John 10

Lavapaase Poovo Ri Loroboro At Laxasipsip

La ne Iesu ga lok bok tidi, “A tong tuturun i rinimi; laradi do ixok beles at lumusmarakom at loroboro at laxasipsip, ketla i xot lixa at lengkot petpes, neni laradi xipkip pilo la laradi saksak paxat panga. Laradi do i xot lixa akmokso ro at lumusmarakom, neni laradi loklok tatao at laxasipsip. Laradi loklok tatao at lumusmarakom i susuang lumusmarakom tin; la laxasipsip diang tonga xisip laxaka ren do neni i toro ri levesipsip axa ren mi levenasen atdi, la i ram lam asu di ukamang. Do ira lam asu axap di ukamang, neni im gomgo nga di, la laxasipsip dia mumu asu i, mila laxasipsip ding tonga xisip laxaka ren. Di noxo mu asu gamasa tara vetpes; kopmen, diba epeseves basinge i, mila dixo ronga xisip laxaka ren.” Iesu ga tong na lavapaase poovo ridi, ketla di goxo xasep at na levelinga ren.

Iesu Neni Laradi Nunuan Ti Loklok Tatao Sipsip

Kuren la ne Iesu ga lok manga, “A tong tuturun i rinimi. Nenia lumusmarakom ti laxasipsip. Nedi luvuttadi vetpes digamgo ria, nedi luvuttadi saksak paxat panga la luvuttadi xipkip pilo, ketla laxasipsip digoxo ronga res atdi. Nenia lumusmarakom. Do tara na beles keneng at na lumusmarakom, neni naba ruuna ka lorooro avolo; neni nabat pas beles la nat pas su la na puse xaka lempivilis nunuan. 10 Laradi xipkip pilo ik beles mene rip kip pilo, tip sep amet, la rik lok kapmek laxasipsip. Nenia agara vot pam kusu ti raba lorooro ri limixin, la mo lorooro rak naba umsu atdi.

11 Nenia laradi nunuan ti lok tatao laxasipsip la a gagas bok kusu ana met ti laxasipsip. 12 Laradi do di un kaka mene i xusu ri lok tatao laxasipsip, la laxasipsip kopmen ateren, neni ik sixiro do neni i ven tangarang ka lavatman sio it pas kusu ri sev amet laxasipsip. Do kuren laman naba atat alis ka tentaba at nai laxasipsip la laxasipsip diba rem epeseves. 13 Mo laradi ba sixiro mila neni laradi diga un kaka mene i la neni ixo doxoma solo laxasipsip.

14 Nenia laradi nunuan ti lok tatao laxasipsip, la nenia akleklen mo laxasipsip do atarak, la nedi dikleklen ia, 15 kerekngan mun ne Tamak ikleklen ia, la nenia akleklen ne Tamak. La a gagas kusu ri met nop di. 16 Leventaba laxasipsip bok mo rak la dixok lok keneng at na loroboro. Aba lok ka bok di ukeneng. La nedi bok diba ronga laxaka rak la diba ngan legesi binam sipsip mene eburu minedi leventaba laxasipsip no dira nemen pam keneng at loroboro la legesa radi loklok tatao sipsip ba lok tatao di. 17 Tamak i balamu ia mila a momo xusu ri raba lorooro rak, la anaba lok ka amlong box i. 18 Kopmen teta naba lok pes lorooro rak basinge ia. Aba raba gamasa mun i at lavavara axa rak. La a epovo xusu ri raba lorooro rak la a epovo bok kusu ri roo xat amlong. Ne Tamak ga raba ia mi lololos ti lox i xuren.”

19 Na levelinga at ne Iesu ga lox epeseves manga nedi leme Judaia ri legepu binam tadi mi levendoxoma vetpes. 20 Buaang atnedi diga lok, “Lagas i nemen teren. Neni ing tangku. Tila ming tonga i?”

21 Ketla leventaba diga lok, “Laradi do lagas i nemen teren, kopmen na epovo ri paase xerepmo. Lagas kopmen na epovo naba lox arepalas lengkatli main.”

Luvuttadi Amgomgo Di Goxo Nuunu At Ne Iesu

22 Laaleng ga vot nga xusu ri limixin me Judaia ri lok leluxa ro Jerusalem ti lok katling laaleng diga lox anarong loogu laplavang to Jerusalem. Ga ravasu ap mo leven gaaling at lamdut. 23 La ne Iesu gat pas to xeneng at loogu laplavang at lara loxot, laasen teren do ‘Loxot at ne Solomon.’ 24 La luvuttadi amgomgo at limixin me Judaia diga vot pasa i la diga lok, “Lavanisa aleng ta unak lok nama la mana i doxoma? Tong axasep avukat nema do kereva nenu Lanarong?”

25 Iesu ga vorang i ridi xeretna, “Aga tong pam i rinimi, ketla kopmen mina nuunu rak. Levempanga sangsangu ak lox i mi lololos at ne Tamak di lox asuusu ia. 26 Ketla kopmen mina nuunu rak mila nemi xopmen laxasipsip tarak. 27 Laxasipsip tarak ding tonga laxaka rak. Akleklen di, la di mumu asu levelinga rak. 28 A raba nedi mi lorooro avolo la di noxo seeve rinotno; la tara noxo lok kepe di basinge ia. 29 Ne Tamak ga raba ia mi nom laxasipsip la neni i silok ti levempanga vipis axap, la tara noxo lok kepe nedi laxasipsip basinge loklok tatao ren. 30 Nema’ mi ne Tamak ma lok ngan legesara.”

31 La diga ranga ka manga laxanuat kusu dina lu i. 32 Iesu ga lok tidi, “Agara lok pam laxampanga sangsangu ne Tamak ga raba ia min kusu ana lox i ro melamgo atnimi; ti ua lara at nai nemi mi lok do mina lu var ia xusu nen?”

33 Diga vorang i rin keretna, “Maxo lok do mana luvar u mumu mo levempanga sangsangu, ketla u tong i do nenu ne Moroa. Nenu mun laradi, ketla uk lok tong pen i do una lox axa u xerekngan ne Moroa la u paase vupu rin.”

34 Iesu ga lok tidi xeretna, “Levelinga xeneng at Lenavolo atnimi i lok keretna,

‘Nenia aga tong i do nemi xa levenmoroa.’ a 

35 Ataklen i do levelinga at Lenavolo i ruturun tinotno; la ne Moroa ga tong di do levenmoroa, ti mo luvuttadi levelinga ren ga vot tidi. 36 La ne Tamak ga soxolik ka ia la ga riki ia ude at na lavatbung menemen. Tila ba la, mia tong i do nenia a paase vupu ri ne Moroa mila a tong i do nenia Nitna ne Moroa? 37 Dola nenia xopmen ana lok leven gugu at ne Tamak, nemen mita nuunu bok ba rak. 38 Ket do anak lok leven gugu ren, la mixo nuunu rak, mina nuunu at leven gugu rak, kusu miba doxoma i, la minaklen i do ne Tamak i nemen keneng tarak, la nenia xeneng teren.” 39 Diga lok do dina ranga alis i, ketla neni ga vas su mulus mene at lengkikngen di.

40 Iesu ga vas korop amu manga ladan sen Joridan uto at lenep ne Jon gap sep susu limixin e gano, la neni gak lok go. 41 Buaang nedi limixin diga vot pasa i, la diga lok, “Jon goxo lok tevempanga sangsangu xeretna, ketla levelinga axap, ne Jon ga paase mumu na laradi min ga ruturun.” 42 La buaang limixin go diga nuunu at ne Iesu.

Copyright information for `MMX