bPas 12:46
cSak 12:10

John 19

Paelat Ga Lok Li Lumumuat Mavana At Ne Iesu

La ne Paelat ga lox aonon ne Iesu xusu luvuttadi esep dinak pixis i. La luvuttadi esep diga vele lavatkiam tin mi livin gagas la diga lok li i ro at lavatlak teren; diga lok ka labantamon memele at loorong silok la di ga lok li box i at ne Iesu. La digat pas li ren la digak lok kalise i xeretna, “Ma emi asu minu, loorong silok me Judaia.” La melemu diga pasa lemeren.

Paelat ga vas su amu manga uto xamang la ga lok ti limixin, “Mina ronga i na; ana lok ka i ude xamang tinimi, xusu miba xasep do axo ka tavasuun kusu ri lok li lumumuat teren.” La ne Iesu ga vas su ukamang mi lavatkiam diga vele i mi laban gagas la labantamon memele. La ne Paelat ga lok tidi, “Mina ven i. Neni nga na laradi.”

Se lavamaasa silok la luvuttadi silok at loogu laplavang diga ven ne Iesu, diga xup keretna, “Mina vaxarem i ro at laxaba; mina vaxarem i ro at laxaba.”

Paelat ga lok tidi, “Nemi xa mina lok ka i, la mina vaxarem i ro at laxaba. Nenia axo vuse ka tavasuun kusu ri lok li lumumuat teren.”

Luvuttadi amgomgo diga lok tin keretna, “I epovo do neni na met mila ni ga los polo Lenavolo atnama, i lok do neni ne Nitna ne Moroa.”

Se ne Paelat ga ronga mo levelinga, neni ga marat aleng. Neni gamlong uto xeneng at loogu silok la ga sue ne Iesu xeretna, “Nenu uga laa meva?” Ketla ne Iesu goxo vorang lususue ren. 10 La ne Paelat ga lok tin, “U xopara una vaase ria? Una xasep do a ruuna lololos kusu ri soxomus asu u, la ri vaxarem box u at laxaba.”

11 Iesu ga lok tin keretna, “U ruuna lololos mavana rak mila ne Moroa mun ga raba u min. Na lavanga u lox i ria i lok kapmek, ketla mo laradi ga song araba ia ru, laxakapmek teren i silok aleng.”

12 Se ne Paelat ga ronga i na, neni ga lok tong pen i do na vuse ka tangas kusu ri soxomus asu ne Iesu. Ketla luvuttadi amgomgo diga xup lolos keretna, “Mo do una soxomus asu i, i ven ngan ta do nenu xopmen lentangas at ne Kaisar. Nom laradi ga lox asilox i ngan loorong silok, kuren la neni laradi munepen mi ne Kaisar.”

13 Se ne Paelat ga ronga na levelinga, neni ga lam asu ne Iesu ukamang la ni ga xis kopok to at loxot kitkis ting tonga linga, laasen teren do, ‘Langas Uat.’ At lavapaase Ibru diga tong i do ‘Gabata.’ 14 Na levempanga ga ravasu at lasangaun mi legepu xonaleng at laaleng gagas ti mo laaleng at leluxa at Lovovolo Pe.

La ne Paelat ga lok ti luvuttadi amgomgo, “Loorong silok atnimi na.”

15 Diga xup lolos keretna, “Sev amer i. Sev amer i. Paxarem i ro at laxaba.”

Paelat ga sue di xeretna, “Kereva, mi vara i do ana vaxarem loorong silok atnimi ro at laxaba?”

La lavamaasa silok diga vorang i rin keretna, “Loorong silok mun atnema ma ruuna i, neni ne Kaisar.”

16 La ne Paelat ga song araba ne Iesu ridi xusu dina vaxarem i ro at laxaba. La luvuttadi esep diga lok ka ne Iesu.

Diga Vaxarem Ne Iesu At Laxaba

(Mt 27:32-44; Mk 15:21-32; Lu 23:26-43)

17 La ne Iesu ga vas su la ga sosolok laxaba ren la gat pas uto at loxot, laasen teren, “Lavatlak Tongan.” At lavapaase Ibru, laasen teren do Golgata. 18 Mo go diga vaxarem ne Iesu ro at laxaba; la diga vaxarem bok legepu radi at luxaba, lara saparap lekngen tino ne Iesu la lara saparap lekngen kia; la ne Iesu ga merem kantubu atdu.

19 La ne Paelat ga malagan langas linga la diga lok li i ro vana at laxaba. Mo levelinga ga lok keretna, ‘Iesu boro Nasaret, loorong silok at limixin me Judaia.’ 20 La buaang atnedi limixin me Judaia diga us i na, mila mo loxot diga vaxarem ne Iesu ren, kopmen goxo vaxalom boro at lemenemen silok, Jerusalem. Na langas linga diga malagan i at lempapaase Ibru, Latin la Grik. 21 La lavamaasa silok diga lok ti ne Paelat, “Nemen uta malagan i do, ‘Loorong silok at limixin me Judaia.’ Ketla una malagan i do, ‘Na laradi ga lok do neni loorong silok at limixin me Judaia.”

22 La ne Paelat ga lok, “Lavanga salai ara malagan pam i, keke i xuren.”

23 Melemu at luvuttadi esep diga vaxarem ne Iesu ro at laxaba, diga lok ka levempanga singsiga ren la diga epes i ri lavanuet beleben; i epovo ri lavanuet luvuttadi esep. Ketla diga ke be lavanga singsiga ren boro maxeneng, mo lavanga singsiga di goxo sok gatga li toxot teren. Limixin diga lox i ngan legesa bantamon, ga ru ka i ro vana la ukopok epopolo.

24 La luvuttadi esep diga lok tinedi getgesara, “Nemen gat dik guta ba koxorov i, ata lu buru mi lengkonuat kusu ri lok kisip ka nege naba lok ka i.”

Anai ga vot kusu ri lox asorun levelinga xeneng at Lovoang Kaala; i lok keretna,

‘Diga epes levempanga singsiga rak kantubu atdi, la diga lu buru mi lengkonuat kusu ri lok kisip ka nege naba lok ka labantamon tarak.’ a 

La luvuttadi esep diga lox i xerepmo.

25 Leventaba lavakin diga tu auret saparap laxaba at ne Iesu; nenen, la neton, la ne Maria, latkin at ne Kliopas, la ne Maria Magdalene. 26 Iesu ga ven nenen la laradi loklok ka anasa ren, neni ga vavara aleng i, duga tu go; kuren la neni ga lok ti nenen keretna, “Neni lamdak taram.” 27 La neni ga lok ti laradi loklok ka anasa ren keretna, “Neni nenam.” Ga ru ka i ap mo loxonaleng mo laradi loklok ka anasa ga lok ka i xusu na lok tatao i ro xolonu ren.

Lanmet At Ne Iesu

(Mt 27:45-56; Mk 18:33-41; Lu 23:44-49)

28 Melemu ne Iesu gaklen i do levempanga axap mo diga lok axap pam i ri lox asorun levelinga xeneng at Lovoang Kaala mumu i; neni ga lok, “A minu.” 29 Lara lavatbuxom tuntu mo ga nemen go, ga umsu mi lavaen mamao. Diga lox abeles loxonbantamon teren la diga lok li i at loxonuna isop, la diga lox aurur i saparap lungusno at ne Iesu. 30 Iesu ga in mo lavaen la melemu ga lok keretna, “I xap ta.” La lavatlak teren ga riding si la neni ga met.

Laradi Esep Ga Bo Labangbaangis At Ne Iesu Mi Lososo

31 Mo laaleng ni laaleng gagas, la laaleng melemu ren ni laaleng kaala, la luvuttadi amgomgo di goxopara i do labarongan nak lok at larakaba at laaleng kaala, mila ti mo laaleng kaala, ni laaleng silok tinotno. Kuren la diga sue ne Paelat do luvuttadi esep dina sep pit lengkangkedek at luvuttadi diga vaxarem di at larakaba xusu dinaba remet soso la dina lox asi nedi basinge larakaba. 32 Kuren la luvuttadi esep digat pas la diga sep pit lengkangkedek ap mo luradi duga merem at luxaba saparap ne Iesu. 33 Ketla se diga vot go at ne Iesu, diga ven i do neni ga met pam; kuren la di goxo sep pit luxangkedek teren. 34 Ketla lara laradi esep ga bo rup mi lososo ro at labangbaangis at ne Iesu la soso mun lada eburu mi ladan ga sen su.

35 Lara laradi ga ven na levempanga, neni i paase asu i ri limixin la levelinga ren i ruturun. La iklen i do levelinga ren i ruturun la i tong asu i xusu nemi bok mina nuunu at ne Iesu. 36 Na levempanga ga ravasu xusu ri lox asorun levelinga at Lovoang Kaala, i lok keretna,

‘Kopmen tekosi ren naba repit.’ b 

37 La lara lenep at Lovoang Kaala i lok bok keretna,

‘Limixin diba ven ti mo laradi diga bo i mi lososo.’ c 

Digak Mit Labantuxu At Ne Iesu

(Mt 27:56-61; Mk 15:42-47; Lu 23:50-56)

38 Melemu at nai, Josep boro at lemenemen Arimatia, ga sing ne Paelat do ni na lok ka labantuxu at ne Iesu. Josep neni laradi loklok ka anasa at ne Iesu. Ketla neni goxo mumu i at lasaxaven mila neni ga marat at luvuttadi amgomgo. Paelat ga tong i rin do i epovo do ni na lok ka labantuxu at ne Iesu. Kuren la ne Josep gamlong la ga lox asi labantuxu ren. 39 Nikodimas, gano ga mu bung kusu na vaase mi ne Iesu, neni ga emu mi ne Josep, gap kip laxadan somavak ti lok li at labantuxu at ne Iesu. Mo ladan ga mumuat aleng. 40 Nedu duga lok kaka labantuxu at ne Iesu la duga vaxais i mi labantamon di bom tongan min la duga lok li laxadan somavak teren; kerepmo limixin me Judaia diga mumu asu i na ngan leretere atdi. 41 Lara laraamang mo ga nemen saparap mo loxot diga vaxarem li ne Iesu ren, la keneng teren lara lamaaut maxat mo gak lok, la limixin di goxovisi li rongan go. 42 Mo lamaaut ga nemen auret, kuren la diga lok li soso mun ne Iesu mila mo laaleng ni laaleng gagas at limixin me Judaia ri laaleng kaala.

Copyright information for `MMX