aAis 40:3-5

Luke 3

Jon Laradi Sep Susu Ga Vavang

(Mt 3:1-12; Mk 1:1-8; Jo 1:19-28)

At lamaares lasangaun mi lavalimo at lixitkis migomgo at ne Kaisar Taibirias; Pontias Paelat ga nemen ngan laradi gomgo to Judaia, la ne Erodes gam gomgo at lenep silok Galili, la neton, laasen teren ne Pilip gam gomgo at lunep silok Ituria la Tarakanitis; Lasinias gam gomgo at lenep silok Abilini. La ne Anas mi ne Kaiapas duga nemen ngan lumaasa gomgo.

Ap mo levenaleng levelinga at ne Moroa ga rupot saparap ne Jon lamdak at ne Sakaria to at lamatbin.
La ni gat pas at lengkot axap saparap ladan sen Joridan la ga vavang tinedi diga vot pasa i. Ni ga lok keretna, “Mina leeng basinge laxakapmek atnimi la mina lok ka lesep susu, la ne Moroa ba doxoma xepe laxakapmek atnemi.” Ga lok ngan laradi vapaase alii ne Aisaia ga malagan i at lubuk teren keretna;

‘Lara mo ip kup to at lamatbin keretna, mina lox agagas li langas ti Leeme Silok kusu rin tit pas; mina lox akmokso larangas tin!
Minas bosbo pe larasa upana, lempatkaana mi lengkongkaana xakalik mina lox amamana i. Larangas kakauk mina lox akmokso i la larangas i garasan mina lox amamasa i. La limixin axap diba ven ba lugugu loklox arooro at ne Moroa.’ a 

Buaang nedi limixin diga vot posiga ne Jon kusu neni na sep susu di. La ni ga paase lolos tidi xeretna, “Nemi mi lok ngan laxamdak at laxasii, mila loklok atnimi i lok kapmek aleng. Mi lok do mina lok kaka lesep susu kusu mina sepsu at lebelemamao at ne Moroa mo naba vot melemu, ketla xopmen mina epovo. Ketla mina lok lempanga kusu naba lox asuusu i do mira leeng basinge vam laxakapmek atnimi. La nemen nemi mita etong i kantubu atnimi do, ‘Maba nemen avukat mila nema luvuttubuno avolo at ne Abaram.’ A tong i rinimi do Moroa i epovo xusu na lok ka na laxanuat la na lok di laxamdak ti ne Abaram! Lamatao mo i nemen gagas kusu na tara asubu larauna; do larauna axap dixo pisik larapeven una avukat, Moroa ba ra asi di ukopok la na lu midi uto at laxao.”

10 Limixin diga sue i, “Maba lok lavanga salai?”

11 La ni ga vorang i ridi xeretna, “Do nege i ruuna tegepu vanga singsiga, neni na raba tara ti mo laradi kopmen tara ren; la do nege i ruuna leveluxa, neni na raba box i ri mo laradi kopmen teveluxa ren.”

12 Lentaba luvuttadi loklok ka pilas diga vot kusu ne Jon na sep susu di, la diga sue i, “Laradi loklox ase, manaba lok lavanga salai?”

13 Ni ga lok tidi, “Nemen mita lok ka gamasa tempilas at limixin i volo lampoovo, luvuttadi amgomgo diga tong taba nedi min.”

14 La lentaba luvuttadi esep bok diga sue i, “Kereva ba nama? Lavanga salai manaba lox i?”

La ni ga lok tidi, “Nemen mita pu soso ka tempilas at taradi la mina lox amarar i xopla mina bala raba tara. Levendoxoma atnimi na lox avukat ti luunun mik lok ka i.”

15 Levendoxoma at limixin ga xatu kaxat la diga doxoma mumu ne Jon, diga nua i do neni mo Lanarong. 16 Kuren la ne Jon ga lok tidi axap, “Nenia a sep susu nimi mi ladan, ketla lara naba vot. Lololos teren i volo lololos tarak. Axo epovo xusu ana soxomus luvanga vatpas teren mila neni i silok aleng tia. Neni naba sep susu nimi mi Loroonan Kaala la naba lok kepe laxakapmek atnimi kerekngan laxao i rin kepe levenboobong. 17 Neni i gagas pam kusu ri lok pes larapeven piao basinge labantuxu ren la na lok li bubua larapeven piao uto xeneng at loogu ren; ketla neni naba xotos leventuxu at levempiao ro at laxao kopmen noxo remet.” 18 Buaang leventaangas axap Jon ga vavang min ti limixin kusu na tong asu Lagale Lavavang tinedi.

19 Ketla ne Jon ga sok katli ka laradi gomgo ne Erodes mila neni ga vaxat ka ne Erodias latkin at neton, la ga lok bok buaang lempanga xapmek. 20 Kuren la ne Erodes ga lok bok lara lavanga ga lok kapmek aleng. Ni ga ranga alis ne Jon la ga lok li i at loxokoxo.

Jon Ga Sep Susu Ne Iesu

(Mt 3:13-17; Mk 1:9-11)

21 Avot ti loxokoxo at ne Jon, ni ga sep susu limixin. At lara laaleng ni ga sep susu bok ne Iesu. Laxalibet ga rem suang ap mo loxonaleng neni ga lok lising. 22 La Loroonan Kaala ga rava si ukopok, diga ven lovoovo ren ga ngan lamno la gasga ne Iesu. La laxaka at lara ga laa boro vana at laxalibet ga lok keretna, “Nenu ne nuruk. La nia a balamu u la a momo minu.”

Leretere At Lavalabat At Ne Iesu

(Mt 1:1-17)

23 Se ne Iesu ga vaxaru kaxat leven gugu ren, lenmaares teren ga epovo at lavantun sangaun. Limixin diga doma i do neni nitna ne Josep. La ne Josep neni nitna ne Eli, 24 Eli neni nitna ne Matat, Matat neni nitna ne Levi. Levi neni nitna ne Melkai, Melkai neni nitna ne Janai, Janai neni nitna ne Josep; 25 Josep neni nitna ne Matatias, Matatias neni nitna ne Amos, Amos neni nitna ne Naum, Naum neni nitna ne Esli, Esli neni nitna ne Nagae; 26 Nagae neni nitna ne Maat, Maat neni nitna ne Matatias, Matatias neni nitna ne Semen, Semen neni nitna ne Josek, Josek neni nitna ne Joda; 27 Joda neni nitna ne Jonan, Jonan neni nitna ne Resa, Resa neni nitna ne Serababel, Serababel neni nitna ne Salatiel, Salatiel neni nitna ne Neri; 28 Neri neni nitna ne Melkai, Melkai neni nitna ne Adai, Adai neni nitna ne Kosam, Kosam neni nitna ne Elmadam, Elmadam neni nitna ne Era; 29 Era neni nitna ne Josua, Josua neni nitna ne Eliser, Eliser neni nitna ne Jorim, Jorim neni nitna ne Matat, Matat neni nitna ne Levi; 30 Levi neni nitna ne Simion, Simion neni nitna ne Juda, Juda neni nitna ne Josep, Josep neni nitna ne Jonam, Jonam neni nitna ne Eliakim; 31 Eliakim neni nitna ne Melia, Melia neni nitna ne Mena, Mena neni nitna ne Matata, Matata neni nitna ne Natan, Natan neni nitna ne Devit; 32 Devit neni nitna ne Jesi, Jesi neni nitna ne Obet, Obet neni nitna ne Boas, Boas neni nitna ne Salmon, Salmon neni nitna ne Nason; 33 Nason neni nitna ne Aminadap, Aminadap neni nitna ne Amin, Amin neni nitna ne Aanai, Aanai neni nitna ne Esron, Esron neni nitna ne Peres, Peres neni nitna ne Juda; 34 Juda neni nitna ne Jakop, Jakop neni nitna ne Aisak, Aisak neni nitna ne Abaram, Abaram neni nitna ne Tera, Tera neni nitna ne Nao; 35 Nao neni nitna ne Serak, Serak neni nitna ne Reu, Reu neni nitna ne Pelek, Pelek neni nitna ne Iba, Iba neni nitna ne Sila; 36 Sila neni nitna ne Kenan, Kenan neni nitna ne Apaksat, Apaksat neni nitna ne Sem, Sem neni nitna ne Noa, Noa neni nitna ne Lamek; 37 Lamek neni nitna ne Matusala, Matusala neni nitna ne Enok, Enok neni nitna ne Jare, Jare neni nitna ne Malalil, Malalil neni nitna ne Kenan; 38 Kenan neni nitna ne Enos, Enos neni nitna ne Set, Set neni nitna ne Adam, la Adam neni nitna ne Moroa.

Copyright information for `MMX