Matthew 14

Lanmet At Ne Jon Laradi Sep Susu

(Mk 6:14-29; Lu 9:7-9)

Ap mo levenaleng Erodes laradi gomgo boro Galili ga ronga lempanga ne Iesu ga lox i. La ni ga lok ti luvuttadi gugu ren, “Agut neni ne Jon to ga roo xat amlong, kuren la neni ira lok nom lempanga sangsangu mi mo lololos.”

Avot at na ne Erodes ga sak paxat ka latkin at neton, laasen teren ne Pilip. Laasen ap mo latkin ne Erodias. La ne Jon laradi sep susu ga vaase sok ne Erodes mumu na loklok. La neni ga lok ti ne Erodes, “Ixok mokso do uga epot ka ne Erodias.”

Kuren la ne Erodes ga riki luvuttadi gugu ren kusu dina ranga alis ne Jon la diga xoxo i la diga lok li i at loogu xokoxo.
Erodes ga lok do na sev amer i, ketla neni ga marat bok at limixin me Judaia; mila diga lok do ne Jon leeme vapaase alii.

At laaleng loklok katling at livipisik at ne Erodes, ne nitnono ne Erodias ga tii ro melamgo at limixin. La ne Erodes ga lok momo aleng min, la ga lok laxakaape do neni naba raba mo loono mi tavanga neni na sing tin. Neni ga mu asu lodoxoma xa at nenen la ga lok, “Una raba nga ia mo mi lavatlak at ne Jon, laradi sep susu, to at tavattingtigon silok.” Loorong silok ga ronga i la ga bulu aleng. Ketla neni goxo epovo na los polo mo laxakaape neni ga lok pam i ro melamgo at limixin; kuren la neni ga raba linga luvuttadi gugu ren kusu dina sev amet ne Jon kerekngan mo loono ga sing tin. 10 Kuren la diga ra korop ka lavatlak at ne Jon to at loogu xokoxo. 11 La diga lok li mo lavatlak to at lavattingtigon silok la diga raba loono min; la ga raba nenen min. 12 La luvuttadi loklok ka anasa at ne Jon digat pas la diga lok ka labantuxu ren la digak mir i; melemu digat pas la diga tong i na ri ne Iesu.

Iesu Ga Raba Luxa Luvuttadi

(Mk 6:30-44; Lu 9:10-17; Jo 6:1-14)

13 Iesu ga ronga lanmet at ne Jon la neni xusuk mun ga mu lesepang uto at loxot mimila. La buaang limixin diga ronga levelinga mumu i na la diga mumu asu i uto loxon boro at levenmenemen atdi. 14 Se ne Iesu ga oso la ga ven nedi buaang limixin, ni ga balamu aleng di la ga lox aroo nedi, diga meres.

15 Ga ukantinao nga, luvuttadi loklok ka anasa ren diga vot pasa i la diga lok tin, “Ukantinao nga na la na loxot, ni loxot mimila rino, la loxonaleng ti anan ira volo vam. Una riki aonon limixin kusu dibat pas uto at levenmenemen la dina un ka tempanga anan tidi.”

16 La ne Iesu ga lok tidi, “Ixo epovo do dina on basinge na loxot. Nemi xa mina raba nedi mi teveluxa kusu ri anan.”

17 La diga lok tin keretna, “Ma ruuna mun lavalimo lengkongkide la legepu venmat.”

18 La ne Iesu ga lok tidi, “Mina raba ia mi nom leveluxa.” 19 La neni ga tong i ri mo limixin kusu dina xis kopok at mo levempivilis avukat. La ni ga lok ka mo levengkongkide la legepu venmat, la ga milik aurut uto vana at laxalibet, la ga tong avukat ti ne Moroa. La neni ga sebek mo lengkongkide la ga raba i ri luvuttadi loklok ka anasa ren, la diga raba limixin min. 20 La limixin axap diga anan la diga an mais. La luvuttadi loklok ka anasa diga luxa lasangaun mi legepura leventat silok mi leveluxa mo limixin diga an ake ren. 21 La nedi luvuttadi diga anan, diga epovo at lavalimo larabin sangsangaun kobot. (5000) La lentaba bok lavakin la laxamdak mi laxaalik kakalik bok diga anan.

Iesu Gat Pas To Mavana At Lavatdan Kis Galili

(Mk 6:45-52; Jo 6:15-21)

22 La soso mun ne Iesu ga tong i ri luvuttadi loklok ka anasa ren kusu dina los kas at lesepang, la dinamgo rin uto at lenep meo. La neni ga riki aonon limixin. 23 Se neni ga riki aonon kepe vam di, neni xusuk ga vas urut to vana at loxongkaana kusu na ngising. Neni gak lok go se at laxanimin. 24 La ap mo loxonaleng lesepang no garak lox atbutbu nga. La lempopaxanao gak paksa ekakat lesepang mila lamanman gat mas lolos tangarang i.

25 Kantubu at lavantun mi lavanna konaleng at laxanimin, Iesu ga vas posiga luvuttadi loklok ka anasa ren to kantubu at lavatdan kis, neni gat pas mun to mavana at lavatdan kis. 26 Se diga ven i gat pas to mavana at ladan, diga marat aleng tinotno la diga lok, “Loroonan panga nom!” La digap kup aleng mi lainmarat.

27 La soso mun ne Iesu ga lok tidi, “Nemen gat mita marat; mina lolos. Nenia mun na.”

28 La ne Pita ga lok, “Leeme Silok. Do nenu ruturun pam nom, una tong box i ria kusu anat pas mavana at ladan la u dom saparav u.”

29 La ne Iesu ga vorang i rin keretna, “Ude u.”

Kuren la ne Pita ga xatu kaxat boro at lesepang la gat pas to mavana at lavatdan kis uto at ne Iesu.
30 Ketla se neni ga ven lamanman, neni ga marat la gara dong si silatla nga ukopok at ladan. La neni ga xup keretna, “Leeme Silok, una lox aroo ia!”

31 Soso mun Iesu ga song asu mi lekngen la ga ranga ka i la ga lok, “Nenu u ruuna lunuunu i xakalik mun. Tila uxo nuunu do nenia a epovo ana lox u xusu unat pas to mavana at ladan ude saparav ia?”

32 La nedu eburu diga los kas at lesepang, la lamanman gara xap matmas nga. 33 La luvuttadi loklok ka anasa ro xeneng at lesepang diga lok, “I ruturun aleng do nenu ne Nitna ne Moroa.” La diga lotu saparav i la diga emi asu min.

Iesu Ga Lox Aroo Limixin Mekmeres To Genesaret

(Mk 6:53-56)

34 Diga xan polo lavatdan kis la diga oso ro Genesaret. 35 Limixin go diga ven kisip ne Iesu, la diga lox aonon levelinga ri limixin diga ruuna levenanmeres ap mo lengkot axap do ne Iesu mo ga vot. La limixin diga lok ka di uto saparap ne Iesu. 36 La diga sing i xusu na ke limixin mekmeres dina long tu at lungusungus at lavanga singsiga ren. La nedi axap diga long tu ren, diga lox avukat ta.

Copyright information for `MMX