Luke 9

Iesu Ga Riki Asu Luvuttadi Loklok Ka Anasa

(Mt 10:5-15; Mk 6:7-13)

At lara laaleng Iesu ga ro bubua ka lasangaun legepura luvuttadi loklok ka anasa saparav i la ga raba nedi mi lololos kusu ri lox asu lubunggas la dina lox aroo limixin mekmeres. La neni ga lok do na riki asu di xusu dina vavang mi Linintoo at ne Moroa la dina lox aroo limixin mekmeres. La neni ga lok tidi, “Nemen mita xip kaka tempanga eburu minimi ri mo lavatpas; nemen takdak, la nemen mita lok kaka teventat, la nemen teveluxa, la nemen tevempilas, la nemen bok tevempanga singsiga etara xun. Mo do mina beles at tara toogu la limixin dina siam ka nimi, mina nemen eburu midi se minaba vas kaxat basinge mo lemenemen. Mo do limixin di noxo siam ka nimi, mina on basinge nom lemenemen la mina semla xepe laxakup basinge levengkangkedek atnimi, i ngan loklok katling tidi kusu ri lox asuusu lebelemamao at ne Moroa.”
Na loklok i lox asuusu i do ne Moroa naba raba lumumuat ti limixin ap mo lemenemen.
La luvuttadi loklok ka anasa diga vas kaxat, la digat pas kantubu at lara menemen, diga vavang mi Lagale Lavavang, la diga lox aroo limixin at lengkot axap.

Erodes Ga Rangku

(Mt 14:1-12; Mk 6:14-29)

Erodes, laradi gomgo boro Galili, ga ronga mo lempanga ga vot; la ni ga rangku aleng, mila lentaba luvuttadi mo digak lok do, “Jon, laradi sep susu mo ga roo xat amlong bok!” Lentaba diga lok do ne Elaisa mo ga vot, la lentaba diga lok do lara leeme vapaase alii me gano mo ga roo xat amlong ti lorooro. Erodes ga lok, “Agara ra korop pam laxaka at ne Jon; ketla nege i na laradi, mo nia a ronga i do na lok na lempanga?” La ni gak lok tong pen i do na ven ti ne Iesu.

Iesu Ga Raba Luxa Buaang Limixin

(Mt 14:13-21; Mk 6:30-44; Jo 6:1-14)

10 Luvuttadi vavang digamlong la diga tong i ri ne Iesu leven gugu axap diga lox i. Neni ga sat kaka di eburu min la nedi xusuk mun diga vas kaxat uto at lara lemenemen, laasen teren Betsaida. 11 Se limixin diga ronga i na, diga mumu asu i. La neni ga siam ka di mi lomomo, la ga paase ridi mumu Linintoo at ne Moroa, la neni ga lox aroo nedi, diga meres.

12 Ga ukantinao luvuttadi loklok ka anasa diga vosiga i la diga lok, “Una riki aonon limixin uto xusu dibat pas uto at levenmenemen la at lengkot petpes bok la dina puse ka tempanga anan la tengkot mikmidi bok tidi, mila na loxot i mimila rino.”

13 Ketla ne Iesu ga lok tidi, “Nemi xa mina raba nedi mi teveluxa kusu ri anan.”

La diga vorang i xeretna, “Ma ruuna mun lavalimo lengkongkide la legepu venmat. Kereva, u vara i do manat pas la mana un kaka teveluxa tinedi na limixin?”
14 Limixin go diga epovo at lavalimo larabin sangsangaun kobot. (5000)

Iesu ga lok ti luvuttadi loklok ka anasa ren, “Mina tong i ri limixin kusu dina xis kopok at lengkonbinam tadi i epovo at lavalimo sangaun.”

15 Luvuttadi loklok ka anasa diga lox i xuren, la diga tong i ridi do dina xis kopok. 16 Iesu ga lok kaka mo lavalimo lengkongkide la legepu venmat, la ga milik aurut uto vana at laxalibet, la ga tong avukat ti ne Moroa la ga sebex i, la ga raba luvuttadi loklok ka anasa min kusu dina epes i xantubu at limixin. 17 La nedi axap diga anan la diga an mais; la luvuttadi loklok ka anasa diga luxa lasangaun legepura leventat mi leveluxa mo diga an ake ren.

Pita Ga Tong Asu Lunuunu Ren

(Mt 16:13-19; Mk 8:27-29)

18 At lara laaleng ne Iesu xusuk mun gat pas kusu nang sing, la luvuttadi loklok ka anasa diga vot posiga i. La neni ga sue di, “Limixin di lok do nenia nege?”

19 Diga vorang i rin keretna, “Lentaba di lok do nenu ne Jon laradi sep susu; lentaba di tong i do nenu ne Elaisa; la lentaba di tong i do lara leeme vapaase alii me gano mo i roo xat amlong.”

20 La ne Iesu ga sue di, “Kereva ba nimi? Nemi mi lok do nenia nege?”

Pita ga lok, “Nenu Lanarong at ne Moroa.”

21 La ne Iesu ga vaase pe lolos di, do nemen di guta tong i ri tara do neni Lanarong.

Iesu Ga Paase Mumu Lanmet Teren

(Mt 16:20-28; Mk 8:30-9:1)

22 La ne Iesu ga lok, “Nenia Laradi Mevana, anaba xip losongsongot solo, la loxongkulao silok at limixin me Judaia, la lavamaasa silok la luvuttadi loklox ase at Lenavolo diba sok tixirixes kepe ia. Diba sev amer ia, la nenia anaba roo xat amlong at laaleng sepsev avantun.”

23 La neni ga lok ti luvuttadi loklok ka anasa ren, “Mo do tara i vara i do na emu minia, neni na domampe lorooro axap teren, la na gagas li i xusu nap kip losongsongot at levenaleng axap, la na mumu asu ba ia. 24 Do nege i vara i do na ranga alis lorooro ren, neni naba sang apkav i; ket do nege i soxope lorooro ren ti lok luvukat tarak, neni naba lok kaka lorooro avukat. 25 I lok kapmek do taradi na ruuna ka lempanga axap at na lavatbung menemen, la neni i subu basinge lorooro at ne Moroa. 26 Mo do taradi na lok mamangan kepe ia eburu mi levelinga rak, nenia, Laradi Mevana, anaba sok tixirixes xepe i ap mo laaleng nenia ana si ukopok mi lisisixam silok tarak la lisisixam silok at ne Tamak la at lubung angelo ren. 27 Mina doxoma i na! I ruturun tinotno, a tong i rinimi do lentaba atnimi na, di noxo met se at nom laaleng diba ven livipisik at levelinga mumu Linintoo at ne Moroa.”

Moroa Ga Lox Arepukus Ne Iesu

(Mt 17:1-8; Mk 9:2-8)

28 Iesu ga vaase axap na levelinga, la melemu at lavanuan levenaleng gara volo, Iesu ga lam kaka ne Pita, Jon, la ne Jems eburu min; la diga urut uto vana at lakaana kusu dina ngising. 29 Ga se neni ga lok lising, lemeren axap teren ga milik gamgames, la lavanga singsiga bok teren gam games aleng!

30 La ne Moses mi ne Elaisa duga rupot boro vana at laxalibet eburu mi lisisixam silok ga vung pavaa du. 31 La duga vot pasa ne Iesu la duga epaase eburu min do neni naba lox asorun lavapaase alii at ne Moroa do neni naba met to Jerusalem. 32 La ne Pita eburu mi larapen tangas teren diga unga met, ketla diga aus kaxat la diga ven lisisixam silok at ne Iesu la luradi mo duga tu eburu min. 33 Se luradi duga lok do duna on basinge ne Iesu, Pita ga lok tin, “Leeme Silok, i lox avukat tinotno at loklok atnama nade. Ata lok tavantun taraugu xukuxut, tara ru, tara ri ne Moses, la tara ri ne Elaisa.” Ni goxoklen tinotno i do lai mo ni ga paase min.

34 Pita move ga paase, la lusugao ga ravasi la ga vung pavaa di; la luvuttadi loklok ka anasa diga marat aleng. 35 La levelinga ga ravasu boro xeneng at lusugao ga lok keretna, “Ana ne Nuruk. Aga soxolik ka vam i. Minang tonga levelinga ren.”

36 Ga se na levelinga ga xap, Iesu xusuk mun mo ga nemen eburu mi luvuttadi loklok ka anasa ren. Luvuttadi loklok ka anasa digak lok pilo mumu na lempanga, la di goxo tong asu i na ri teta ap mo levenaleng.

Iesu Ga Riki Xepe Lagas Basinge Lara Lamdak

(Mt 17:14-18; Mk 9:14-27)

37 Ap mo manga laaleng petpes diga vas si boro vana at lakaana, la buaang limixin diga ekip tangarang mi ne Iesu. 38 La lara laradi ga xup lolos to xantubu atdi nom limixin, ga lok keretna, “Leeme loklox ase! Pen i na, a sing u do una ven mumu lamdak tarak. Neni legesamdak mun tarak! 39 Lara lagas ing tanga tu ren la soso mun ip kup kaxat lolos la i lulu asi min uto ri laxangka; la lamdak i dede la lemeseng it kis pe lungusno ren! La na lagas ip sep amisix i la ma lixilik do na sev amer i! 40 A sing luvuttadi loklok ka anasa ram kusu dina riki xepe lagas uto, ketla kopmen dina epovo.”

41 Iesu ga vorang i rin keretna, “Nemi limixin eburu mi luvuttadi loklok ka anasa, kopmen tunuunu atnimi! Lavanisa aleng tinotno nenia anaba xip tutu mi levenmumuat atnimi? Nemi mi lox amolo ia.” La neni ga lok ti mo laradi, “Ude mi nom lamdak.”

42 Se nom lamdak ga vas saparap ne Iesu, mo lagas ga sev asi i uto xopok at laxangka la ga sev adede lolos i. La ne Iesu ga vaase lolos ti nom lagas la lagas ga on basinge mo lamdak la lamdak ga lox avukat ta, la ne Iesu ga raba amlong nom lamdak ti ne temen. 43 Nom axap limixin diga sangu aleng at nom lololos silok at ne Moroa.

Lesepsev Agepura Lavapaase At Ne Iesu Mumu Lanmet Teren

(Mt 17:22-23; Mk 9:30-32)

Limixin move diga paase mumu lempanga axap ne Iesu gak lox i, la neni ga lok ti luvuttadi loklok ka anasa ren,
44 “Nemen mita domampe na levelinga ana tong i rinimi! Nenia Laradi Mevana, mo diba song araba ia uto ri lekngen di limixin kapmek.” 45 Ketla luvuttadi loklok ka anasa di goxoklen ua lavasuun at levelinga ren. Lavasuun at nai levelinga ga lipe atdi; kuren la di goxo xasep, la diga marat ti sue i mumu i na lavanga.

Nege I Silok

(Mt 18:1-5; Mk 9:33-37)

46 La leedak ga ravasu xantubu at luvuttadi loklok ka anasa mumu i do nege atdi ga silok. 47 La ne Iesu gaklen lavanga salai luvuttadi loklok ka anasa diga doxoma mumu i; kuren la neni ga lok kaka lara lamdak kakalik, la ga vaxaru saparav i min; 48 la ga lok tidi “Do nege i lok loklok nunuan keneng at laasen tarak ti na lamdak kakalik, neni i lok loklok nunuan tia; la do nege i lok loklok nunuan tia, neni i lok loklok nunuan ti ne Moroa, neni ga riki ia. Mila do nege i lixilik tinotno xantubu atnemi axap, neni i silok tinotno.”

49 Jon ga lok, “Leeme Silok, maga ven lara laradi ga riki kepe lubunggas mi laasen taram, la maga tong i rin do na xap ta i, mila neni xopmen at libinam tadi atdik.”

50 Iesu ga lok tin la tinedi bok luvuttadi loklok ka anasa, “Nemen mita ru vepe i, mila do nege i esep mi ne Satan, neni lentangas atdik.”

Limixin Me Samaria Diga Lox Abulubun Kepe Ne Iesu

51 Levenaleng ga sixit auret ta xusu ne Moroa naba lok kaka ne Iesu upana at laxalibet, la neni ga lox agagas lodoxoma ren la neni ga vas kaxat uto Jerusalem. 52 Neni ga riki amgo lentaba luvuttadi mi lavapaase axasep, la diga on basinge i la digat pas uto at lara lemenemen to Samaria xusu diba lox agagas li lempanga axap tin kusu ba midi e. 53 Ketla limixin mego di goxo siam kaka i, mila digaklen i do neni mo gat pas uto Jerusalem. 54 Se ne Jems mi ne Jon luradi loklok ka anasa duga ronga i na, duga lok, “Leeme Silok, u vara i do mana ro xaka laxao boro vana at laxalibet la na xotos axap na limixin?” 55 Iesu ga rem gili amlong la ga vaase sok du; 56 la digat pas manga uto at lara lemenemen petpes.

Levenmumuat Atnedi Di Mumu Asu Ne Iesu

(Mt 8:19-22)

57 Digat pas ap mo langa, la lara laradi ga lok ti ne Iesu, “Aba mumu asu u at lengkot axap unat pas teren.”

58 Iesu ga lok tin, “Lubungman sio di ruuna lengkot mikmidi atdi, la lavapixa di ruuna levemposovos atdi, ketla nenia, Laradi Mevana, axo ruuna temenemen kusu ria rimdi la na lok mamana ren.”

59 La ne Iesu ga lok bok ti mo lara laradi vetpes, “Una mumu asu ia.”

Ketla mo laradi ga lok tin, “Leeme Silok, una ke xepe be ia, kusu anat pas la anak mit ne tamak.”

60 Ketla ne Iesu ga vorang i rin keretna, “Una ke nedi limixin kopmen toxot tidi xeneng at Linintoo, dinak mit limixin nedi di met pam. Unat pas at laramenemen la una vavang mi Linintoo at ne Moroa.”

61 Lara laradi bok ga lok tin, “Leeme Silok, aba mumu asu u, ketla una ke xepe be ia xusu ana lox abeese be lentaba rak.”

62 Iesu ga lok tin, “Do tara i ru kaxat ka i xusu na gugu ria, la amisik neni ik milik amlong ti lempanga ren, neni xopmen na epovo ti lok lugugu at Linintoo at ne Moroa.”

Copyright information for `MMX