aPas 13:2,12,15

Luke 2

Livipisik At Ne Iesu

(Mt 1:18-25)

Jon move ga lixilik la ne Kaisar Ogastas ga lox aonon lavapaase axasep tinedi limixin digak lok maxopok at lagavaman boro Rom kusu dina malagan amaxat ka levenasen atdi. Kuirinias ga neni laradi gomgo ri lenep silok Siria, at mo laaleng na lugugu ti lok ka asen ga vot. Nedi limixin getgesara digat pas ti levenmenemen axa atdi kusu dina lok li levenasen atdi.

La ne Josep ga nemen at lemenemen Nasaret at lenep silok Galili. Ni ga ronga na levelinga la at lara laaleng ni ga vas kaxat uto at lemenemen, laasen teren, Betilem mo gak lok at lenep silok Judaia; mo lemenemen at loorong silok ne Devit. Josep gat pas ugo, mila ga neni livisik li at ne Devit, la kusu ni na lok li laasen teren eburu mi ne Maria; neni diga lok katling i xusu naba epot at ne Josep. Neni ga balan madak. La nedu duga rupot to Betilem, la laaleng ga vot nga kusu ne Maria na visik lamdak teren. La ni ga visik lamdak temes avot teren, la ga bom i mi leventamon la ga vaxamdi i ro at loxot anan at laxanbulumaxao, mila goxopmen toxot tidu ri nemen to at loogu mikmidi.

Luvuttadi Loklok Tatao Sipsip Mi Lubung Angelo

Ap mo laxanimin lentaba luvuttadi loklok tatao sipsip diga nemen ap mo lenep, digak lok tatao levesipsip atdi. La laangelo at ne Moroa ga vot saparap di, la lisisixam at ne Moroa ga so axasep nedi la ga vung kamit mo loxot axap. La diga marat aleng tinotno. 10 Ketla laangelo ga lok tidi, “Nemen mita marat! Nenia ana tong levelinga avukat tinimi, kusu naba lox amomo limixin axap. 11 Lingina at na laaleng to at lemenemen at ne Devit, Laradi Loklox Arooro atnimi dira visik pam i; neni Lanarong la Leeme Silok! 12 Loklok katling at na lavanga i lok keretna; miba long lenget ka lumumulum di bom i mi leventamon la ik midi ro at loxot anan at laxanbulumaxao.”

13 La soso mun, buaang nedi lubung angelo boro vana at laxalibet diga vot eburu mi mo laangelo, diga emi asu saparap ne Moroa; la diga lok keretna,

14 “Ata emi asu mi ne Moroa ik lok to vana at laxalibet, la lumulum at ne Moroa bak lok at na lavatbung menemen tinedi ne Moroa i momo midi.”
15 La lubung angelo diga on basinge di, la digamlong manga uto vana at laxalibet, la luvuttadi loklok tatao sipsip diga epaase minedi getgesara xeretna, “Atat pas uto Betilem la ata ven mo lumumulum, ne Moroa ira tong pam i ridik.”

16 La diga vas kaxat soso mun, diga vot posiga ne Maria la ne Josep, la diga long lenget ka lumumulum gak midi to at loxot anan at laxanbulumaxao. 17 Ga se mo luvuttadi loklok tatao sipsip diga ven lumumulum, diga on basinge i, la diga paase asu levelinga at laangelo ri limixin axap. 18 La nedi mo diga ronga mo levelinga, diga sangu ren. 19 Ketla ne Maria ga doxoma na levelinga, la gam doma mumu amisix i. 20 Luvuttadi loklok tatao sipsip digamlong, diga emi asu mi ne Moroa ti nom lempanga diga ronga i la diga ven pam i, kerekngan laangelo ga vaase di min.

Diga So Asen Ne Iesu

21 At laaleng sepsev avanuan melemu at livipisik at ne Iesu, nedu lenasun duga lok ka ne Iesu xusu dina vit kepe loxontuxu ren; la diga so asen i mi ne Iesu, no laasen laangelo gara so asen avot pam i min ap mo loxonaleng nenen goxovisi renan min.

Diga Lok Ka Ne Iesu Uto At Loogu Laplavang

22 Laaleng ga vot nga kusu ne Josep mi ne Maria duna lok axap mo loklok ti lox adadat du kerekngan Lenavolo at ne Moses ga tong i. La duga lok ka lamdak uto Jerusalem kusu duna raba ne Moroa min, 23 kerekngan levelinga gak lok to xeneng at Lenavolo at ne Moroa i lok keretna,

‘Laxamdak temes avot, mina song araba di ri ne Moroa.’ a 

24 Dugat pas bok kusu duna raba leventamtaba atdu. Lenavolo at ne Moroa ga tong i do limixin dinaba raba i mi legepu bino, kopla legepu bilis.

25 Lara laradi ga nemen to Jerusalem laasen teren ne Simion. Neni lagale laradi, la ga lok ngangao bok at ne Moroa la ni ga lotu ruturun saparap ne Moroa, la ni ga ngangais ti taradi kusu naba lox arooro limixin me Israel. Loroonan Kaala ga nemen teren. 26 La Loroonan Kaala ga tong pam i rin do ni noxo met se ni naba ven Lanarong at ne Moroa. 27 Ap mo laaleng Loroonan Kaala ga lam ka ne Simion uto at loogu laplavang. Ne temen mi nenen ne Iesu duga lox abeles lamdak ukeneng kusu dina lox epovo loklok at leme Judaia i ngan Lenavolo ga tong i. 28 La ne Simion ga lok kaka lamdak mi lukngen, la ga emi asu mi ne Moroa xeretna;

29 “Na, Moroa silok! Lavapaase alii ram ira sorun pam, la na nga una ke ia, lasaxaruki taram kusu ana met basinge lugugu ram la ana nemen at lenmila. 30 Ara ven pam langas ti lorooro mi luxatli axa rak, 31 mo uga gagas min kusu limixin axap diba ven i, 32 i ngan laxasep kusu naba lox axasep langas taram ti limixin kopmen di me Judaia, la na raba lisinorong ti limixin taram boro Israel.”
33 Temen mi nenen lamdak duga sangu aleng ap mo levelinga at ne Simion. 34 Simion ga lox anarong di la ga lok ti ne Maria xeretna, “Ana lamdak ne Moroa ga soxolik ka i xusu naba lok nedi limixin buaang me Israel diba subu la buaang bok nedi diba xatu at levelinga ren. Neni naba lok ngan loklok katling boro vana at ne Moroa la buaang nedi diba sok tixirixes i; 35 la ni naba lox asuvos levendoxoma nemnem at limixin. La lorooro ram naba umsu mi lainbulu.”

36 Lara latkin papaase alii laasen teren ne Ana; loolik at ne Panuel, at libibinat at ne Asa. Neni lasioxo rixin, la ni ga epot mun at lavanuti maares. 37 La latlok teren ga met la melemu neni ga nemen naa; la levenmaares teren ga epovo at lavanuan sangaun mi lavanuet. Neni xopmen goxo onon basinge loogu laplavang; at lengkangking la lengkanimin, ni ga lotu saparap ne Moroa la ni ga mun anan la ga ngising. 38 Ap mo mun loxonaleng neni ga vot pasa di la ga tong loklox avukat saparap ne Moroa, la ga vaase alii mumu ne Iesu tinedi mo limixin diga ngangais ne Moroa kusu naba lox arooro limixin me Israel.

39 Se ne Josep mi ne Maria duga lox axav i mo lempanga kerekngan Lenavolo at ne Moroa ga tong i, digamlong uto Nasaret lemenemen atdi gak lok at lenep silok Galili. 40 Lamdak ga sisilok la ga lolos; la ga umsu mi lakleklen, la letaba nabalamu at ne Moroa ga umsu at lorooro ren.

Lamdak Lixilik Ne Iesu To Xeneng At Loogu Laplavang

41 At levenmaares axap ne Josep eburu mi nenen ne Iesu dugat pas uto Jerusalem ti leluxa, laasen ap mo leluxa, Lovovolo Pe. 42 Se ne Iesu ga lasangaun legepura laramaares teren, nedi loxoetemen digat pas uto ap mo leluxa kerekngan loklok at limixin me Israel. 43 La levenaleng ap mo leluxa ga xap ta, la nedu lenasun duga vas kaxat uto xolonu, la ne Iesu ga nemen go Jerusalem, ketla du goxoklen i. 44 Duga nua i do neni mo gat pas eburu mi lentaba ren boro Nasaret; kuren la dugat pas ap mo laaleng se ukantinao, la melemu duga long lenget ka i do neni goxo emu mi limixin la duga vuse kaxat ba rin kantubu at lempat atdi la larapen tangas bok atdi. 45 Du goxo vuse ka i, la dugamlong uto Jerusalem kusu duna ven tin. 46 Melemu at laaleng sepsev avantun duga vuse ka i ro xeneng at loogu laplavang, gat kis eburu mi luvuttadi loklox ase at leme Judaia; ni gang tonga di la ga susue bok di mi levesusue. 47 Nedi mo digang tonga i, diga rakdu aleng at lakleklen teren la levempoporang teren. 48 Nedu lenasun duga vuse ka i, duga rakdu aleng la nenen ga lok tin, “Nuruk, tila u lok nom loklok tinama’? Nema’ lenasun mara bulu aleng mu u.”

49 Ni ga vorang i ridu keretna, “Tila mu lok do muna puse ria? Kereva, muxoklen i do nia aba nemen to at loogu at ne Tamak?” 50 Ketla du goxo xasep at na levelinga ne Iesu ga tong i ridu.

51 La ne Iesu gamlong eburu midu uto Nasaret, la neni gang tonga res amisik atdu. La nenen gam doma amisik na levelinga at ne Iesu la goxo domampe i. 52 La ne Iesu ga sisilok at labantuxu la at lakleklen bok; la ga lox avukat aleng at lemeren ne Moroa la limixin.

Copyright information for `MMX