi luvurinuk. Mo do tara atnimi i vas tabaara basinge langas tuturun, mina sar amlong ka i. 20 Nemi mina ven kisip na lavanga. Do taradi i lok tooro laradi kakapmek, la laradi kakapmek i on basinge langas at lanmet la iamlong parap ne Moroa, neni ira lox arooro vam mo laradi basinge lanmet lexen la ne Moroa naba doxoma xepe buaang laxaloklok kakapmek teren. I ruturun.

Copyright information for `MMX