John 17

Lisingising At Ne Iesu

Melemu at na levelinga Iesu ga milik aurut uto vana at laxalibet la ni ga sing keretna, “Tamak. Laaleng ira vot pam kusu una lox asilok laasen tarak, ne Nurum, la kusu nenia, ne Nurum, anaba lox asilok laasen taram. Nenu ga raba ia mi lololos tim gomgo ri limixin axap kusu ana raba lorooro avolo rinedi, uga raba ia midi. Lorooro avolo i lok keretna; do dinakleklen u, legesa Moroa ruturun kusuk mun la dinakleklen ia, ne Iesu Karisito, nenu ga riki ia ude. Nia agara lox asilok pam laasen taram nade xopok at lavatbung menemen keretna, agara lox epovo vam lugugu uga raba ia min. La mo nga, Tamak, una lox asilok laasen tarak to melamgo ram, la kerepmo una lox asuusu lisisixam tarak aga ruuna avor i ri luruntudum li at na lavatbung menemen, at levenaleng aga nemen eburu minu.”

Iesu Ga Sing Ti Luvuttadi Loklok Ka Anasa Ren

La ne Iesu ga sing bok keretna, “Nia aga lox asuvos laasen taram tinedi uga raba ia midi nade at na lavatbung menemen. Nedi limixin taram, la nenu uga raba ia midi la diga siam ka vam levelinga ram. Mo nga diklen i do loklok tarak mi levelinga rak, nenu ga raba ia min la di nuunu do nenia agat pas boro vana. Nia aga raba avolo levelinga ram la diga siam ka i. Di xasep avukat do aga rupot boro vana la di nuunu do nenu ga riki ia ude. Nia a sing tidi. Nia xopmen na sing ti limixin at na lavatbung menemen ketla a sing tinedi uga raba ia midi, mila nedi ataram. 10 Levempanga axap tarak ik lok at lakngam, la levempanga axap taram ik lok at lakngak. La maxeneng teren uga lox asilok laasen tarak. 11 Nia noxo nemen nade at na lavatbung menemen, ketla nedi diba nemen de, la nia aba vosiga u. Tamak, nenu u melemelengan. Una lok tatao di mi lololos at laasen taram, neni mo laasen uga raba ia min, kusu nedi diba lok ngan legesara kerekngan neda ta lok ngan legesara. 12 At levenaleng aga nemen eburu midi, aga lok tatao di mi nom laasen uga raba ia min. Kopmen tara atdi ga seeve, ketla legesara mun atdi naba seeve xusu na lox asorun levelinga at Lovoang Kaala.

13 Mo nga ana vot pasa u, ketla a tong na levelinga ru at na lavatbung menemen kusu nedi na diba ruuna ka lomomo xerekngan lomomo rak. 14 Nia aga raba vam di mi levelinga ram ketla limixin at na lavatbung menemen diga sok tixirixes di, mila nedi xopmen di mede at na lavatbung menemen, kerekngan nenia xopmen ia mede. 15 Lisingising tarak kopmen do una lam ka di basinge na lavatbung menemen, ketla una lok tatao di basinge mo laradi xapmek. 16 Nedi xopmen di mede at na lavatbung menemen kerekngan nenia kopmen mede at na lavatbung menemen. 17 Una suxuna di mi levelinga ram, mila levelinga ram i ruturun. 18 Aga riki nedi mi levelinga ram ti limixin at lavatbung menemen kerekngan mun uga riki ia ude at na lavatbung menemen. 19 La ana raba lorooro rak kusu ri lok tooro di la kusu nedi bok diba raba ruturun lorooro atnedi ri lugugu rak.”

Iesu Ga Sing Ti Limixin Axap Di Nuunu

20 La ne Iesu ga sing bok ne Moroa keretna, “Kopmen ana sing kusuk tidi, ketla a sing bok tinedi vetpes diba nuunu rak mumu levelinga atdi. 21 A sing u do nedi dina lok ngan mun legesara, Tamak, kerekngan mun nenu uk lok keneng tarak la nia ak lok keneng taram. Una lok li di xusu dinak lok keneng atda, kusu limixin mun at lavatbung menemen diba nuunu do nenu uga riki ia ude. 22 Aga raba nedi mi lisisixam, kerekngan uga raba ia min, kusu nedi diba ngan legesara, kerekngan neda di ngan legesara. 23 Nenia xeneng atdi la nenu xeneng tarak, kusu nedi diba tu buru rinotno, la limixin at na lavatbung menemen dibaklen i do nenu ga riki ia la uga balamu di ngan mun u balamu ia.

24 Tamak. Uga raba vam ia midi, la a vara i xusu dina nemen eburu minia ap mo lenep nenia ana nemen e, kusu diba ven lisisixam tarak, mo lisisixam nenu ga raba ia min, mila uga balamu ia avot ti luruntudum li at na lavatbung menemen.

25 Tamak. Luruptuvuk taram ik mokso, la limixin at na lavatbung menemen kopmen dinaklen u, ketla nenia aklen u, la nedi na diklen i do uga riki ia ude. 26 Aga lox asuvos u ridi, la aba lok amisik box i, kusu labalamu u ruuna i ria naba nemen atdi, la nenia bok aba nemen keneng atdi.”

Copyright information for `MMX