Luke 10

Iesu Ga Riki Aonon Lavanuti Sangaun Mi Legepura

Melemu at nai Leeme Silok ga soxolik ka bok lavanuti sangaun mi legepura luvuttadi la ga riki aonon di, legepura, legepura, kusu dinamgo rin la dina vavang mi Lagale Lavavang uto at lengkot axap, la at levenmenemen, neni ga lok do nabat pas ue. Neni ga paase poovo mi limixin di goxo nuunu ren. Ni ga lok, “Langsangan laraamang mo ira mukun pam, ketla ixo buaang nedi luvuttadi gugu xusu ti lox abeles leveluxa ukeneng at laraugu. Kuren la mina sing laradi loklok tatao at laraamang kusu neni naba riki asu tuvuttadi xusu ri lox abeles leveluxa. Minat pas uto at laramenemen! Nenia ana sak tiki nemi i ngan lubungsipsip uto xantubu at lubungman atat. Nemen mita xip kaka tengkon tonomka, kopla teventat, kopla tempanga vatpas; nemen gat mita ru at langas kusu mina paase aleng mi tara.

Dola mina beles ukeneng at toogu, lavanga avot mina tong i xeretna, ‘Lenmila na nemen at na loogu.’ Mo do laradi at lenmila i nemen go ap mo loogu, mina ke nom lenmila atnimi na nemen eburu min; mo do xopmen, mina lok kaka amlong nom lenmila basinge di. Mina nemen at nom leges ogu mene nga; i lox avukat do mina anan la mina inin lempanga salai dina raba nimi min, mila laradi gugu i epovo xusu na lok kaka luunun teren. Nemi mina nemen at leges ogu mene nga ap mo lemenemen.

Mo do mina beles at temenemen silok la dina vaase momo rangarang nimi, mina anan lempanga anan dina lox agagas li i rinimi. Mina lox aroo levenanmeres ap mo lemenemen, la mina lok tinedi limixin mego do, ‘Langas ti Linintoo at ne Moroa monga i auret.’ 10 Ket do nemi mina beles at temenemen, la kopmen dina vaase momo rangarang nimi mi lomomo go, mina vas su uto at langas, la mina lok tidi xeretna, 11 ‘Laxakup at na lemenemen atnimi no ma vas kaka i mi lengkangkedek atnama, ma semla xepe raba nimi min, kusu ri lox asuusu lebelemamao at ne Moroa rinimi; ketla mina doxoma i na, langas ti Linintoo at ne Moroa monga i auret!’ 12 A tong i rinimi do at laaleng ete, Moroa noxo lox asu lumumuat silok ti mo limixin kapmek to Sodom, ketla ti mo limixin tongtonga xepe, lumumuat naba silok aleng tidi.”

Levenmenemen Kopmen Di Goxo Nuunu

(Mt 11:20-24)

13 La ne Iesu ga lok bok, “Naba lok kapmek aleng tinemi limixin to Korasin! La naba lok kapmek aleng bok tinemi limixin to Betsaida! Mo do na levempanga sangsangu nia ga lox i ro atnimi, dita lox i ro Taia la Sidon, gano migomgo limixin mego, nedi gita leeng pam la gita etara mun lengkontamon kapmek, la gita reevi vam laxakup at lengkot atdi kusu ri lox asuusu i do dira leeng basinge vam laxakapmek atdi! 14 At laaleng ete Moroa naba lox asuusu lumumuat teren uto ri limixin at lumenemen Taia la Sidon, ketla langsangan lumumuat naba nemen atnimi. 15 La nemi limixin to Kaprenaum! Mi vavara i do mina silok ti limixin axap, ketla ne Moroa ba sok gingin asi minimi uto at lemenemen songsongot!”

16 La ne Iesu ga lok ti luvuttadi loklok ka anasa ren keretna, “Do nege ing tonga nimi, neni ing tonga ia; la do nege i sok tixirixes nimi, i sok tixirixes ia; la do nege i sok tixirixes ia, i sok tixirixes ne Moroa ga riki ia ude.”

Lomlong At Lavanuti Sangaun Mi Legepura

17 Lavanuti sangaun mi legepura luvuttadi digamlong, diga umsu mi langsangan lomomo la diga lok, “Leeme Silok, lubunggas diga ronga res atnama mo do maga vaase lolos tidi mi laasen taram!”

18 La ne Iesu ga vorang i ridi xeretna, “Aga ven lixitkis orong at ne Satan ga xap la ni ga subu soso boro vana at laxalibet ngan lavanga i mam. 19 Mina ronga i na. Ara raba vam nimi mi lololos, kusu mibat pas mavana at laxasii la at laxan aksoxomet, la mavana bok at lololos at ne Satan la kopmen tepanga naba lox asongot nimi. 20 Ketla nemen mita momo mumu i do lubunggas di ronga res atnimi; ketla mina momo mila levenasen atnimi, Moroa ira malagan pam i ro at laxalibet.”

Iesu Ga Lok Momo

(Mt 11:25-27; 13:16-17)

21 Ap mo mun loxonaleng Loroonan Kaala ga suxuna ne Iesu mi lomomo, la ni ga lok, “Tamak, nenu Leeme Silok at laxalibet mi lavatbung menemen! A tong avukat tu mila ugara lox ase vam nedi limixin gamasa mi na lempanga; la uga lipe i basinge limixin leklen la limixin dokdoxoma. I ruturun, Tamak. Anai uga lox i mi lodoxoma la lomomo ram.

22 Tamak. Ura raba vam ia mi lempanga axap. Kopmen teta naklen nege Lamdak taram, ketla Tamak kusuk; la kopmen teta naklen nege ne Tamak, ketla Lamdak kusuk mun, la tinedi mun Lamdak i vara i kusu na lox ase di min.”

23 La ne Iesu eburu mi luvuttadi loklok ka anasa ren diga nemen kusuk la neni ga milik alu rinedi la ga lok tinedi, “Lomomo mun tinimi mi ven na lempanga! 24 A tong i rinimi do buaang lavaeme vapaase alii la lavaorong silok diga vara i do dina ven mo lempanga nemi mira ven pam i, ketla di goxo epovo; la diga vara i do dina ronga i mo levelinga mira ronga vam i, ketla di goxo epovo.”

Lavapaase Poovo Ti Lagale Laradi Boro Samaria

25 At lara laaleng lara laradi loklox ase at Lenavolo ga xatu kaxat la ga doma i do na lok tong ne Iesu. Ni ga lok, “Laradi loklox ase. Anaba lok lavanga salai xusu ri lok kaka lorooro avolo.”

26 Iesu ga lok tin, “Lovoang Kaala i tong i do xereva?”

27 La mo laradi ga vorang i rin keretna, “Mina balamu Leeme Silok ne Moroa atnimi mi lebelen nimi axap, mi loroonan axap atnimi, mi lololos axap atnimi, la mi levendoxoma axap atnimi; la mina balamu mo limixin di nemen saparap nimi kerekngan pam u balamu u.”

28 Iesu ga vorang i rin keretna, “Lesepsepo ram ik mokso. Una lox i xuren la uba rooro.”

29 Ketla laradi loklox ase at Lenavolo ga vara i xusu na lok li i ri lomokmokso, kuren la ni ga lok ti ne Iesu “Nege mo lara i nemen saparav ia?”

30 Iesu ga vorang i rin, “Lara laradi ga vas kaxat boro Jerusalem uto Jeriko, la limixin kipkip pilo diga xala i, la diga sak mus pes levesingsiga ren, la diga sev i la diga on basinge i ga met aroo. 31 Ap mo mene loxonaleng lara lamaasa gat pas mu mo langas; se neni ga ven i nom laradi, neni ga vas polo i uto at lisigege ngas. 32 La lara laradi gugu at loogu laplavang, neni bok ga vas polo go, la ga ven nom laradi, la ga vas polo manga i uto at lisigege ngas. 33 Ketla leeme boro Samaria mo ga mumu ngas ga rupot saparav i, la se neni ga ven i nom laradi, lebelen ga lok mu i. 34 Ni gat pas saparav i, la ga soli laxadan momonok at lo olip eburu mi lavaen to at levenin kooxing teren, la ga is pe mo levenin kooxing mi labantamon; la neni ga xip kaka nom laradi uto at lodongki ren la ga lok kaka i uto at loogu mikmidi; la neni gak lok tatao i. 35 Ap mo laaleng petpes ni ga lok kaka legepu denarias la ga raba mo laradi gak lok tatao mo loogu min, la ni ga lok ti mo laradi gak lok tatao loogu. ‘Unak lok tatao na laradi, mo do nia anamlong bok at na langas, aba un amlong bok lempanga ram uga lok tooro na laradi min.”

36 La ne Iesu ga lok, “At lodoxoma ram ua lara atdi na lavantun ga balamu aleng mo laradi limixin kipkip pilo diga sev i?”

37 Laradi loklox ase at Lenavolo ga vorang i rin keretna, “Mo laradi ga lok tooro i.”

Iesu ga lok tin, “Una lok mun i xuren.”

Iesu Ga Vot Pasa Ne Mata Mi Ne Maria

38 Iesu eburu mi luvuttadi loklok ka anasa ren diga mumu mo langas la digat pas uto at lara lemenemen; la lara latkin, laasen teren ne Mata, ga xup kaka di uto at loogu ren. 39 Neni ga ruuna lara neton, laasen teren ne Maria, mo gat kis saparap luxangkedek at Leeme Silok la gang tonga leveloklox ase ren. 40 Ketla ne Mata gak lox angtang solo mavana at leven gugu neni ga lok do na lox i; kuren la neni ga vas saparap ne Iesu la ga lok, “Leeme Silok, uxo doxoma ia do netak i ke xusux ia xusu anak lox angtang mi na lempanga? Tong i rin kusu nat pas ude la neni na lok tooro box ia!”

41 Leeme Silok ga lok tin, “Mata, Mata! Uk lok bukbulu aleng la urak lox angtang mavana at laxampanga solo. 42 Ketla leges avanga mun uk pakes tin. Maria i vara i do nang tonga leveloklox ase rak, la tara noxo lok pes i na basinge i.” Lisingising

Copyright information for `MMX