John 9

Iesu Ga Lox Axasep Luxatli Main At Laradi

At lara laaleng Iesu gat pas at langa, la ni ga ven lara laradi luxatli ren ga main, nenen ga visik axa i min kuren. La luvuttadi loklok ka anasa at ne Iesu diga sue i, “Rabai, laxakapmek atnege ga lox i la luxatli ren ga main? Ateren kopla at nenen mi ne temen?” Iesu ga vorang i ridi xeretna, “Luxatli ren ga main kopmen toxot at laxapmek teren kopla at nenen mi ne temen. Luxatli ren i main kusu ri lox asuusu lololos at ne Moroa at lorooro ren. Levenaleng na ik lok kusu atak lok lugugu ap mo lara ga riki ia ude. Ketla laaleng naba vot la ata noxo epovo xusu ata gugu. I lok ngan laxangking move i soosoo la ata lok leven gugu, ketla dola lamain na vot, ata noxo gugu bok ba. Nenia move a nemen nade at lavatbung menemen la nenia laxasep ti limixin at na lavatbung menemen axap.”

Melemu at na levelinga ren, neni ga xalaubis uto at laxangka; la ga gis nom loxongkangka, ni ga lox amulum i la ni ga lok li i ro at luxatli at nom laradi. La neni ga lok tin, “Unat pas la una gos lamaram to at lavatdan kis Siloam.” Lavasuun at na laasen do, ‘Gariki.’ La mo laradi ga vas kaxat, la ga gos lemeren la gamlong uto xolonu, luxatli ren monga ga repalas pam, ga reven ta.

Nedi digak lox aurer i, la nedi bok limixin diga reven i ga ngising panga, avot be ri na lavanga sangsangu, la diga esue xeretna, “Kereva, neni vam na laradi no gat kis la ga ngising panga?” Leventaba diga lok, “Neni vam.”

Ketla leventaba vetpes diga lok, “Kopmen, ketla neni i ven ngan i.”

Ketla mo laradi xa ga lok, “Nenia vam mo laradi.”

10 La diga sue lolos i, “Luxatli ram i lox avukat kereva?”

11 La ni ga vorang i ridi xeretna, “Lara laradi, laasen teren ne Iesu i xalaubis amumulum loxongkangka, la ia gis i de at luxatli rak, la ia lok tia do anat pas uto Siloam la ana gos lamarak. La nia a vas kaxat la ise do nia a gos lamarak, ara ven bok ba.”

12 La diga sue i, “Ua nga mo laradi?”

La ni ga lok, “Axoklen i.”

Lubung Parisi Diga Ven Mumu Na Laradi

13 Melemu mo limixin diga lok ka na laradi, luxatli ren ga main uto at lubung Parisi. 14 Mo laaleng ne Iesu ga xalaubis loxongkangka la ga lox avukat luxatli ren, ni laaleng kaala. 15 Kuren la lubung Parisi diga sue mo laradi do luxatli ren ga lox avukat kereva. La ni ga lok tidi, “Mo laradi i lok li loxongkangka mumulum at luxatli rak, la a gos lamarak la monga a epovo xusu ana reven.”

16 Leventaba lubung Parisi diga lok, “Laradi i lox i na, kopmen boro at ne Moroa mila i los polo Lenavolo.”

Ketla leventaba vetpes diga lok, “Neni xopmen laradi xapmek mila laradi kapmek ixo epovo xusu na lok tevempanga sangsangu ngan i na.” La lekarakat ga ravasu xantubu atdi.

17 La lubung Parisi diga sue amu manga mo laradi, “U lok do neni i lox avukat luxatli ram. Kereva lodoxoma ram tin?”

La neni ga vorang i ridi xeretna, “Neni leeme vapaase alii.”

18 La luvuttadi amgomgo di goxo nuunu do luxatli ren ga main la mo nga neni ga epovo do na reven; kuren la diga riki lara laradi xusu na lam ka ne temen mi nenen. 19 La diga sue du, “Lamdak atnumu na? La kereva, at laaleng nenen ga visix i, luxatli ren ga main? I lok kereva la neni i reven manga?”

20 Temen mi ne nenen duga vorang i ridi xeretna, “Maklen i do neni lamdak atnama, la maklen box i do maga visix i, luxatli ren ga main. 21 Ketla monga maxoklen i do i lok kereva la i epovo xusu na reven; la maxoklen box i do nege ga lox avukat luxatli ren. Mina sue i, neni laradi silok ta la neni xa ba vorang levesusue atnimi.” 22 Temen mi nenen duga tong i na mila duga marat at luvuttadi amgomgo. Luvuttadi amgomgo diga tong li vam levelinga do tara na tong i do ne Iesu neni Lanarong, diba sep pepe i xusu neni noxo vubeles bok ba uto at loogu singising. 23 Na lavasuun teren la ne temen mi nenen mo laradi duga lok, “Neni laradi silok ta; mina sue i.”

24 Diga ro ka amu manga mo laradi, luxatli ren ga main la diga lok tin, “Una xaape de melamgo at ne Moroa do nenu una vaase ruturun. Maklen i do na laradi ga lox avukar u, ni laradi xapmek.”

25 Mo laradi ga vorang i ridi xeretna, “Axoklen i do neni laradi xapmek kopla kopmen. Ketla leges avanga mene aklen i xeretna, luxatli rak ga main, ketla monga a reven avukat.”

26 Diga sue i, “I lok lavanga salai ru? La i lok arepalas luxatli ram kereva?”

27 La mo laradi ga lok tidi, “Ara tong pam i rinimi, la nemi mixo ronga i. Tila mik lok do mina ronga amu manga i? Agut nemi bok, mi vara i do, mina lok ngan luvuttadi loklok ka anasa ren.”

28 Diga vaase kapmek tin la diga lok tin keretna, “Nenu laradi loklok ka anasa ren, nema luvuttadi loklok ka anasa at ne Moses. 29 Maklen i do ne Moroa ga paase ri ne Moses; ketla ti nom laradi maxoklen tinotno i do neni ga laa meva.”

30 Mo laradi ga vorang i ridi xeretna, “Lavanga vetpes na. Mo laradi i lox avukat luxatli rak la mixoklen i do neni i laa meva. 31 Ataklen i do ne Moroa kopmen nang tonga nedi limixin kapmek; ketla ing tonga mun nedi luvuttadi di lotu saparav i la nedi luvuttadi di mu asu lavavara ren. 32 Ga ru ka i at lurutu kaxat at na lavatbung menemen, goxovisi tara ga lox arepalas tuxatli at taradi, nenen ga visik axa i, la luxatli ren ga main. 33 Do mo laradi, xopmen ne Moroa nak lox eburu min, neni gita xo epovo na lox arepalas luxatli rak ngan tai na.”

34 La diga lok tin keretna, “Nenu u umsu mi laxapmek ga ru ka i at nenam ga visix u, la kereva ba uk lok tong i do una lox ase nama?” Kuren la diga sep pepe i xusu neni noxo vubeles bok ba uto at loogu singising.

Luxatli At Lebelen Laradi I Main

35 Iesu ga ronga i do diga sep pepe mo laradi. La ni ga vosiga i la ga sue i, “Kereva, u nuunu at Laradi Mevana?”

36 Mo laradi ga lok, “Leeme silok, una tong i ria do neni nege, kusu anaba nuunu ren.”

37 Iesu ga lok tin, “Ura ven pam i, la neni mo nga i epaase eburu minu.”

38 Mo laradi ga lok, “Leeme Silok, a nuunu ram.” La ni ga xis tiktikbu mi luvatgulom teren to melamgo at ne Iesu la ga lotu saparav i.

39 Iesu ga lok tin, “Aga vot nade at lavatbung menemen kusu ri ila mu loklok at limixin, la nedi lengkatli main diba reven avukat, la nedi di reven, levengkatli atdi ba main.”

40 Leventaba lubung Parisi digak lok go eburu min, diga ronga na levelinga, la diga sue i, “U doxoma i do nema bok lengkatli atnama i main?”

41 Iesu ga vorang i ridi xeretna, “Dola lengkatli atnimi i main, i lox asuusu i do kopmen taxakapmek nak lok atnimi. Ketla mi tong i do, ‘Ma epovo ri reven;’ la lavasuun at nom levelinga do nemi move mi bixurun mi laxakapmek.”

Copyright information for `MMX