aPas 20:12, 21:17
bAis 29:13

Matthew 15

Levenanasa At Lubung Parisi La Lubung Sadiusi

(Mk 7:1-13)

Lentaba lubung Parisi mi luvuttadi loklox ase at Lenavolo diga vas kaxat boro Jerusalem la diga vosiga ne Iesu la diga sue i, “Tila ba luvuttadi loklok ka anasa ram di ronga xepe leveloklox ase at lavalabat atdik? Dixo sogos avot be levengkikngen di la melemu dina anan.”

La ne Iesu ga vorang i ridi xeretna, “La tila ba ming tonga xepe levelinga at ne Moroa xusu mi epovo do mina mumu asu xa levenanasa atnimi? Levelinga at ne Moroa i lok keretna,

‘Mina lok ngangao at luvuttemen nimi mi luvutnen nimi, la do tara i paase kapmek ti ne temen mi nenen, limixin dina sev amer i.’ a 

Ketla nemi mi lok keretna; mo do tara na ruuna tempanga do ri lox epovo lavakpakes at ne temen kopla nenen, nemi mi tong i rin do neni na mumu asu leveloklok at lavalabat la na raba ne Moroa min la neni na ke loklok ti lok tooro du. At na mun langas nemi ming tonga xepe levenanasa at ne Moroa la mira mumu asu nga leveloklok atnimi. Nemi lavapen aala. Aisaia ga paase alii nunuan mumu nimi. Ni ga tong asu levelinga at ne Moroa keretna,

‘Na limixin di lok ngangao rak mi levelinga mun atdi, ketla lebelen di i vaxalom tino basinge ia. Dixo lotu saparav ia mi luruturun, la di lox ase mi levelinga at limixin mun!” b 

Lempanga I Lox Abilinga Lorooro At Laradi

(Mk 7:14-23)

10 Melemu Iesu ga ro xaka limixin saparav i la ga lok tidi, “Mina ronga ka nunuan lempapaase rak la mina xasep teren. 11 Lempanga i vubeles keneng at lungusno laradi, anai xopmen na lox abilinga i; ketla levelinga laradi i vaase asu i at lungusno, ana i lox abilinga i.”

12 Melemu luvuttadi loklok ka anasa diga vosiga i la diga lok, “Uklen pam i do lubung Parisi di suma xapmek ti levelinga ram?”

13 La ni ga lok tidi, “Larauna axap ne Tamak goxotlo li di, neni ba xat pes di. 14 Mina ke xepe di mi levenanasa atdi. Nedi di lok ngan lengkatli main la di lok do nedi luvuttadi loklok tooro at limixin; do laxatli main im lam lara laxatli main, nedu buru duba subu tup at lemet.”

15 Pita ga lok ti ne Iesu, “Una soxomus be lavasuun at nom lavapaase poovo rinama.”

16 La ne Iesu ga sue di, “Nemi bok luvuttadi loklok ka anasa rak kopmen mina xasep? 17 Mina xasep do lempanga anan laradi i anan i la i beles keneng at lebelen, nom i neni i lox asu box i. 18 Ketla lempapaase laradi i vaase asu i at lungusno ren, nom i, i ravasu boro xeneng at lorooro ren; la na mun levelinga, ni i epovo na lox abilinga i. 19 Na levempanga xapmek i ravasu boro at lorooro at laradi i lok keretna; levendoxoma xapmek, la loklok tip sep amet tadi, loklok ting longka, la leveloklok kakapmek maxamang at lixitkis epot, loklok tip kip pilo, la lavapaase xaxarang mu tara, la loklok ti lox asi tara. 20 La nai lempanga i lox abilinga laradi. Ketla do tara na anan la kopmen na gos avot be lukngen, nom kopmen na lox abilinga i.”

Iesu Ga Lox Aroo Loolik At Latkin Kopmen Boro Israel

(Mk 7:24-30)

21 Iesu ga on basinge mo lemenemen la gat pas uto at lengkot saparap Taia la Sidon. 22 Lara latkin me Kanan mo ga nemen ap mo lenep ga vosiga ne Iesu, la ga xup lolos tin keretna, “Leeme Silok! Livisik li at ne Devit. Una balamu ia la una lok mumu be loolik tarak. Lagas i suxuna i la i lox atpospa rino i.”

23 Ketla Iesu goxo tong tekolinga rin. La luvuttadi loklok ka anasa ren diga vosiga ne Iesu la diga lok tin, “Una riki aonon i! Ia mumu asu dik la irak lox avurupit amisik dik.”

24 La ne Iesu ga lok ti mo latkin keretna, “Moroa ga riki ia xusu rinedi mene limixin me Israel diga on soogong.”

25 Nom latkin ga ronga i na la ga xis tiktikbu mi luvatgulom teren la ga lok, “Leeme Silok. Una lok tooro ia.”

26 La ne Iesu ga lok tin keretna, “Ixok mokso do ana lok ka lempanga anan at laxamdak la ana lu raba lubungman min.”
Limixin me Judaia diga so asen limixin petpes mi lubungman.


27 Ketla nom latkin ga lok, “Leeme Silok. I ruturun, ketla lubungman di anan bok lengkon mumus luxa im subu su boro vana at loxonin anan at luvuttadi atdi.”

28 La ne Iesu ga lok tin, “Latkin. Lunuunu ram i silok aleng. Aba lox epovo lisingising taram.” La ap mo mun loxonaleng loolik teren ga lox avukat ta.

Iesu Ga Lox Aroo Buaang Limixin

29 La ne Iesu ga vas kaxat mego la gat pas to loxon at lavatdan kis Galili. La ni ga vas urut at lakaana la gat kis go. 30 La buaang nedi limixin, diga vosiga i la diga lam ka limixin, lengkot atdi ga molo, la lengkatli main, la lentaba levengkikngen di la lengkangkedek atdi ga lok kapmek; la lenbaalung baa la buaang bok nedi luvuttadi mi levenanmeres kerepmo, la diga lok ka di uto saparap ne Iesu la ni ga lox aroo di. 31 Limixin diga sangu aleng atla diga ven lenbaalung baa diga paase; la luvuttadi mi levengkikngen di mi lengkangkedek ga lok kapmek, diga lox avukat; la nedi di goxot pas gano, digat pas ta; la lengkatli main, diga reven; la diga emi asu aleng mi ne Moroa me Israel.

Iesu Ga Raba Luxa Buaang Limixin

(Mk 8:1-10)

32 Iesu ga ro xaka luvuttadi loklok ka anasa ren saparav i la ga lok, “A balamu aleng na limixin, mila ira vantun ta levenaleng nedi dik lox eburu minia, la kopmen ta tempanga anan kusu ridi ri anan. Axo para i do ana riki aonon gamasa nedi mi lantoxo atdi; lavanga dina meroxon mu langas uto at laramenemen atnedi.”

33 La luvuttadi loklok ka anasa diga sue i, “Ata ba lok ka tempanga anan ua at na lenep gamasa kusu naba epovo at na limixin solo?”

34 La ne Iesu ga sue di xeretna, “Lavanisa lengkongkide nemi mi ruuna i?”

La diga vorang i, “Lavanuti lengkongkide la lutpen mat lixilik bok.”

35 La ne Iesu ga tong i ri limixin kusu dina xis kopok at laxangka. 36 La ni ga lok ka lavanuti lengkongkide la lutpen mat la ni ga tong aorong ti ne Moroa, la ga sebex i, la ga raba luvuttadi loklok ka anasa ren min; la diga raba limixin min. 37 La limixin axap diga anan la diga an mais. La melemu luvuttadi loklok ka anasa diga lok ka lavanuti leventat silok la diga suxa aumsu di mi lempanga anan limixin diga an ake ren. 38 Luutus atdi na lavatlok ga epovo at lavanuet larabin sangsangaun kobot (4000). Lavakin mi laxamdak la laxaalik lixilik kopmen di goxo nemen at na luutus. 39 Melemu Iesu ga riki aonon limixin uto at laramenemen atdi la ga los kas at lesepang la ga sen uto at lenep Magdala.

Copyright information for `MMX