aMal 3:1

Matthew 11

Iesu La Ne Jon Laradi Sep Susu

(Lu 7:18-35)

Se ne Iesu ga raba linga axap ti lasangaun mi legepura luvuttadi loklok ka anasa ren, neni ga vas basinge mo loxot la gat pas uto Galili kusu na lox ase limixin la na vavang to at laramenemen atdi.

Ap mo levenaleng ne Jon laradi sep susu ga nemen at loxokoxo, neni ga ronga lempanga ne Karisito ga lox i, la neni ga riki lentaba luvuttadi loklok anasa ren uto saparap ne Iesu mi levelinga xeretna, “Tong axasev i rinama do xereva, nenu vam Lanarong, kopla tara gove manaba ngangais i?”

La ne Iesu ga vorang i ridi, “Minamlong la mina tong i ri ne Jon mumu lempanga mi ronga i la mi ven i. Nedi limixin mi lengkatli main, mo di reven manga; nedi lengkangkedek atdi ga lok kapmek, mo dit pas avukat; la nedi dik meres mi lanmeres gu, di lox avukat pam; la nedi levenbaalung atdi i repe, ding tonga manga; la nedi diga met pam mo di roo xat amlong pam; la limixin banbalo, mo ding tonga Lagale Lavavang. Luvukat ti neni laradi kopmen noxo subu basinge ia la lebelen ixo lok kapmek ti na lugugu rak.”

Se luvuttadi loklok ka anasa at ne Jon diga vas kaxat pam, Iesu ga tong levelinga mumu ne Jon tinedi limixin keretna, “At levenaleng migat pas do mina ronga linga at ne Jon to at lamatbin, laradi salai nemi miga lok do miba ven i? Kereva, miga nua i do miba ven taradi naba lok ngan lovobeo, lamanman it mas amdi i? Lavanga salai migat pas do mina ven i? Kereva, miga ven laradi ga siga lavanga singsiga avukat? Kopmen. Limixin di siga lempanga singsiga avukat la di ruuna lapnovos silok, nedi dina nemen keneng at laraugu ngan loogu at loorong silok. Mina tong i ria, lavanga salai migat pas do mina ven i? Taradi vapaase alii? I ruturun tinotno. A tong i rinimi, do nemi miga ven laradi ga silok aleng ti lavaeme vapaase alii. 10 Jon neni laradi mo Lovoang Kaala ga paase mumu i. Moroa ga lok keretna,

‘Laradi vapaase rak, anaba riki amgo i ru kusu na lox agagas li langas tu.” a 

11 La ne Iesu ga lok bok, “Nia a tong tuturun i rinimi, Jon laradi sep susu, neni i silok aleng tinedi limixin axap at na lavatbung menemen; ketla do tara i lok ngan laradi gamasa la neni lanat at Linintoo no vana at laxalibet, ni i silok ti ne Jon. 12 Ga ru ka i at laaleng ne Jon ga vavang kaxat, i se at na laaleng lingina, Linintoo no vana at laxalibet gat pot mi lololos, ketla i ekip tangarang mi limixin kapmek di lolos kusu dina ru pe i. 13 Levelinga at lavaeme vapaase alii, la Lenavolo, limixin diga mumu asu i, se at lovotpot at ne Jon. 14 La mo do mi epovo do mina siam ka lempapaase atdi, mina nuunu do neni ne Elaisa, mo diga tong i do neni nabamlong. 15 Do mi ruuna levenbaalung, mina ronga avukat na levelinga.”

16 La ne Iesu ga lok bok keretna, “Limixin at na levenaleng, ana vaase poovo midi mi lavanga sala? Nedi di lok ngan laxamdak mi laxaalik kakalik dit kis to at loxot etang. Lara libinam atdi dip kup ti mo lara libinam,

17 ‘Magak pixan lengkompixan epot tinimi, ketla mi goxopara na tii momo; magak pixan lengkompixan bukbulu, ketla mi goxopara nang teng.’
18 Jon ga vot, la ni ga mun anan la goxo inin vaen, la limixin diga lok do, ‘Lagas i nemen teren!’ 19 Ketla nenia, Laradi Mevana, aga vot, la nia a anan la a inin, la limixin di lok, ‘Mina ven ba i na laradi! Neni laradi xoxo anan la laradi inin, la i etangas mi luvuttadi loklok ka pilas eburu mi limixin kapmek!’ Ketla lugugu at ne Moroa i pisik avukat la kerepmo i lox asuusu i do lodomdoma alii at ne Moroa i lox avukat.”

Laramenemen Ua Kopmen Di Goxo Nuunu At Ne Iesu

(Lu 10:13-15)

20 Melemu Iesu ga ru ka i xusu na vaase mukmusak ti limixin ap mo laramenemen ua neni ga lok buaang lempanga sangsangu e, mila limixin ap mo laramenemen kopmen di goxo leeng basinge laxakapmek atdi. 21 Iesu ga lok keretna, “Naba lok kapmek aleng tinemi limixin me Korasin. La naba lok kapmek aleng bok tinemi limixin me Betsaida. Mo levempanga sangsangu nia aga lox i ro xantubu atnimi, mo do nia gita lox i ro Taia la Sidon, soso mun limixin me go, nedi gita leeng pam la gita etara mun lengkontamon kapmek, la gita reeve vam laxakup at lengkot atdi. 22 Ketla ana tong i rinimi do at laaleng ete, ne Moroa naba lox asuusu lumumuat uto ri limixin at lumenemen Taia la Sidon, ketla langsangan lumumuat naba nemen mavana atnimi. 23 La nemi limixin me Kaprenaum. Mi vavara i do mina silok ti limixin axap, ketla ne Moroa ba sok gingin asi minimi uto at lemenemen songsongot. Mo lempanga sangsangu, aga lox i dom kantubu atnimi, mo do nia gita lox i ro Sodom, nedi gitaba leeng basinge laxakapmek atdi la ne Moroa gitoxo sele utut kape mo lemenemen. 24 A tong i rinimi do at laaleng ete, Moroa naba lox asu lumumuat ti limixin kapmek to Sodom, ketla tinemi limixin, lumumuat naba silok aleng tinimi.”

Iesu Ga Emi Asu Mi Ne Moroa

(Lu 10:21-22)

25 Ap mo laaleng ne Iesu ga lok ti ne Moroa, “Nia a emi asu minu, Tamak; nenu Leeme Silok at laxalibet mi lavatkangka. Nia a emi asu minu mila ugara lox ase vam nedi limixin gamasa mi levelinga mumu Linintoo; la uga lipe i basinge limixin leklen la limixin diga lox ase. 26 I ruturun, Tamak. Anai uga lox i mi lodoxoma la lomomo ram.”

27 La ne Iesu ga lok ti mo limixin, “Tamak, ira raba vam ia mi lempanga axap. Kopmen teta naklen ia, ketla ne Tamak kusuk mun; la kopmen teta naklen ne Tamak, ketla nenia ne Nitna xusuk mun, la tinedi mun nenia a vara i kusu ana lox ase di min. 28 Nemi axap mik sak saaban mi laxanaknixip keneng at lorooro atnimi, mina vosiga ia, la aba raba nimi mi loklox amas. 29 Mina siam ka loklok tarak la mina ronga ka levenanasa rak; mila lorooro rak i umsu mi loklok mulus mene, kuren la miba lok ka loklox amas ti labaroonan atnimi. 30 Mina siam ka ia mila levenanasa rak kopmen na lolos la loklok tarak noxo lok ngan lavanga mumuat tinimi.”

Copyright information for `MMX