Luke 4

Satan Ga Lok Tong Pen Ne Iesu

(Mt 4:1-11; Mk 1:12-13)

Iesu gamlong boro at ladan sen Joridan, neni ga umsu mi Loroonan Kaala; la Loroonan Kaala ga lam ka i uto at lamatbin. Ap mo levenaleng ne Iesu ga mun anan, la melemu ni ga roxo. La ne Satan ga vot posiga i la ni gak lok tong pen i at lavanuet sangaun aleng.

Satan ga lok tin, “Do nenu nitna ne Moroa, una tong i ri na luat kusu na vee xongkide.”

Iesu ga vorang i rin keretna, “Kopmen. Lovoang Kaala i tong i do, laradi ixo rooro xusuk mun at lakde.”

La ne Satan ga lok ka i upana at lavatkaana la soso mene nga ga lox ase i mi levengkot axap at lavatbung menemen. La ne Satan ga lok, “Aba raba u mi na levengkot axap la lapnovos teren kusu unam gomgo ren. La na lempanga axap nia aga lok kaka i, la nia xa aba raba nege tara, do nia ana soxolik ka i. Ana axav i, aba raba u min, mo do una xis tiktikbu mi luvatgulom taram de melamgo rak la una lotu saparav ia.”

Iesu ga vorang i rin keretna, “Kopmen. Lovoang Kaala i tong i do, una lotu saparap ne Moroa, Leeme Silok taram, la unam tebeng kusuk mun lugugu ren.”

La ne Satan ga lok ka i uto Jerusalem la ga vaxaru i ro vana at lavatlak gu at loogu laplavang; la ga lok tin, “Mo do nenu ne nitna ne Moroa, una los si basinge na loxot; 10 mila Lovoang Kaala i tong i do,

‘Moroa naba tong i ri lubung angelo ren kusu diba lok tatao avukar u.’ a 

11 La i tong box i do,

‘Diba ranga u mi levengkikngen di, kusu tuat noxo sev asongot tekot at laxangkedek taram.” b 

12 Iesu ga vorang i rin keretna, “Kopmen. Lovoang Kaala i tong i do, nemen uta lok li gat ne Moroa, Leeme Silok taram ti loklok tong pen.”

13 At leventaangas axap ne Satan ga lok tong pen ne Iesu ren, la melemu ne Satan ga on basinge i la ga ngangais manga i kusu ri tara taaleng melemu.

Iesu Ga Vaxaru Kaxat Lugugu Ren To Galili

(Mt 4:12-17; Mk 1:14-15)

14 Melemu, Iesu gamlong uto Galili, la lololos at Loroonan Kaala ga nemen teren la ga lok tooro i mi lugugu ren. Levelinga mumu ne Iesu, ga rem teles ap mo lengkot ga nemen saparap Galili. 15 Neni ga anasa limixin to xeneng at laraugu singising la limixin axap diga emi asu aleng min.

Limixin To Nasaret Diga Sok Tixirixes Ne Iesu

(Mt 13:53-58; Mk 6:1-6)

16 At lara laaleng Iesu gat pas uto Nasaret, no lemenemen ni ga silok teren; la at laaleng kaala neni gat pas uto at loogu singising i ngan neni gak lok amisix i. Ni ga xatu upana kusu na us Lovoang Kaala. 17 La laradi gomgo ap mo loogu singising ga raba i mi lugun linga at leeme vapaase alii, ne Aisaia. Ni ga valas i la ni ga long lenget ka loxot ga lok keretna;

18 ‘Loroonan Kaala at ne Moroa i nemen tarak, mila ira soxolik ka vam ia xusu ana vavang mi Lagale Lavavang tinedi limixin banbalo. Ira sak tiki vam ia xusu ana tong asu langas ti soxomus asu limixin di nemen at loxokoxo, la ana lox arepalas lengkatli atnedi luvuttadi mi lengkatli atdi i main; la ana soxomus asu limixin di baava mi laxanmumuat at na lavatkangka; 19 la ana tong asu levenaleng ne Moroa na vaxaru kaxat lugugu ti lox arooro limixin teren.’ c 

20 La ne Iesu ga vegun ka lugun linga, la ga raba i ri laradi gak lok tatao loogu, la ni ga xis kopok. Limixin axap go xeneng at loogu singising diga ven tooro ne Iesu. 21 La ni ga lok tidi xeretna, “Ana levelinga at Lovoang Kaala ira sorun ta ningina, kerekngan tai mo mi ronga i.”

22 Diga ronga ka levelinga ren la diga sangu mila levelinga ren ga sixit nunuan mun. Diga lok, “Neni nitna ne Josep mun, la kereva neni i epovo na tong i na lempanga?”

23 Ni ga lok tidi, “A lok do miba tong asu i na lavapaase poovo ria, ‘Laradi sangsanga, una lox aroo xa u.’ La miba lok bok tia, ‘Una lok mo lempanga sangsangu nade at lemenemen taram i ngan ta ugak lox i ro Kaprenaum.”

24 La ne Iesu ga lok bok tidi, “A tong tuturun i na rinimi. Leeme vapaase alii, limixin di noxo siam ka i ro at lemenemen axa ren. 25 Mina ronga i na levelinga; at levenaleng at ne Elaisa, la goxopmen tara takabu at lavantun mi loxonatat maares la langsangan loroxo ga rupot ap mo lenep axap. I ruturun do buaang lempatnaa to Israel, 26 ketla ne Moroa goxo riki ne Elaisa uto at teta atdi, ketla uto xusuk at lavatnaa boro Sarepat, at lenep silok Sidon. 27 La buaang nedi luvuttadi mi lanmeres gu diga nemen go Israel at levenaleng at leeme vapaase alii ne Elaisa; ketla ne Moroa goxo lox aroo tara atdi, ni ga lox aroo ne Naiman kusuk mun boro at lenep silok Siria.”

28 Se limixin to xeneng at loogu singising diga ronga i na, diga musak aleng. 29 Diga xatu upana, la diga sar asu ne Iesu ukamang basinge mo lemenemen, la diga lok ka i uto lisigege at lakaana mo lemenemen atdi gat kis e, kusu diba lu asi min ukopok. 30 Ketla neni ga vas polo mene ro xantubu at limixin la ga onon ta.

Iesu Ga Riki Asu Lagas Basinge Laradi

(Mk 1:21-28)

31 Iesu gat pas uto Kaprenaum, lara lemenemen to Galili, la ga anasa limixin at laaleng kaala. 32 Diga sangu aleng at levenanasa ren mila levelinga ren ga mumuat.

33 Lara laradi go xeneng at loogu singising, lagas ga suxuna i; ga xup lolos aleng la ga lok, 34 “Aa! Iesu boro Nasaret, lavanga salai u vara i atnama? Kereva, u vot de xusu una lok kapmek nama? Aklen i do nenu nege; nenu Lanarong at ne Moroa!”

35 La ne Iesu ga vaase lolos ti mo lagas keretna, “Una lok pilo, la una vas su basinge na laradi!” La mo lagas ga lu asi mi nom laradi ro melamgo atdi, la ga sixisu basinge i la kopmen goxo lok kapmek toxot at labantuxu ren.

36 La limixin diga sangu, la diga lok tinedi getgesara, “Kereva na levelinga? Na laradi i vaase ri lagas, la lagas i ronga res teren. Levelinga ren i lolos la i mumuat aleng.” 37 La levelinga mumu ne Iesu ga onon at lengkot axap ap mo lenep.

Iesu Ga Lox Aroo Luvutulom At Ne Simon Pita

(Mt 8:14-17; Mk 1:29-34)

38 Iesu ga on basinge loogu singising la gat pas uto at loogu at ne Simon la ga vubeles teren. Luvutulom at ne Simon ga meres aleng mi liplivi, la diga tong i na ri ne Iesu. 39 Ni gat pas la ga ru puvung i, la ga vaase lolos ti nom liplivi, la liplivi ga on basinge mo latkin, la soso mun ni ga xatu kaxat upana la ga lox agagas leveluxa ridi.

40 Ga ukantinao laxangking ga lok do na lotup, mo limixin diga ruuna larapen tangas atdi, digak meres mi levenasen anmeres axap, diga lam ka di uto at ne Iesu; la ni ga lok li lukngen to mavana atnedi getgesara, la ga lox aroo nedi axap. 41 Iesu ga paase ri lubunggas la lubunggas bok diga vas su basinge buaang nedi limixin, la lubunggas digap kup keretna, “Nenu nitna ne Moroa!” La ne Iesu ga vaase lolos tidi la ni xopmen goxo ke xepe tara atdi gita vaase, mila digaklen i do neni Lanarong.

Iesu Ga Vavang To At Laraugu Singising

(Mk 1:35-39)

42 Ga maxantamak suubu, Iesu ga on basinge mo lemenemen la gat pas uto at lenep mimila. Limixin diga puse rin, la se diga vuse ka i, diga lolos do nemen ni guta vas kaxat basinge di. 43 Ketla neni ga lok tidi, “Aba vavang bok mi Lagale Lavavang at Linintoo at ne Moroa to bok at levenmenemen petpes, mila ne Moroa ga riki ia xusu ana lox i.” 44 La neni ga vavang to at laraugu singising at levennep axap at leme Judaia. Ren

Copyright information for `MMX