aAis 6:9

Luke 8

Lavakin Diga Emu Mi Ne Iesu

Melemu at lentaba levenaleng manga, Iesu gat pas kantubu at levenmenemen silok la lengkonmenemen kakalik, ga vavang mi Lagale Lavavang at Linintoo at ne Moroa. Lasangaun legepura luvuttadi loklok ka anasa diga emu min, la lentaba lavakin bok, gano ne Iesu ga lox avukat nedi basinge levenanmeres atdi la ga riki asu lubunggas basinge di; ne Maria (diga so asen box i mi ne Magdalene) gano lavanuti lubunggas ga ravasu basinge i; Joana, latkin at ne Kusa, laradi gomgo gak lok tatao at loogu at ne Erodes; la ne Susana, la nedi buaang bok lavakin diga lok tooro ne Iesu eburu mi luvuttadi loklok ka anasa ren mi levempilas nedi digak pakes tin.

Lavapaase Poovo At Laradi Gatlotlo Piao

(Mt 13:1-9; Mk 4:1-9)

Buaang limixin digat pot saparap ne Iesu boro at levenmenemen axap; la se diga vot eburu, Iesu ga tong lavapaase poovo ridi xeretna.

“Lara laradi lotlo gat pas uto xataamang kusu natlotlo piao; lentaba levenit piao ga subu ro at langa, la limixin digat pas teren, la lavapixa diga rava pot la diga rok axav i. Lentaba levenit piao ga subu ro at loxongkangka laxanuat ga nemen teren; la se diga su kaxat, diga met ta mila mo loxongkangka goxopmen tadan teren. Lentaba levenit piao ga subu ro at livin gagas, la diga su xat eburu mi nom livin gagas; ketla livin gagas ga itis di. La lentaba levenit piao ga subu ro at laxangka avukat; la na levenit piao ga su xat la ga visik laxampeven piao solo.”

La ne Iesu ga lox axap mo lavapaase poovo la ga lok tidi xeretna, “Do mi ruuna levenbaalung, mina ronga avukat na levelinga.”

Lavasuun At Levempapaase Poovo

(Mt 13:10-17; Mk 4:10-12)

Luvuttadi loklok ka anasa diga sue ne Iesu do ua lavasuun ap mo lavapaase poovo. 10 La ne Iesu ga lok tidi, “Moroa ira raba vam nimi mi lakleklen at Linintoo ren, gano ga nemen alipe; ketla tinedi limixin petpes levelinga mumu Linintoo i lok ngan mun lavapaase poovo, kusu kopmen diba xasep teren; ngan levelinga i lox asorun Lovoang Kaala i lok keretna,

‘Diba ven lugugu, ketla di noxo ven kibis i; la dinang tonga mo levelinga, ketla di noxo xasep teren.” a 

Iesu Ga Soxomus Lavapaase Poovo At Laradi Gatlotlo

(Mt 13:18-23; Mk 4:13-20)

11 La ne Iesu ga lok tidi xeretna, “Lavasuun at na lavapaase poovo i lok keretna; levenit neni levelinga at ne Moroa. 12 Ti levenit ga subu ro at langas, i ru katling nedi ding tonga mo levelinga; ketla ne Satan i tupot la ik lok kepe nom levelinga basinge lebelen di, kusu ri lok pes lunuunu atdi la di noxo lok kaka lorooro. 13 Ti levenit no ga subu ro at loxot uat, i ru katling nedi di ronga levelinga la di momo xaka i, ketla kopmen na si aleng ukeneng at lorooro atdi. Di nuunu mun at loxonatat aleng la do loklok tong pen i vot, dira subu manga. 14 Ti levenit ga subu to at loxongkangka mi laxan gagas, i ru katling nedi di ronga mo levelinga, ketla levenainbulu la lapnovos la lomomo at na lorooro i umsu xeneng atdi la gira itis lorooro atdi, la kerepmo kopmen dina visik levempanga nunuan at lorooro atdi. 15 Ti levenit no ga subu ro at loxongkangka avukat, i ru katling nedi di ronga levelinga la di lok li avukar i xeneng at lebelen di la i lox avukat, la ia nemen lolos se di visik levempeven avukat.”

Lavapaase Poovo At Lababao

(Mk 4:21-25)

16 La ne Iesu ga tong lavapaase poovo tidi keretna, “Kopmen teta na sox aros lababao la na vung pavaa i mi lavatbaaket kopla na lok li i maxopok at loora. Ketla neni ik lok li i ro at lenep kasep, kusu limixin diba ven losoosoo ren mo do dina beles to xeneng ap mo loogu. 17 Lempanga mumu Linintoo no ga nemen alipe tinotno, naba ravasu ti lasaxaven; la levelinga, lavasuun teren no i nemen alipe, melemu naba xasep. 18 Kuren la mina lok tatao avukat nimi, kusu ring tonga avukat levelinga at ne Moroa. Do tara na siam ka mo levelinga Moroa i raba i min, Moroa naba raba box i mi laxasep avukat at levelinga ren; dola tara noxo siam ka levelinga at ne Moroa, Moroa naba lok pes bok laxasep kakalik teren, keke i do neni i doxoma i do im tebeng i.”

Luvutneton Mi Nenen Ne Iesu

(Mt 12:46-50; Mk 3:31-35)

19 Nenen ne Iesu mi luvutneton diga vosiga i, ketla di goxo epovo kusu dinat pas saparav i mila limixin diga umsu. 20 Lara laradi ga lok ti ne Iesu, “Nenam eburu mi luvutnetam no di tu kamang la di vara i do dina epaase eburu minu.”

21 Ketla ne Iesu ga lok tidi axap keretna, “Nedi mun ding tonga levelinga at ne Moroa la di mumu asu i, nedi mun luvutnaga mi luvutnetak.”

Iesu Ga Lox Amila Lamanman

(Mt 8:23-27; Mk 4:35-41)

22 At lara laaleng Iesu ga emu eburu mi luvuttadi loklok ka anasa ren la ni ga lok tidi, “Ata sen polo na lavatdan kis uto at lenep meo.” La diga los kas at lesepang la diga sen kaxat. 23 Se diga sen, Iesu ga unga. La mo langsangan lamanman ga mas lolos mo lavatdan kis, la larapotas ga luxa lesepang la ga auret do lesepang na rem gili la nedi axap dina seeve.

24 Luvuttadi loklok ka anasa diga vosiga ne Iesu la diga sox aus i la diga lok, “Leeme Silok, Leeme Silok! Ata seeve nga na!”

Iesu ga xatu kaxat la ga vaase lolos pe lamanman mi laras ekapus; la duga lox atnaasan la langsangan lenmila nga ga nemen.
25 La neni ga sue luvuttadi loklok ka anasa ren, “Kereva, kopmen tunuunu atnimi?”

Ketla diga sangu aleng la diga lingun la diga sue nedi getgesara, “Laradi salai na? I vaase sok lamanman la lavatdan kis la dira ronga res teren!”

Iesu Ga Riki Asu Lubunggas Basinge Laradi

(Mt 8:28-34; Mk 5:1-20)

26 La ne Iesu mi luvuttadi loklok ka anasa ren diga rupot to loxon ap mo lavatdan kis to at lenep Gerasa, na lemenemen ga nemen saparap na lavatdan kis Galili. 27 La ne Iesu ga vas su uloxon la ni ga ekip tangarang mi lara laradi mego ap mo lemenemen, lubunggas ga nemen teren. Buaang levenmaares neni gak lok beleben mene, la ni goxo nemen to xolonu. Ketla neni ga nemen amisik to at levenbuang digak mikmit labarongan e. 28 Se neni ga ven ne Iesu, ni ga xup lolos la ga xis tiktikbu mi luvatgulom teren to melamgo ren, la ga vaase lolos ti ne Iesu, “Iesu, Nitna ne Moroa i silok aleng! Lavanga salai u vara i do una lox i ria? A sing u do nemen uta lox asongot aleng ia!” 29 Ni ga tong i na mila ne Iesu ga tong pam i ri lagas kusu na vas su basinge i. Buaang laxanaleng na lagas ga sep kapmex i la do neni ga nemen maxopok at loklok tatao at limixin, diga xoxo lukngen la luxangkedek teren mi lemparoos sen, ketla neni ga baba koxorop nom lemparoos sen la lagas ga sasat ka i uto at lenep goxopmen tempanga ren.

30 Iesu ga sue i, “Nege laasen taram?”

La ni ga lok, “Laasen tarak ne Buaang.” Mila buaang lubunggas diga beles pam teren.
31 La nom lubunggas diga ngising ne Iesu do nemen neni guta sak tiki di uto at lemeroon.

32 Buaang laxanbo mo diga nemen auret, diga anan to at lakaana. Lubunggas diga sing ne Iesu kusu na riki asu di uto at nom laxanbo; la ni ga ke aonon di. 33 La lubunggas diga sixisu basinge nom laradi la diga vubeles uto xeneng at nom lababo; la nedi axap nom laxanbo diga sixisi at lakaana la diga los tup ukopok at lavatdan kis la diga xong axap.

34 Luvuttadi digak lok tatao mo laxanbo diga ven i na, la diga sixit kaxat la diga tong aonon na levelinga ri mo limixin to at lemenemen atdi la ri limixin to at lentaba lengkot petpes bok. 35 La limixin digat pas kusu dina ven mo lavanga ga vot. Diga vosiga ne Iesu la diga long lenget mo laradi, lubunggas ga vas su basinge vam i, mo gat kis saparap luxangkedek at ne Iesu; ga siga lempanga singsiga la lodoxoma ren ga xasep ta, la diga marat. 36 Nedi diga ven i na diga tong ri limixin do mo laradi ga lox avukat kereva. 37 La nom limixin ap mo lenep Gerasa diga sing ne Iesu kusu na onon ta, mila diga marat aleng. La ne Iesu ga los kas at lesepang la lesepang ga sen kaxat.

38 La laradi mo lubunggas ga vas su basinge i ga sing ne Iesu, “A vara i do ana emu eburu minu.”

Ketla ne Iesu ga riki aonon i, ga lok,
39 “Unamlong uto xolonu la una tong na lavanga ne Moroa i lok pam i ru.” La mo laradi gat pas maxeneng at nom lemenemen axap ga tong mo lavanga ne Iesu ga lok pam i rin.

Loolik At Ne Jairas

(Mt 9:18-26; Mk 5:21-43)

40 Se ne Iesu gamlong uto at lavatdan kis at lenep menak, buaang limixin diga paase momo min, mila nedi axap diga ngangais i. 41 Ap mo mun loxonaleng lara laradi, laasen teren ne Jairas ga vot; neni laradi gomgo at loogu singising mego. Ni ga xis tiktikbu mi luvatgulom teren saparap luxangkedek at ne Iesu la ga sing i xusu nat pas uto at loogu ren; 42 mila legesolik mun teren ga lasangaun mi legepu maares teren mo ga auret kusu na met.

Se ne Iesu gat pas uto at loogu at ne Jairas, buaang nedi limixin diga umsu saparav i at lengkot axap.
43 La lara latkin mo ga nemen; lanmeres gaaling gak lok amisik teren at levenaleng axap, ga epovo at lasangaun mi legepu maares. La buaang laxampilas teren ga xap gamasa mun ti luvuttadi sangsanga, ketla kopmen teta goxo epovo kusu na lox avukar i. 44 Neni ga vosiga limixin to melemu at ne Iesu la ga long tu at lungusungus at lavanga singsiga at ne Iesu la soso mun nom lanmeres ga xap ta.

45 La ne Iesu ga sue di xeretna, “Nege i long tu rak?”

La nedi axap diga sev apkap la ne Pita ga lok, “Leeme Silok, buaang limixin mo dit pas saparav u la mo di mumu u.”

46 Ketla ne Iesu ga lok, “Lara mo i long tu rak, a suma i do lololos i sixisu basinge ia.”

47 La mo latkin ga ven i do diga long lenget ka i, kuren la ni ga vosiga i, ga dede la ga xis tiktikbu mi luvatgulom teren saparap luxangkedek at ne Iesu. Mo go melamgo at limixin axap, neni ga tong asu ua lavasuun teren la ni ga long tu at ne Iesu la kereva neni ga lox avukat soso mun. 48 La ne Iesu ga lok tin, “Latkin, lunuunu ram i lok avukar u. Unat pas at lenmila.”

49 Iesu move ga paase na levelinga la lara laradi gat pas boro at loogu at laradi gomgo, ne Jairas. La ni ga lok ti ne Jairas, “Loolik taram ira met pam, la nemen uta lox angtang bok ba laradi loklox ase.”

50 Ketla ne Iesu ga ronga i la ga lok ti ne Jairas, “Nemen uta marat, una nuunu mun la neni naba rooro.”

51 Se neni ga vot to at loogu, neni goxo siam abeles tara ukeneng at loogu xusu dita vubeles eburu min, ketla ne Pita, Jon la ne Jems la ne temen mi nenen nom loolik kusuk mun. 52 Limixin axap go digang teng la digak saxaanu ap mo loolik. La ne Iesu ga lok, “Nemen mitang teng; loolik kopmen na met, neni mo i unga mun!”

53 Diga lok kalise i mila digaklen i do loolik mo gara met pam. 54 Ketla ne Iesu ga ranga axatu i mi lekngen la ga vaase lolos keretna, “Loolik, una xatu kaxat!” 55 Loroonan teren gamlong la ni ga xatu kaxat soso mun upana; la ne Iesu ga tong i ridi xusu dina raba i mi toxompanga anan. 56 Temen mi nenen duga sangu aleng, ketla ne Iesu ga vaase lolos di do nemen di guta tong i na lavanga ri teta.

Copyright information for `MMX