Luke 15

Lisipsip Ga Soogong

(Mt 18:12-14)

At lara laaleng buaang nedi luvuttadi loklok ka pilas mi luvuttadi xapmek diga vot kusu dinang tonga ne Iesu. La lubung Parisi eburu mi luvuttadi loklox ase at Lenavolo diga paase ngunungun mu ne Iesu. Diga lok, “Ana laradi ik lox avukat ti limixin kapmek la neni i anan eburu bok midi!”

La ne Iesu ga vaase ridi mi lara lavapaase poovo xeretna. “Dola tara atnimi i ruuna legesa sangaun kobot (100) sipsip la legesara atdi na soogong, neni naba lok lavanga salai? Neni naba on basinge lavasik sangaun mi lavasik laxasipsip to at laxampivilis atdi, la nat pas kusu na ven ti nom legesara no ga vas soogong, se rinotno neni ira long lenget ka i. La neni ba lok momo aleng la na lok li i at laxaka ren, la na xip kaka amlong i uto xolonu. Melemu neni ba xup bubua ka larapen tangas teren la nedi lentaba di nemen aurer i, la na lok tidi, ‘Ata momo aleng mila ara vuse ka vam lisipsip tarak ga vas soogong.’ Kuren mun, la a tong i rinimi, do langsangan lomomo aleng kantubu atnedi di nemen to vana at laxalibet mila tegesa radi xapmek neni i leeng basinge laxakapmek teren; ketla ti lavasik sangaun mi lavasik, lomomo lixilik mun tinedi ro vana at laxalibet; mila nedi dirak mokso vam la dixok pakes ti leeng.

Lavapaase Poovo Ti Legesuxuven Pilas

Dola tatkin na ruuna lasangaun denarias la na xip kepe teges uxuven atdi, lavanga salai neni naba lox i? Neni naba sox aros lababao, la na suxu loogu ren, la ba reven avukat at lengkot axap se neni na vuse ka i. Dola neni na vuse ka i, neni ba xup bubua ka larapen tangas teren la nedi di nemen aurer i, la na lok tidi, ‘A momo aleng mila ara vuse ka vam legesuxuven denarias tarak, no aga xip kepe i. Ata lok leluxa silok!’ 10 A tong i rinimi do, kerepmo lubung angelo at ne Moroa diba momo aleng do tegesaradi xapmek neni i leeng basinge laxakapmek teren.”

Lavapaase Poovo Ri Lamdak Aau Ga On Basinge Ne Temen

11 La ne Iesu ga lok bok tidi xeretna, “Lara laradi ga ruuna legepu madak. 12 Lara mumu ga lok ti ne temen, ‘Tamak, una raba nga ia mi lenep tarak keneng at laplus taram.’ Kuren la temen nom lamdak ga epes nom lempanga kantubu at lumdak teren.

13 Melemu at lentaba levenaleng lamdak aau ga xip kaka lempanga ren la ga vas kaxat uto vaxalom at lara lenep petpes, la mo go neni ga gosogos gamasa mun mi nom lapnovos teren ti laxaloklok kapmek. 14 Neni ga soxepe axap nom lempanga neni ga ruuna i. La langsangan loroxo ga vot ap mo lenep silok axap, la neni ga nemen gamasa nga la goxopmen ta tempanga neni ga ruuna i. 15 Kuren la neni gat pas kusu na gugu at lara laradi ap mo lenep silok, la mo laradi ga riki i uto at lang kolonu bo ren kusu na lok tatao lababo. 16 Ni ga vara aleng i do neni naba anan levenbasa at lababo diga anan i. La kopmen teta goxom taba i mi teveluxa kusu rin ti anan.

17 At lara laaleng neni ga ven kibis lorooro salai neni ga ruuna i, la ga lok, ‘Limixin gugu at ne tamak di ruuna laxampanga anan solo xusu ridi ri anan, la nenia na a lok do ana sala nga! 18 Ana vas kaxat la anamlong uto at ne tamak la ana lok, ‘Tamak, agara lok pam laxakapmek ti ne Moroa la tu bok. 19 Ixo epovo bok ba xusu una tong ia do lamdak taram; una lox ia ngan lasaxaruki ram.’ 20 Kuren la ga vas kaxat uto at ne temen.

Neni move gat pas to vaxalom la ne temen ga ven kibis ka i; la lebelen ga umsu mi labalamu la ni ga sixit, la ga ot kongkodan ka lamdak teren, la ga nes i.

21 La lamdak ga lok, ‘Tamak, agara lok pam laxakapmek ti ne Moroa la tu bok. Ixo epovo bok ba xusu una tong ia do lamdak taram.’

22 Ketla ne temen ga ro ka lavasaxaruki ren la ga lok, ‘Soso mun! Mina lok kaka lisingsiga nunuan tarak, la mina vaxasiga i min. Mina lok li lurung molot at lekngen la luvanga vatpas to at luxangkedek teren. 23 La minat pas la mina lok ka lubulumaxao maxat, la mina sev amer i, la ata lok laanan la ata momo! 24 Mila ana lamdak tarak ga met, ketla ira roo xat amlong pam; ga vuktanga, ketla ana nga ara lok ka amlong pam i.’ La diga ru ka leluxa.

25 Lamdak avot, ga nemen to at laraamang ga xanangking tubu. At lomlong teren boro xataamang, neni ga ronga lagamit gang teng at loxonaleng neni ga vas auret loogu. 26 La ni ga ro ka lara lasaxaruki la ga sue i, ‘Lavanga salai mo?’ 27 La lasaxaruki ga lok tin, ‘Netam iramlong pam ukolonu, la ne tamam i sep ka lubulumaxao maxat, mila neni ira lok ka amlong pam lamdak teren mi lorooro avukat at labantuxu ren.

28 Lamdak avot ga musak la ni goxo vara i xusu na beles uto xeneng at loogu; kuren la ne temen ga vas su ukamang la ga sing lolos i xusu na beles ukeneng. 29 La lamdak ga lok ti ne temen, ‘At na laxanmaares aga gugu ngan lasaxaruki ram la a goxong tonga xepe levelinga ram. La lavanga salai ugara raba vam ia min? Kopmen tinotno tanatme nenu gita raba ia min kusu ria ri lok leluxa eburu mi larapen tangas tarak! 30 Ketla ana lamdak taram ga gosogos gamasa mi lapnovos taram at loklok ting longka lavakin, la se neni imlong ukolonu nenu ura sep ka ba lubulumaxao maxat tin!’

31 Temen ga vorang amlong i rin keretna, ‘Nuruk, amisik nenu u nemen eburu minia la lempanga axap nia a ruuna i ataram. 32 Ketla ata lok leluxa la ata momo, mila netam ga met, ketla ira roo xat amlong pam; neni ga vuktanga, ketla ara vuse ka amlong pam i.”

Copyright information for `MMX