Mark 6

Limixin Me Nasaret Diga Raba Arulu Ne Iesu

(Mt 13:53-58; Lu 4:16-30)

La ne Iesu eburu mi luvuttadi loklok ka anasa ren diga vas kaxat basinge mo lemenemen la diga rupot to at lemenemen aulis teren. At laaleng kaala Iesu ga anasa ro at loogu singising la buaang limixin diga ronga i la diga sangu.

La diga esue xeretna, “Na laradi ga lok ka na lakleklen solo meva? La neni ga lok ka lodoxoma nunuan meva xusu neni i epovo na lok lempanga sangsangu?
Neni laradi gugu gu mene la neni ne nitna ne Maria la neni neton ne Jems, ne Joses, ne Judas, la ne Simon, nedi di nemen de la luvurinen bok di nemen de at na lemenemen.” La kerepmo limixin diga raba arulu ne Iesu.

La ne Iesu ga lok tidi xeretna, “Leeme vapaase alii, limixin di lok ngangao ren at lengkot axap, ket to at lemenemen teren, la kantubu at limixin teren la libibinat teren, kopmen dina lok ngangao ren.” La ne Iesu goxo epovo na lok lempanga sangsangu go, ketla neni ga lok li lukngen mavana at lentaba mun kusu na lox aroo di. La neni ga sangu aleng mila di goxo nuunu.

Iesu Ga Riki Luvuttadi Loklok Ka Anasa Ren Ti Vavang

(Mt 10:5-15; Lu 9:1-6)

La ne Iesu ga ro xaka lasangaun mi legepura luvuttadi loklok ka anasa ren la neni ga riki gepgepura di uto at levenmenemen petpes. La neni ga raba di mi lololos kusu dina riki xepe lubunggas basinge limixin.

La neni ga vaase pe di xeretna, “Mina lok kaka levengkidak atnimi, ketla nemen mita xip kaka tempanga vetpes bok. Nemen teveluxa, nemen teventat, nemen tevempilas at lempanga lukluxa. Mina siga luvanga vatpas, ketla nemen mita xip kaka tempanga singsiga ri etara xun.” 10 La neni ga lok bok tidi, “Do mina vubeles at tara temenemen miba nemen at legesa gu, se miba on basinge mo lemenemen. 11 Do limixin di noxo siam ka nemi la di noxo ronga levelinga atnimi, mina on basinge mo lemenemen la mina semla xepe lengkakup at lengkangkedek atnimi, i ngan loklok katling tidi xusu ri lox asuusu levenmukmusak at ne Moroa.”
Na loklok i lox asuusu i do ne Moroa naba raba lumumuat ti limixin ap mo lemenemen.


12 La luvuttadi loklok ka anasa ren diga vas kaxat uto at levenmenemen la diga vavang do limixin dina leeng. 13 La diga riki xepe lubunggas basinge limixin la diga so li ladan avukat at limixin mekmeres ngan loklok at lubungmixin me Judaia la diga lox aroo di.

Jon Laradi Sep Susu Limixin Ga Met

(Mt 14:1-12; Lu 9:7-9)

14 La ne Erodes, loorong silok at lenep silok Galili ga ronga levelinga at lugugu at ne Iesu, mila laasen at ne Iesu ga onon at levengkot axap. Lentaba diga lok do ne Iesu neni ne Jon, laradi sep susu limixin. Diga lok bok dola ne Jon ga roo xat amlong at lanmet, kuren la neni i epovo na lok lempanga sangsangu.

15 Lentaba vetpes diga lok keretna, “Neni ne Elaisa leeme vapaase alii.”

Lentaba diga lok keretna, “Neni lara me gano atnedi lavaeme vapaase alii at ne Moroa.”

16 Ketla ne Erodes ga lok keretna, “Neni ne Jon. Nia agara ra korop pam laxaka ren la ni ga roo xat manga.”

17 Leretere at lanmet at ne Jon keretna. Erodes ga tong i ri luvuttadi esep teren ti ranga alis ne Jon la diga xoxo i la diga lok li i ro at loogu xokoxo. Erodes ga lox i na mila latkin teren ne Erodias ga musak ne Jon. 18 Lavasuun at lumukmusak at nom latkin keretna; ganoxa ne Jon ga vaase sok ne Erodes mila neni ga sak paxat ka ne Erodias, latkin at neton ne Pilip la ga epot teren. 19 Kuren la ne Erodias ga musak ne Jon la ga vara na sev amer i ketla neni goxo epovo, 20 mila ne Erodes ga marat at ne Jon la ga lok tata i. Erodes gaklen i do ne Jon lagale laradi mokmokso la gang tonga levelinga ren. Neni ga doma solo mumu i nom levelinga at ne Jon, ketla ni ga lok momo ring tonga i.

21 Ketla ne Erodias ga vuse ka langas ti sev amet ne Jon keretna. At lara laaleng ne Erodes ga lok laanan ti lok katling mo laaleng nenen ga visix i ren. Lavaeme silok at lugugu at ne Erodes mi luvuttadi esep amgomgo ren mi loxongkulao amgomgo bok at lenep Galili digak lok at nom laanan. 22 La lara loono maxat, neni loolik at ne Erodias ga tii, la ne Erodes eburu minedi diga anan diga lok momo ren la ne Erodes ga lok ti nom loono keretna, “Una tong asu lavavara ram ti tavanga la nia ba raba u min.” 23 La neni ga lok lavangpangpe rin keretna, “A paase tuturun at lemeren ne Moroa. Nia aba raba u mi tevempanga u vara i, i epovo at loxonatat at lempanga axap tarak.”

24 La mo loono ga sixisu la ga sue nenen keretna, “Lavanga sala nia ba sing ka i ren?”

La ne Erodias ga vorang i xeretna, “Una sing ti lavatlak at ne Jon.”

25 La soso mun nom loono gamlong parap ne Erodes la ga lok, “Una raba ia mi lavatlak at ne Jon laradi sep susu limixin. Una lok li at tavattingtigon silok.”

26 La ne Erodes ga lok bukbulu aleng mila neni goxo para i do ne Jon na met; ketla neni goxo epovo xusu ri lox ekun levelinga ren mila nom luvuttadi silok diga ronga vam nom lavangpangpe. 27 La soso mun Erodes ga lox aonon lavapaase ri laradi esep teren do neni na sep korop laxaka at ne Jon la na xip kaka lavatlak teren uto saparav i. La nom laradi ga vas kaxat la ga sep korop laxaka at ne Jon to at loogu xokoxo. 28 La neni ga lok li nom lavatlak to at lavattingtigon silok la ga rupot min la ga raba mo loono min la loono ga raba nenen min. 29 La luvuttadi loklok ka anasa at ne Jon diga ronga i dola ne Jon ga uu la diga rupot la diga lok ka labantuxu ren la digak mir i ro at lubuang mikmit tongan.

Iesu Ga Raba Buaang Limixin Mi Lempanga Anan

(Mt 14:13-21; Lu 9:10-17; Jo 6:1-14)

30 La luvuttadi vavang at ne Iesu digamlong ta la diga tong asu lempanga axap diga lox i la levelinga diga anasa limixin min. 31 La ne Iesu ga lok tidi xeretna, “Ude nimi, nedik kusuk ata onon uto at lamatbin kusu mina lok mamana lixilik be.” Mila buaang limixin diga rupot pasa amisik ne Iesu mi luvuttadi loklok ka anasa ren la di goxo epovo kusu dina anan.

32 La diga sen kaxat mi lesepang uto at loxot petpes, ua limixin di goxo nemen teren. 33 Ketla buaang limixin diga ven nedi diga sen mi lesepang la diga ven kibis di la digat pas basinge levenmenemen atdi la diga mumu loxon la diga rupot avot to ap mo loxot ti ne Iesu mi luvuttadi loklok ka anasa ren. 34 La ne Iesu midi diga oso mi lesepang la ni ga ven buaang limixin solo; neni ga balamu di mila diga lok ngan laxasipsip kopmen taradi loklok tata atnedi. Kuren la ni ga anasa di mi laxampapaase solo.

35 Ga ukantinao luvuttadi loklok ka anasa at ne Iesu diga rupot pasa ne Iesu la lara atdi ga lok tin keretna, “Ukantinao nga na la na loxot, ni loxot mimila rino. 36 Una riki aonon limixin kusu dibat pas uto at levenmenemen kusu dina un ka tempanga anan tidi.”

37 Ketla ne Iesu ga lok tidi xeretna, “Nemi xa mina raba nedi mi teveluxa xusu dina anan i.”

La diga lok tin keretna, “Kereva, u vara i dola manat pas ti un kaka tevengkongkide mi legepu sangaun kobot (200) denarias atdik la mana un panga anan min tidi?” Mo lempilas ga epovo dola tara na gugu at lavanuti gaaling ti lok kaka i nom.

38 La ne Iesu ga lok tidi xeretna, “Minat pas la mina ven lavanisa lengkongkide mo atnimi ik lok.”

La digaklen ka i la diga lok tin keretna, “Lavalimo lengkongkide la legepu venmat kakalik na.”

39 La ne Iesu ga lok tidi xeretna, “Mina lox axis limixin axap at levenbinam tadi at levennep mi lempivilis avukat teren.” 40 La nedi diga xis kopok ap mo lenep, lepentaba legesa sangaun kobot (100) diga xis eburu, lentaba lavalimo sangaun limixin diga xis eburu, nedi axap digat kis kerepmo. 41 La ne Iesu ga lok kaka levengkongkide mi luemat, la ga milik aurut uto at laxalibet la ga tong avukat ti ne Moroa, la ga sebek nom levengkongkide la ga raba luvuttadi loklok ka anasa ren min la diga raba limixin min. La ni ga raba bok luemat tidi. 42 La limixin axap diga anan la diga an mais. 43 La luvuttadi loklok ka anasa diga luxa lasangaun mi legepura leventat mi leveluxa mo diga an ake i ren. 44 La nedi luvuttadi remes diga anan, diga epovo at lavalimo larabin sangsangaun kobot (5000).

Iesu Gat Pas To Mavana At Lavatdan Kis

(Mt 14:22-36; Jo 6:15-21)

45 La soso mun ne Iesu ga tong i ri luvuttadi loklok ka anasa ren do dina los kas at lesepang la dinamgo rin uto at lemenemen Betsaida. La ne Iesu ga riki aonon limixin. 46 La neni ga vas kaxat basinge di la ga urut uto vana at lakaana xusu na ngising.

47 At laxanimin lesepang at luvuttadi loklok ka anasa gak sixit kantubu at lavatdan kis la ne Iesu xusuk gak lok to loxon. 48 La ne Iesu ga ven digatlatla lolos mila lamanman gat mas lolos tangarang di. Kantubu at lavantun konaleng la lavanna konaleng at laxanimin ne Iesu ga vas kaxat to mavana mun at lavatdan kis. La ni ga rupot saparap di la ga doma i do na vas polo di. 49 Ketla at loxonaleng diga ven ne Iesu gat pas to mavana at lavatdan kis, diga lok do neni loroonan panga la diga xup lolos, 50 mila diga ven i la diga marat aleng.

La soso mun ne Iesu ga lok tidi xeretna, “Nemen gat mita marat. Mina lolos. Nenia mun na.”
51 La neni ga los kas at lesepang la lamanman gara xap matmas ta. La luvuttadi loklok ka anasa ren diga sangu aleng. 52 Levendoxoma atdi ga repe. Di goxoklen lavasuun at lempanga sangsangu ne Iesu ga lox i mi mo lempanga anan.

53 La diga xan polo lavatdan kis la diga oso to at lenep kangka Genesaret. 54 La diga vas su at lesepang, la limixin ap mo loxot diga ven kibis ne Iesu. 55 La digak sixit uto at lengkot axap ap mo lenep la digamlong mi luvuttadi mekmeres, lentaba atdi diga xip di mi levenora uto at lengkot no ne Iesu gat pas ue. 56 La ne Iesu gat pas tangtagap at lengkot axap, levenmenemen kakalik, levenmenemen silok, laxairing bok la diga lok li limixin mekmeres to at lengkot etang. La diga sing ne Iesu do dina long tu at lavanga singsiga ren. La nedi axap diga long tu ren, diga lox avukat axap.

Copyright information for `MMX