bAis 56:7

Luke 19

Iesu La Ne Sakias

La ne Iesu ga vas polo xeneng at lemenemen Jeriko. La lara laradi gomgo at limixin loklok kaka pilas mo ga nemen, laasen teren ne Sakias, neni laradi nopnovos. Neni gak lok tong pen i kusu ni na ven ne Iesu, do neni nege; ketla neni laradi mutmut mun la ni goxo epovo kusu na ven ne Iesu mila buaang nedi limixin diga ru pe i. Kuren la neni ga sixit migo ri limixin la ga eng urut at lara luuna pik kusu ri ven ne Iesu, do naba vas polo ap mo langas.

Se ne Iesu ga vas pot ap mo loxot, neni ga milik aurut upana la ga lok ti ne Sakias, “Soso ukopok Sakias, mila lingina aba xis eburu minu to xeneng at loogu ram.” Sakias ga eng si soso la ga siam ka ne Iesu mi lomomo uto at loogu ren.

Mo limixin diga ven i na, diga epaase ngunungun keretna, “Leeme Silok it pas ngan loose uto at loogu at laradi xapmek!”

Sakias ga ru ro melamgo at limixin la ga lok ti ne Iesu, “Leeme Silok. Aba raba loxot atat at lempanga rak ti limixin banbalo; la do nenia agara xip pilo vam tavanga, aba un amlong i rin na vanuet.”

Iesu ga lok ti limixin axap, “Lingina Moroa ira lok arooro vam limixin at na loogu; nia a lok tooro na laradi mila neni livisik li at ne Abaram. 10 La kerepmo, nenia, Laradi Mevana, aga vot kusu ana puse rinedi diga soogong la ana lox arooro di.”

Lavapaase Poovo Ri Lempilas

(Mt 25:14-30)

11 Limixin diga ronga vam na levelinga, la ne Iesu ga tong bok lara lavapaase poovo ridi, mila neni mo gat pas auret ta lemenemen Jerusalem, la nedi diga nua i do, Linintoo at ne Moroa mo naba vot asuvos ap mo loxonaleng. 12 Neni ga lok, “Lara leeme silok gat pas uto vaxalom at lara lenep silok kusu diba lox i ngan loorong silok la melemu neni nabamlong ukolonu. 13 Avot at lavatpas kaxat teren neni ga xup kaka lasangaun lavasaxaruki ren la ga raba nedi getgesara mi legetges uxuven minas, la ga lok tidi, ‘Mina gugu mi na lempilas, se nenia anabamlong.’

14 Ketla limixin teren ap mo lenep silok di goxopara rin, kuren la diga riki luvuttadi mi levelinga kusu dina mumu ren la diba lok, ‘Ma xopara na laradi kusu na lok ngan loorong silok atnama.’

15 Ketla neni ga ruuna ka i nom lololos at loorong silok, la gamlong. La ni ga xup kaka lavasaxaruki ren, no neni ga raba vam di mi lempilas. La nedi diga ru ro melamgo ren, la neni ga sue di do lavanisa levempilas diga lok kaka i.

16 Lara avot ga vosiga i la ga lok, ‘Laradi silok, aga gugu mi mo lempilas uga raba ia min, la ara ruuna ka vam lasangaun minas.’

17 Neni ga lok, ‘I lox avukat aleng; nenu lagale lasaxaruki. Nenu uga gugu avukat mi lempanga lixilik, kuren la ana lok li u, kusu unak lok tatao lasangaun levenmenemen silok.’

18 Lasaxaruki sepsev agepura ga vas beles ukeneng la ga lok, ‘Laradi silok, aga gugu mi mo lempilas uga raba ia min; la ara ruuna ka vam lavalimo minas.’

19 Neni ga lok ti na laradi, ‘Nenu unaba lok tatao lavalimo levenmenemen silok.’

20 La lara lasaxaruki ga vosiga i la ga lok, ‘Laradi silok, lempilas taram na; aga bom alipe i to xeneng at loxontamon. 21 Aga marat taram, mila nenu laradi lolos. Uk lok kaka lempanga kopmen ataram, la u kaxat ka lempanga anan, nenu xopmen u goxotlotlo i.’

22 La ni ga lok tin, ‘Nenu lasaxaruki xapmek! Aba lok li u at lavapaase mumu levelinga axa ram. Uklen i do nia laradi lolos, ak lok kaka lempanga kopmen atarak la a kaxat ka lempanga anan kopmen nia agatlotlo i. 23 Tila ba nenu u goxo lok li lempilas tarak to at loogu loklok li pilas? La i se mo nia aramlong nia giba lok kaka amlong ta i mi lentaba bok mavana ren.’

24 La neni ga lok tidi mo diga tu go, ‘Mina lok kaka amlong mo legesu xuven minas basinge i la mina raba i ti lasaxaruki i ruuna lasangaun minas.’

25 Ketla diga lok tin, ‘Laradi Silok! Neni i ruuna vam lasangaun minas!’

26 La laradi silok ga lok, ‘A tong i rinimi do nedi di ruuna lempanga la di lok lugugu at ne Moroa min, aba raba bok di mi lentaba; ket do lara na ruuna lempanga lixilik, la kopmen na lok lugugu min, nia aba lok kaka amlong i ren. 27 Ketla tinedi na limixin di munepen minia, la di goxopara i xusu nenia loorong silok atdi, mina lam kaka di ude la mina sev amet di de melamgo rak!”

Iesu Ga Beles To Jerusalem Ngan Loorong Silok

(Mt 21:1-11; Mk 11:1-11; Jo 12:12-19)

28 Iesu ga vaase axap na levelinga la neni ga vas migo ridi uto Jerusalem. 29 Se neni ga vas auret lumenemen Betpage la Beteni dugak lok at Lakaana Olip, neni ga riki amgo luradi loklok ka anasa ren. 30 Avot be ni ga lok tidu xeretna, “Munat pas uto at nom lemenemen ik lok to melamgo atnumu; la do muna vas beles ukeneng, muba long lenget ka lodongki diga xoxo li i la goxovisi dina xis teren. Muna soxomus ka i la muna lok kaka i ude. 31 Mo do tara na sue numu do, ‘Tila nemu mu soxomus ka i nom lodongki?’ Muba lok tin do Leeme Silok i vara rin.”

32 Dugat pas at langas la duga long lenget ka lempanga axap kerekngan ne Iesu ga tong pam i ridu. 33 Se duga soxomus kaka i nom lodongki, luvuttadi loklok tatao at lodongki diga lok tidu, “Tila nemu mu soxomus ka i nom lodongki?”

34 Duga lok tidi, “Leeme Silok i vara rin.”

35 La duga lok kaka lodongki uto saparap ne Iesu. La duga lok kaka levesingsiga atdu la duga lok li i mavana at lodongki la duga rebeng ama urut ne Iesu uto vana at lodongki. 36 Se neni ga xis at nom lodongki la gat pas, limixin diga sa li levesingsiga atdi ro at langas.

37 Se neni ga vas auret Jerusalem, at loxot langas ga si ukopok at Lakaana Olip, buaang nedi limixin teren diga mumu asu i, diga xup kaxat la diga tong avukat ti ne Moroa la diga emi asu min mi luxupkup silok mumu lempanga sangsangu nedi diga ven pam i.

38 Digap kup keretna,

“Moroa na lox anarong loorong silok mo i vot ngan Lanarong at ne Moroa! Lumulum na nemen to vana at laxalibet, la ata emi asu mi ne Moroa!” a 

39 Lentaba lubung Parisi diga vaase kaxat to xantubu at limixin at ne Iesu. Diga lok, “Laradi loklox ase, tong i ri limixin atnimi kusu dina lok pilo!”

40 Iesu ga vorang i ridi xeretna, “A tong tuturun i rinimi; mo do dina lok pilo, laxanuat dibap kup mi leemi asu saparap ne Moroa.”

Iesu Gang Teng Mumu Limixin To At Lemenemen Jerusalem

41 Ni ga vas auret lemenemen silok Jerusalem la se neni ga ven i, neni gang teng mumu limixin teren, 42 la ga lok keretna, “Lingina nemi limixin kopmen minaklen lavanga salai xusu naba lok lumulum. Ketla mo nga i nemen alipe vam. 43 Levenaleng naba vot, la limixin esep diba rit kangkan nimi mi lara ngas uat, la dina ru xangkan nimi, la dinabam tu xobot ka nimi at lengkot axap. 44 Diba lok kapmek tinotno nimi eburu mi laxamdak mi laxaalik atnimi dik lok maxeneng at langas uat; la kopmen tinotno tegesa xonuat diba ke i at toxot teren, mila mi goxo ven kibis i do ne Moroa ga vot kusu na lox arooro nimi!”

Iesu Ga Beles To Xeneng At Loogu Laplavang

(Mt 21:12-17; Mk 11:15-19; Jo 2:13-22)

45 La ne Iesu ga beles ukeneng at loogu laplavang la ga xala su mi limixin diga sesep mi lempanga atdi, 46 la ga lok tidi, “Levelinga at ne Moroa i nemen keneng at Lovoang Kaala i lok keretna,

‘Loogu rak diba so asen i mi loogu singising’; b 

ketla mira lok kapmek pam i, i ngan loogu loklox alipe at luvuttadi dip sep paxat ka panga!”

47 At levenaleng axap Iesu ga anasa limixin to at loogu laplavang. La lavamaasa silok mi luvuttadi loklox ase at Lenavolo, la luvuttadi amgomgo at limixin diga vara i xusu dina sev amer i. 48 Ketla di goxo lox epovo i mila diga marat at limixin la limixin axap digang tonga amisix i, mila diga vara aleng levelinga ren.

Copyright information for `MMX