aPas 20:12-16

Luke 18

Lavapaase Poovo Ri Latkin Naa La Laradi Rongtonga Linga

Melemu ne Iesu ga tong na lavapaase poovo ridi kusu ri lox ase di do diba ngising amisik la nemen gat di guta molo. Ni ga lok keretna, “Lara laradi rongtonga linga ga nemen to at lara lemenemen la ni xopmen goxo lok ngangao at ne Moroa la kopmen goxo lok ngangao at limixin. La lara labannaa rixin bok mo ga nemen ap mo lemenemen, la amisik neni gat pot pasa mo laradi rongtonga linga la ga ngising i xusu neni na lok tooro i, ga lok tin keretna, ‘Una lok tooro ia ri ronga linga rak mi laradi i munepen minia.’

Ga lox abao la laradi rongtonga linga goxo mulus, ketla melemu neni ga lok, ‘I ruturun tinotno, nenia axo lok ngangao at ne Moroa la axo lok ngangao bok at limixin. Ketla na latkin ik lox angtang amisix ia; kuren la nenia aba ronga linga ren. Lavanga neni nat pot pasa amisix ia la na lox amolo ia!”

La Leeme Silok ga lok, “Mina doxoma levelinga, nom laradi rongtonga linga xapmek ga tong i. La kereva, ne Moroa? Neni naba ronga linga at limixin axa ren, mo di ngising amisik tin kusu ri loklok tooro at lengkangking la at lengkanimin. La neni noxo lok sila bok kusu ri lok tooro di. A tong i rinimi do, neni naba ronga linga atdi la soso mun na lox epovo i. Ket do Laradi Mevana nabamlong ude at lavatbung menemen, kereva, nenia anaba long lenget ka limixin di nuunu?”

Lavapaase Poovo Ti La Parisi La Laradi Loklok Ka Pilas

La ne Iesu ga tong bok na lavapaase ri limixin mo digak lok do nedi mo dik mokso aleng la digak lox abulubun kepe limixin petpes. 10 Ni ga lok keretna, “Legepu radi dugat pas uto vana at loogu laplavang kusu duna sing; lara neni la Parisi, la lara neni laradi loklok ka pilas. 11 La mo la Parisi ga ru kaxat upana la ga sing mi lodoxoma keretna, ‘Moroa, nenia a emi asu minu, mila nia xopmen anak morong, la ana xaxarang, la anang longka tixin, kerekngan limixin petpes; a tong avukat tu mila nia xopmen ana lok ngan na laradi loklok ka pilas. 12 A mun anan at legepu aleng at legesevik, la am taba u mi loxot at lempanga rak’.

13 Ketla laradi loklok ka pilas ga ru paxalom lixilik la neni xopmen goxo lox aurut lemeren uto vana at laxalibet, ketla neni ga sogotu at lobongobong teren la ga lok, ‘Moroa, una balamu ia, laradi xapmek.”

14 La ne Iesu ga lok, “A tong i rinimi do, ana laradi, kopmen mo la Parisi, gak mokso at lemeren ne Moroa se neni gamlong ukolonu. Do nege i lox asilox i, Moroa naba lok alixilix i la do nege i lox alixilix i, Moroa naba lok asilox i.”

Iesu Ga Lox Anarong Laxamdak Mi Laxaalik Lixilik

(Mt 19:13-15; Mk 10:13-16)

15 Lentaba limixin diga lok kaka laxamdak mi laxaalik kakalik atdi uto saparap ne Iesu xusu neni naba lox anarong di. Ketla luvuttadi loklok ka anasa ren diga ven di la diga sep pepe di. 16 Ketla ne Iesu ga ro bubua ka laxamdak mi laxaalik kakalik saparav i, la ga lok, “Mina ke laxamdak mi laxaalik kakalik dibat pas saparav ia; la nemen mita sep pepe di, mila Linintoo at ne Moroa i epovo ridi na. 17 Nia a tong tuturun i rinimi! Do nege xopmen na siam kaka Linintoo at ne Moroa kerekngan lamdak kakalik, neni noxo beles teren.”

Laradi Gap Novos

(Mt 19:16-30; Mk 10:17-31)

18 Lara lamgomgo at leme Judaia ga sue ne Iesu, “Laradi loklox ase avukat, anaba lok lavanga salai xusu anaba lok kaka lorooro avolo?”

19 La ne Iesu ga sue i, “Tila u tong ia do a lox avukat? Kopmen tara na lox avukat ketla ne Moroa xusuk. 20 Uklen Lenavolo i lok keretna;

‘Nemen utang longka tixin, nemen uta sev amet tara, nemen uta xip pilo, nemen uta xarang taba tara, la una lok ngangao at ne tamam mi nenam.” a 

21 Laradi ga vorang i rin keretna, “Ga ru ka i, laau ia, aga mumu asu vam na levelinga.”

22 Se ne Iesu ga ronga i na, neni ga lok tin, “Uk pakes bok kusu una lok legesa vanga. Una sesep mi lempanga axap taram la una raba lempilas ti luvuttadi banbalo, la unaba ruuna ka lapnovos to vana at laxalibet; la ude u la una mumu asu ia.”

23 Ketla na laradi ga ronga i na, neni ga lok bukbulu aleng, mila neni gap novos aleng. 24 Iesu ga ven tu ren la mo laradi ga bulu aleng la ni ga lok, “Naba lolos aleng ti luvuttadi dip novos aleng kusu dina beles at Linintoo at ne Moroa! 25 I lolos aleng ti lakamel kusu na beles at lamamara at linil, la kerepmo i lolos aleng bok ti laradi nopnovos kusu ri beles at Linintoo at ne Moroa.”

26 Mo limixin diga ronga i na, diga sue, “Nege ba naba lok kaka lorooro i nemen amisik?”

27 La ne Iesu ga vorang di xeretna, “I lolos aleng do laradi nopnovos na vubeles at Linintoo at ne Moroa, ketla kopmen na lolos do ne Moroa na lox arooro i.”

28 La ne Pita ga lok, “Kereva ba nama, maga on basinge vam lempanga axap atnama kusu manaba mumu asu u.”

29 La ne Iesu ga lok, “Nia a tong tuturun i rinimi, mo do tara na on basinge loogu ren kopla latkin teren, kopla neton, kopla temen mi nenen kopla laxamdak teren kusu ring tong asu levelinga at Linintoo at ne Moroa, 30 neni naba ruuna aleng laxampanga solo at na lorooro kopok, la at lorooro melemu ni naba rooro amisik.”

Iesu Ga Vaase Sepsev Avantun Mumu Lanmet Teren

(Mt 20:17-19; Mk 10:32-34)

31 Iesu ga lam kaka lasangaun mi legepura luvuttadi loklok ka anasa ren to vetpes basinge limixin la ga lok tidi, “Mina ronga i na! Atat pas uto Jerusalem la lempanga axap lavaeme vapaase alii diga malagan i mumu Laradi Mevana naba vot tuturun. 32 Limixin kapmek diba song araba i ri limixin kopmen di me Judaia la dibak lok kalise i, la dina paase kapmek tin, la diba vubis sanga i. 33 Dibak pixis i la diba sev amer i, ketla at laaleng sepsev avantun, neni naba roo xat amlong bok.”

34 Luvuttadi loklok ka anasa ren di goxo xasep at na levelinga; lempasuun at na levelinga ga lipe aleng tidi, la di goxo xasep teren.

Iesu Ga Lox Aroo Laradi Laxatli Ren Ga Main

(Mt 20:29-34; Mk 10:46-52)

35 Iesu gat pas auret lemenemen Jeriko la lara laradi laxatli ren ga main, gat kis go at lisigege ngas, ga ngising panga. 36 Se neni ga ronga limixin digat pas polo la neni ga sue di, “Lavanga salai mo?” 37 La diga lok tin, “Iesu boro Nasaret na it pas polo.”

38 La ni ga xup lolos keretna, “Iesu! Livisik li at ne Devit! Una balamu ia!”

39 Mo limixin digam gomgo, diga musax i la diga lok tin kusu nak lok pilo. Ketla neni gap kup lolos tinotno, “Livisik li at ne Devit! Una balamu ia!”

40 La ne Iesu ga ru la ga tong i ridi do dina lam kaka i saparav i. Se neni ga vas auret, Iesu ga sue i, 41 “Lavanga salai u vara i do ana lox i ru?”

La ni ga lok, “Leeme Silok, a vara i do luxatli rak na xasep.”

42 La ne Iesu ga lok tin, “Luxatli ram na xasep. Lunuunu ram ira lox avukat pam u.” 43 La soso mun neni ga lox epovo i kusu na reven, la ni ga mumu asu ne Iesu, la ga emi asu mi ne Moroa. Se limixin diga ven i na, nedi axap diga emi asu mi ne Moroa.

Copyright information for `MMX