John 7

Iesu Mi Luvutneton

Melemu at nai, Iesu gat pas at levenmenemen to Galili; ni goxo vara i xusu nat pas to Judaia, mila luvuttadi amgomgo diga vara i xusu dina sev amer i. Lara leluxa at leme Judaia mo ga sixit auret ta. Laasen at na leluxa do, ‘Leluxa at Laraugu Xukuxut.’ Luvutneton ne Iesu diga lok tin, “Una vas kaxat basinge na loxot, la unat pas uto Judaia ti mo leluxa, kusu luvuttadi loklok ka anasa ram diba ven levempanga sangsangu uba lox i. Do u vara i do limixin dinaklen u, nemen uta nemen alipe. Nenu uk lok levempanga sangsangu, kuren la una lox asuvos u ri limixin axap.” Diga tong asu i na mila kopmen tara atdi luvutneton ne Iesu ga nuunu ren.

La ne Iesu ga lok tidi, “Loxonaleng ti lox asuvos ia xovisi na vot. I epovo do nemi minat pas uto at leluxa, mila limixin at lavatkangka di noxo musak nimi; ketla diba musax ia, mila nia a tong amisix i do loklok atdi i lok kapmek. Minat pas ti mo leluxa. Nenia noxot pas soso rin, mila loxonaleng ti lox asuvos ia xovisi na vot.” Ni ga tong i na, la neni ga nemen go Galili.

Iesu Gak Lok At Leluxa At Laraugu Xukuxut

10 Melemu at luvutneton digat pas uto at leluxa, Iesu bok gat pas. Kusuk mun neni goxot pas asuvos, ni gat pas epep mun kusu limixin di noxoklen i do neni mo gak lok ap mo leluxa. 11 Luvuttadi amgomgo diga reven tin go at leluxa, la diga susue mo limixin diga vot go at leluxa, “Ua nga i no?”

12 Buaang atnedi limixin diga paase siksikma mu ne Iesu. La leventaba luvuttadi diga lok, “Neni lagale laradi.”

Leventaba diga lok, “Kopmen, neni i sasar asoogong buaang limixin.”
13 Ketla kopmen teta goxo paase mumu i at lasaxaven, mila diga marat at luvuttadi amgomgo.

14 At laaleng sev avanuet ap mo leluxa, Iesu ga beles to xeneng at loogu laplavang la ga ru ka i xusu na anasa limixin. 15 Luvuttadi amgomgo diga sangu aleng la diga esue, “Na laradi goxot pas ti loklox ase la ga lok ka na lakleklen meva?”

16 Iesu ga vorang i ridi, “Lavanga salai nia a anasa min kopmen at lakleklen tarak, ketla boro ap mo laradi ga riki ia ude. 17 Do tara i vara i do na lok levempanga ne Moroa i vara i, neni nabaklen kibis ka i do nenia a anasa mi levelinga boro at ne Moroa, kopla a paase aru mene nga ia mi lololos tarak. 18 Laradi do i paase aru xa i, neni i ngan do i lox asilok axa i. Do tara i vara i do na lox asilok mo lara ga riki i, neni i paase ruturun la kopmen taxaxarang na nemen teren. 19 Moses ga raba nemi mi Lenavolo. Ketla kopmen teta atnimi ik lox epovo na Lenavolo. La tila ba mik lok tong pen i do mina sev amer ia?”

20 La limixin diga lok, “Lagas kapmek i nemen keneng taram! Nege nga mo ik lok do nap sev amer u?”

21 La ne Iesu ga vorang i ridi xeretna, “Aga lok legesa vanga sangsangu la nemi axap miga sangu. 22 Moses ga tong i rinimi do mina rivit kepe levengkontuxu at laxamdak atnimi. Kopmen ne Moses ketla lavalabat atnimi mo diga vaxaru ka i; miba vit kepe levengkontuxu at laxamdak lixilik atnimi at laaleng kaala. 23 Mo do mina vit tamdak at laaleng kaala xusu mi noxo los polo Lenavolo, tila mi musak mila nia ga lox aroo laradi at laaleng kaala? 24 Nemen mita ila mumu ia mi lodoxoma at na lavatkangka, ketla mina ila mumu ia mi lodoxoma avukat boro at ne Moroa.”

Agut Neni Na Lanarong

25 Ap mo loxonaleng leventaba luvuttadi go Jerusalem diga lok, “Agut neni vam na laradi, luvuttadi amgomgo di lok do na sev amer i. 26 Mina ven ba i neni i anasa at lemeren limixin axap. La kopmen tara na paase tangarang i. Agut limixin amgomgo diklen i do neni Lanarong. 27 Ketla do Lanarong na vot, teta noxoklen i do neni meva. La nedik ataklen na laradi do neni ga laa meva.”

28 La at loxonaleng ne Iesu ga anasa ro at loogu laplavang, neni ga vaase lolos keretna, “I ruturun do nemi miklen ia, la miklen i do nia aga laa meva. Ketla agoxot pas ude at lavavara axa rak. Mo lara ga riki ia, neni luruturun. La nemi mixoklen i. 29 Ketla nenia aklen i, mila nenia agat pas boro ren la neni ga riki ia ude.”

30 Melemu diga lok tong i do dina ranga alis i, ketla kopmen teta goxo long tu ren, mila loxonaleng teren goxovisi epovo. 31 Ketla buaang atnedi limixin diga nuunu ren diga lok keretna, “Na laradi i lok lempanga sangsangu i silok aleng, kuren la ixo epovo do tara vetpes na vot ngan Lanarong la na lok lempanga i silok tin?”

Luvuttadi Amgomgo Diga Riki Lentaba Uto Saparap Ne Iesu

32 Lubung Parisi diga ronga limixin diga paase siksikma mu ne Iesu la levelinga ni ga tong i. Kuren la nedi eburu mi lavamaasa silok diga riki leventaba luvuttadi rutu mu at loogu laplavang uto at ne Iesu xusu dina ranga alis ka i.

33 Iesu ga lok, “A noxo nemen abao eburu minimi la melemu ba anat pas ba uto saparap mo lara ga riki ia. 34 Miba reven tia, ketla minoxo vuse ka ia, mila lenep nia ana nemen teren, nemi mixo epovo do minat pas uve.”

35 Luvuttadi amgomgo diga epaase xantubu atdi xeretna, “I lok do ni mo nat pas ua xusu nedik noxo vuse ka i. Agut neni nabat pas uto at tara temenemen silok at limixin boro Grik; no limixin me Judaia dik lox e la neni naba anasa limixin boro Grik. 36 Neni i lok do, ‘Miba reven tia, ketla mi noxo vuse ka ia.’ La i lok bok do, ‘Nemi mixo epovo do minat pas ti mo loxot nenia aba nemen e.’ Ua lavasuun at na levelinga?”

Ladan Im Taba Lorooro

37 At laaleng kavaxap ap mo leluxa ni laaleng silok. At mo laaleng, ne Iesu ga ru upana la ga xup lolos keretna, “Do tara go i minu, neni na vosiga ia la na inin. 38 I ngan Lovoang Kaala i lok, ‘Do tara na nuunu rak, laxadan im taba lorooro naba sesen su boro xeneng at lorooro ren.” 39 Iesu ga vaase i na mumu Loroonan Kaala. Nedi diga nuunu at ne Iesu, diga ruuna ka i. Ap mo levenaleng ne Moroa goxovisi raba Loroonan Kaala, mila ne Iesu goxovisi urut uto vana ri lixitkis orong teren.

Limixin Diga Paase Mumu Ne Iesu La Diga Epeseves

40 Buaang atnedi limixin keneng ap mo laneelen diga ronga ne Iesu ga tong na levelinga la diga lok, “I ruturun aleng do na laradi, neni mo leeme vapaase alii, ne Moses ga paase alii min.”

41 La leventaba diga lok keretna, “Neni Lanarong.”

Ketla leventaba vetpes diga lok, “Lanarong noxo laa boro Galili.
42 Lovoang Kaala i tong i do Lanarong naba vot boro at libibinat at ne Devit, la diba visix i ro Betilem, lemenemen ne Devit gak lox e.” 43 Kuren la limixin diga epeseves mumu ne Iesu. 44 Leventaba diga lok do dina ranga alis i, ketla kopmen teta goxo long tu ren.

Luvuttadi Amgomgo Di Goxo Nuunu At Ne Iesu

45 Luvuttadi rutu mu at loogu laplavang digamlong uto saparap lavamaasa silok mi lubung Parisi, la lavamaasa silok mi lubung Parisi diga lok, “Tila mixo lok ka i ude?”

46 La luvuttadi rutu mu at loogu laplavang diga lok, “Kopmen tara i paase asu levelinga mumuat kerekngan mo laradi.”

47 La lubung Parisi diga lok, “Kereva, i bala vukpuk bok nemi? 48 Kereva, tara at luvuttadi amgomgo kopla tara at lubung Parisi go i nuunu ren? 49 Kopmen tinotno! Ana limixin kopmen dinaklen tempanga xeneng at Lenavolo at ne Moses, kuren la lasaxaek i mumu di.”

50 Nikodimas neni lara atdi, no migo neni ga vosiga ne Iesu at lara laxanimin. Neni ga lok tidi, 51 “At Lenavolo atdik ata xo lok li lumumuat mavana at tara, se do dia ronga linga vam teren kusu ri vuse ka lai neni ga lox i.”

52 Diga vorang levelinga ren mi levelinga mukmusak, diga lok keretna, “Agut nenu bok laradi gamasa boro Galili? Una ven avukat Lovoang kaala la uba xasep do kopmen teeme vapaase alii naba vot boro Galili.” 53 [Melemu nedi axap diga epeseves la digat pas ukolonu.

Copyright information for `MMX