Mark 2

Iesu Ga Lox Aroo Laradi Labantuxu Ren Ga Molo Axap

(Mt 9:1-8; Lu 5:17-26)

Lentaba levenaleng ga xap la ne Iesu gamlong uto Kaprenaum la limixin diga ronga levelinga do ne Iesu ga rupot to at loogu ren. La buaang limixin diga vot eburu go la nom loogu ga umsu la no ma xamang bok saparap lumusaragu ga umsu bok. La ne Iesu ga vavang tidi. La lentaba limixin diga rupot to at nom loogu la lavanuet atdi digap kip lara laradi mi loora ren. Nom laradi ga meres, labantuxu ren ga molo axap. La nedi di goxo epovo dina vot saparap ne Iesu min mila buaang limixin diga ru pe lumusaragu. Kuren la nedi diga eng urut at nom loogu la diga das avolo loxot to mavana saparap ne Iesu la diga lox asi nom laradi mekmeres mi loora ren. La ne Iesu ga ven kibis lunuunu atdi la ga lok ti laradi mekmeres keretna, “Lentangas tarak. Leveloklok kakapmek axap taram, a doxoma xepe i.”

La lentaba luvuttadi mamalagan digat kis go, diga ronga nom levelinga at ne Iesu la diga esue at levendoxoma atdi xeretna, “Na laradi i paase kereva? I paase vupu ri ne Moroa. Nege i epovo ti doxoma xepe leveloklok kakapmek? Moroa xusuk i epovo.”

La soso mun ne Iesu ga doxoma xisip nom levendoxoma atdi la ga lok tidi xeretna, “Tila nemi mi doxoma ekarakat mumu i na levelinga rak? Ua levelinga xopmen na lolos ti tong i; leveloklok taram ara doxoma xepe vam i, kopla ana tong i do, katu kaxat la unat pas? 10 Ketla a vara i do minaklen i do, nenia, Laradi Mevana, a ruuna lololos at na lavatbung menemen ti doxoma xepe leveloklok kakapmek.” La ni ga lok ti mo laradi mekmeres keretna, 11 “A tong i ru, una xatu upana, la una xip kaka loora ram, la una vas kaxat ukolonu.” 12 La nom laradi ga xatu kaxat, la ga xip kaka loora ren la ga vas kaxat. La nedi axap diga ven i, diga sangu aleng la diga emi asu mi ne Moroa la diga epaase xeretna, “Nedik goxovisi ven tempanga xeretnom.”

Iesu Ga Ro Xaka Ne Levi

(Mt 9:9-13; Lu 5:27-32)

13 La melemu ne Iesu ga on basinge manga lemenemen Kaprenaum la gat pas saparap lavatdan kis Galili. La buaang limixin diga vot pasa i la neni ga anasa di. 14 La melemu ni gat pas uto lixilik la ga ven ne Levi nitna ne Alpias, gat kis to at loogu xekepe pilas. La ne Iesu ga lok tin keretna, “Una mumu asu ia.” La ne Levi ga xatu la ga mumu asu i.

15 Melemu ne Iesu gat kis la ga anan to at loogu at ne Levi. Luvuttadi xekepe pilas la limixin kapmek
Anai, nedi luvuttadi me Judaia ua kopmen di goxo mumu asu avukat lenavolo mi loklok atdi limixin me Judaia.
diga anan eburu mi ne Iesu. Buaang limixin kerepmo diga mumu asu ne Iesu.
16 La luvuttadi mamalagan mi lubung Parisi diga ven i do ne Iesu ga anan eburu mi nom limixin kapmek la diga lok ti luvuttadi loklok ka anasa at ne Iesu xeretna, “Tila ne Iesu i anan eburu mi nom luvuttadi loklok ka pilas la limixin kapmek?”

17 La ne Iesu ga ronga i nom la ga lok tidi xeretna, “Limixin di lox avukat, kopmen dinak pakes ti loklok tooro, ketla nedi xusuk mun dik meres. Aga rupot kusu ri ro xaka limixin kapmek dikpakes kusu dina leeng, la nia goxo rupot kusu rinedi limixin mokmokso.”

Iesu Ga Paase Mumu Loklok Ti Mun An

(Mt 9:14-17; Lu 5:33-39)

18 At lara laaleng luvuttadi loklok ka anasa at ne Jon, laradi sep susu limixin, diga mun anan la lubung Parisi bok diga mun anan. La lentaba limixin diga vot pasa ne Iesu la diga sue i xeretna, “Luvuttadi loklok ka anasa at ne Jon di mun anan la lubung Parisi bok di mun anan; tila ba luvuttadi loklok ka anasa ram kopmen dina mun anan?”

19 La ne Iesu ga vorang i ridi mi lavapaase poovo xeretna, “At loklox anarong ti leepot, lentaba at laradi epot di noxo mun anan mila laradi epot ik lox eburu midi. 20 Ketla laaleng move naba rupot la limixin petpes diba lam ka laradi epot basinge lentaba ren la dina mun anan ba ap mo laaleng.”

Lempapaase Poovo Mumu Levenanasa Maxat At Ne Iesu

21 La ne Iesu ga tong asu lavapaase poovo ridi xeretna, “Kopmen teta na balais ka loxontamon maxat kusu na sok gatgat pe lamamara at labantamon maut; mo do neni na lox i xuren, loxontamon maxat ira lok kapmek pam la kopmen na epovo bok ba kusu ata ba lok tavanga min; la nom loxontamon maxat noxo epovo kusu na lok pe avukat lamamara at loxontamon maut.”

22 La ne Iesu ga vaase bok tidi mi lavapaase poovo. Ni ga lok keretna, “Kopmen tara na soli li laxadan vaen maxat uto xeneng ti labantuxu at lavatme i maut pam. Mo do neni na lox i xuren, mo labantuxu maut ba repagam la laxadan vaen naba soli su ukamang, la labantuxu maut naba lok kapmek. Laxadan vaen maxat mina soli li i at labantuxu maxat.”

Iesu Ga Paase Mumu Laaleng Kaala

(Mt 12:1-8; Lu 6:1-5)

23 At lara laaleng kaala Iesu mi luvuttadi loklok ka anasa ren diga vas polo lentaamang piao la luvuttadi loklok ka anasa ren diga dik ka levempeven piao la diga anan i. 24 La lubung Parisi diga ven i nom la diga lok ti ne Iesu xeretna, “Pen ba i nom. Dira los polo vam Lenavolo, i tong i do nemen mitak lok lempanga keretnom at laaleng kaala.”

25 La ne Iesu ga lok tidi xeretna, “Mina doma su ap mo lempanga ne Devit, ga lox i at laaleng neni eburu mi limixin teren digak pakes la diga roxo. 26 Neni ga vubeles at loogu at ne Moroa ap mo lamaares ne Abaita neni laradi gomgo at lavamaasa. La ne Devit ga lok ka mo lengkongkide digam taba min ti ne Moroa, la ni ga anan teren la ga raba bok loxot teren ti limixin teren. La kerepmo diga los polo Lenavolo, mila lavamaasa kusuk mun diga anan mo lengkongkide.”

27 La ne Iesu ga lok bok tidi xeretna, “Moroa ga lok li laaleng kaala ri lok tooro limixin. Neni goxo rudum li limixin kusu ri lok tooro laaleng kaala. 28 La nenia, Laradi Mevana. Nenia leeme silok at laaleng kaala la a lok tatao mo laaleng.”

Copyright information for `MMX